#ယနေ့ထုတ်သတင်းစာ_သတင်း
◼ ချင်းမိုင်တွင် ကြောင်ကို ရေမြောင်းထဲကန်ချခဲ့သော မြန်မာတစ်ဦး ဖမ်းဆီးခံရ
ထိုင်းနိုင်ငံမြောက်ပိုင်း ချင်းမိုင်မြို့တွင်အိပ်နေသော ကြောင်တစ် ကောင်ကိုရေမြောင်းထဲကန်ချခဲ့သော မြန်မာနိုင်ငံသားတစ်ဦးကို ဇွန် ၆ ရက် ထိုင်းရဲတပ်ဖွဲ့ကဖမ်းဆီးခဲ့ကြောင်း ထိုင်းသတင်းဌာနများတွင် ဖော်ပြချက်အရ သိရသည်။
ပြီးခဲ့သော ဇွန် ၁ ရက် နံနက် ၂နာရီခန့်က အသက်(၁၉)နှစ်အရွယ် ကိုကျိုင်စိုင်းအမည်ရှိမြန်မာနိုင်ငံသား တစ်ဦးအပါအဝင် မြန်မာနိုင်ငံသား နှစ်ဦးသည် ရေမြောင်းဘေး လမ်းလျှောက်လာစဉ် လမ်းဘေးအိပ်နေသော ကြောင်တစ်ကောင်ကို ကိုကျိုင်စိုင်းက ရေမြောင်းထဲသို့ ကန်ချလိုက်သည်ကို ဗီဒီယိုမှတ်တမ်းအရ သိရသည်။
ယင်းဖြစ်စဉ်ကို CCTV မှတ်တမ်းတွင်ရိုက်မိထားပြီး ထိုင်းနိုင်ငံ သားကြောင်ပိုင်ရှင်က လူမှုကွန်ရက်ပေါ်သို့တင်လိုက်ရာမှ လူအများကြား ဝေဖန်မှုများမြင့်လာပြီး ကြောင်ပိုင်ရှင်က ဇွန် ၂ ရက်တွင် ရဲစခန်းသို့ တိုင်ချက်ဖွင့်ခဲ့ခြင်းဖြစ်သည်။
ရဲတပ်ဖွဲ့က CCTV မှတ်တမ်းများမှတစ်ဆင့် ခြေရာခံစစ်ဆေးရာမှ ကိုကျိုင်စိုင်းကို နေထိုင်ရာအခန်းထဲတွင်ဖမ်းဆီးခဲ့ပြီး ရဲစခန်းသို့ခေါ်ယူမေးမြန်းခဲ့ကာ ယင်းညတွင် ကိုကျိုင်စိုင်းတို့ သူငယ်ချင်းနှစ်ဦးသည် လမ်းလျှောက်လာစဉ် ကြောင်ကိုမြင်ရ၍ကျီစယ်လိုသဖြင့် ရေမြောင်းထဲကန်ချမိခြင်းဖြစ်ကြောင်း ဝန်ခံထားသည်။ လက်ရှိတွင် ကိုကျိုင်စိုင်းကို တိရစ္ဆာန်ညှဉ်းပန်းမှုဖြင့် အမှုဖွင့်ထားကြောင်း သတင်းတွင်ဖော်ပြထားသည်။
