အပြည်ပြည်ဆိုင်ရာ အလုပ်သမားအဖွဲ့ချုပ်က မြန်မာနိုင်ငံကို အလုံးစုံပိတ်ဆို့ရန် ဆုံးဖြတ်
ရန်ကုန်၊ ဇွန် ၆
အပြည်ပြည်ဆိုင်ရာ အလုပ်သမားအဖွဲ့ချုပ် (ILO) က Article-33 လို့ ခေါ်ဝေါ်တဲ့ ဖွဲ့စည်းပုံအခြေခံဥပဒေပုဒ်မ-၃၃ အရ မြန်မာနိုင်ငံကို အလုံးစုံပိတ်ဆို့အရေးယူဖို့ ဇွန်လ ၅ ရက်နေ့မှာ ကျင်းပခဲ့တဲ့ ညီလာခံမှာ အတည်ပြု ဆုံးဖြတ်လိုက်ပါတယ်။
မြန်မာနိုင်ငံအနေနဲ့ ၂၀၀၀ ပြည့်နှစ်နောက်ပိုင်း ဒုတိယအကြိမ်မြောက် ILO ရဲ့ အရေးယူပိတ်ဆို့မှုခံရတာဖြစ်ပြီး အခုလို့ အရေးယူဖို့ ၂၀၂၄ ခုနှစ် နိုဝင်ဘာလမှာ ပြုလုပ်ခဲ့တဲ့ ILO အုပ်ချုပ်မှုကော်မတီအစည်းအဝေးမှာ အတည်ပြုခဲ့တာပါ။
Article -33 အရ အရေးယူခံရတဲ့ နိုင်ငံဟာ ILO ရဲ့ ကန့်ကွက်မှုကြောင့် နိုင်ငံတကာနဲ့ ကုန်သွယ်ရေးကိစ္စတွေမှာ ရရှိထားတဲ့ အထူးအခွင့်အရေးတွေ ဆုံးရှုံးရနိုင်ပြီး အခွန်သက်သာခွင့်တွေလည်း ရုတ်သိမ်းခံနိုင်တာတွေပါ ရှိလာနိုင်ပါတယ်။
ဒီအချက်တွေကြောင့် မြန်မာနိုင်ငံရဲ့ အဓိကပို့ကုန်ကဏ္ဍဖြစ်တဲ့ အထည်ချုပ်လုပ်ငန်းတွေအပေါ် မှီခိုနေရတဲ့ အလုပ်သမား သိန်းနဲ့ချီ အခက်တွေ့နိုင်တာကိုလည်း သုံးသပ်မှုတွေ ရှိနေတာပါ။
ILO အနေနဲ့ အလုပ်သမားတွေအပေါ် ဆက်လက်ဖိနှိပ်မှုတွေ မလုပ်ဆောင်နိုင်အောင် ကမ္ဘာတစ်ဝှမ်းက အစိုးရတွေ၊ ကုမ္ပဏီတွေနဲ့ သမဂ္ဂတွေကို ပူးပေါင်းဆောင်ရွက်ကြဖို့ တိုက်တွန်းထားပါတယ်။
၂၀၂၄ ခုနှစ်အတွင်း မြန်မာ့အထည်ချုပ်ကဏ္ဍမှ ပို့ကုန်ဝင်ငွေ အမေရိကန်ဒေါ်လာ ၄.၄၆ ဘီလီယံရရှိခဲ့ပြီး ၂၀၂၃ ခုနှစ်ကထက် ဒေါ်လာ ၇၅၀ သန်းခန့် ဝင်ငွေရရှိမှု လျော့သွားတာကို မှတ်တမ်းတွေအရ သိရပါတယ်။
မြန်မာနိုင်ငံမှ အထည်ချုပ်တွေကို အမေရိကန်၊ အီးယူ၊ ဂျပန်၊ ကိုရီးယား အပါအဝင် နိုင်ငံပေါင်း ၈၀ ကျော်ကို တင်ပို့လျက်ရှိကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရပါတယ်။
