သန်လျင်ရေနံချက်စက်ရုံမှ စီမံကိန်းအပိုင်း(၁)အဖြစ် တစ်နှစ်ကို ရေနံစိမ်းတန်ချိန် ၅ သိန်း ချက်လုပ်မည်
ရန်ကုန်၊ ဇွန် ၆
အမှတ်(၁) ရေနံချက်စက်ရုံ (သန်လျင်) ကနေ စီမံကိန်းအပိုင်း(၁)အဖြစ် တစ်နှစ်ကို ရေနံစိမ်းတန်ချိန် ၅ သိန်း ချက်လုပ်နိုင်အောင် ဆောင်ရွက်သွားမယ်လို့ စွမ်းအင်ဝန်ကြီးဌာနမှ သိရပါတယ်။
နိုင်ငံတော်ရဲ့ စက်သုံးဆီလိုအပ်ချက်ကို အတိုင်းအတာတစ်ရပ်အထိ ဖြည့်ဆည်းပေးနိုင်ဖို့ သန်လျင်ရေနံချက်စက်ရုံကို အသွင်သစ်နဲ့ လည်ပတ်ထုတ်လုပ်သွားမှာဖြစ်ကြောင်း နစကဝန်ကြီး ဦးကိုကိုလွင်က ပြောပါတယ်။
စီမံကိန်းအပိုင်း(၂)အဖြစ် တစ်နှစ်ကို ရေနံစိမ်းတန်ချိန် ၃ သန်း ချက်လုပ်နိုင်တဲ့ ရေနံချက်စက်ရုံကို ဆက်လက်ဆောင်ရွက်သွားနိုင်ဖို့ ရေတိုရေရှည်အစီအမံတွေ ချမှတ်ဆောင်ရွက်နေတယ်လို့ ဆိုပါတယ်။
စီမံကိန်းတစ်ခုလုံး ဆောင်ရွက်ပြီးစီးပါက နိုင်ငံတော်ရဲ့ စက်သုံးဆီလိုအပ်ချက်ရဲ့ ထက်ဝက်ခန့်ကို ဖြည့်ဆည်းပေးနိုင်မှာဖြစ်တယ်လို့ သိရပါတယ်။
လက်ရှိမှာ ရေနံစိမ်းနဲ့ ရေနံထွက်ပစ္စည်းတွေ သယ်ယူမယ့် ပိုက်လိုက်တည်ဆောက်ဖို့ လမ်းအူကြောင်းလျာထားနေရာတွေ၊ တောင်ဒဂုံ-သန်လျင် သဘာဝဓာတ်ငွေ့ပိုက်လိုင်းရဲ့ ပဲခူးမြစ်ဖြတ်အပိုင်းမှာ Horizontal Directional Drilling စက်နဲ့ တူးဖော်ဆက်သွယ်မှုတွေ ဆောင်ရွက်လျက်ရှိပါတယ်။
သန်လျင်ရေနံချက်စက်ရုံမှာ အရင်က ဓာတ်ဆီ၊ ဒီဇယ်၊ လေယာဉ်ဆီ၊ ဓာတ်ပျံဆီတွေ ထုတ်လုပ်ခဲ့ပေမယ့် နိုင်ငံတော်ရဲ့ စီးပွားရေးမူဝါဒနဲ့အညီ သုံးသပ်ဆောင်ရွက်နိုင်ဖို့ ၂၀၁၇ ခုနှစ်ကစပြီး စက်ရုံလည်ပတ်မှုကို ရပ်နားခဲ့တာပါ။
နိုင်ငံပိုင်ရေနံချက်စက်ရုံတွေကနေ ရေနံထွက်ပစ္စည်းထုတ်လုပ်မှုက ပြည်တွင်းသုံးစွဲမှုရဲ့ ၃ ရာခိုင်နှုန်းပဲရှိလို့ နစကအနေနဲ့ အကြောင်းအမျိုးမျိုးကြောင့် ရပ်ဆိုင်းထားခဲ့တဲ့ ရေနံချက်စက်ရုံတွေ ပြန်လည်ပတ်နိုင်ရေး ပြင်ဆင်လျက်ရှိပါတယ်။
သတင်း - BETV Business
