ပြည်တွင်းထုတ် SKD၊ CKD ကားတွေကို အခွန်လျှော့ပေါ့ကောက်ခံ

ပြည်တွင်းထုတ် SKD၊ CKD ကားတွေကို အခွန်လျှော့ပေါ့ကောက်ခံသွားမယ်လို့ စီမံကိန်းနဲ့ဘဏ္ဍရေး၀န်ကြီးဌာနက အခုရက်ပိုင်းအတွင်းမှာ ထုတ်ပြန်လိုက်ပါတယ်။
SKD ကားဆိုတာက Semi Knocked Down (SKD)ကို ရည်ညွှန်းတာဖြစ်ပြီး ဒါဟာ ကားတစီးရဲ့အစိတ်အပိုင်းတွေကိုပြည်ပကနေတင်သွင်းပြီး ပြည်တွင်းမှာတပ်ဆင်ထုတ် လုပ်ခြင်းဖြစ်ပါတယ်။
CKD ကားဆိုတာကတော့ Completely Knocked Down (CKD)လို့ အဓိပ္ပါယ်ရပြီး ဒီစနစ်ကတော့ ကားတစီးရဲ့အစိတ်အပိုင်းတွေအားလုံးကိုခွဲခြားပြီး တခြားနိုင်ငံကတပ်ဆင်ပြီး တင်ပို့လာတာပဲဖြစ်ပါတယ်။
ယခုအကောက်ခွန်ဖြေလျှော့ပေးလိုက်တဲ့ အရာမှာအကျုံး ဝင်တဲ့ ယာဉ်တွေကတော့
ပြည်တွင်းမှာ ထုတ်လုပ်မယ့်လောင်စာဆီသုံးယာဉ် Semi-Knocked Down - SKD နဲ့ Completely Knocked Down - CKD စနစ်နဲ့
ပြည်ပမှာတပ်ဆင်ပြီး တင်သွင်းတဲ့ ယာဉ်တွေအတွက်ဖြေလျှော့ပေးထားခြင်းဖြစ်တယ်လို့ သိရပါတယ်။
သို့သော်လည်း ပြည်တွင်းကားဈေးကွက်မှာတော့ Without ကားဖမ်းဆီးအရေးယူမှုကိစ္စရပ်တွေကြောင့် နယ်အဝယ်တွေလိုက်နေပြီး ပြည်တွင်းကားဈေးနှုန်းတွေက အမြင့်ပိုင်းမှာသာဆက်ရှိနေတယ်လို့ ရန်ကုန်ကားဈေးကွက်အတွင်းကနေ စုံစမ်းသိရှိရပါတယ်။
"ပြည်တွင်းထုတ် SKD နဲ့ CKD ကားတွေကို အခွန်လျှော့တဲ့ကိစ္စပေါ့။အရင်က သူတို့က ၁ဝဝဝ စီစီအထက်ကို ၇.၅ ရာခိုင်နှုန်းဖြတ်ထားတဲ့ကိစ္စပါ။အရင် ၂ဝ၂၃ ကလည်းဒီမူဝါဒ ပဲလေ၊ ဘာမှသိပ်ထူးခြားလာတာမျိုးတော့မရှိပါဘူး။လျှော့ကောက်တာလည်းမဟုတ်၊တိုးကောက်တာလည်းမဟုတ် အရင်လျှော့ကောက်ထားတဲ့ဟာအတိုင်းပါပဲ။အဲဒါကိုပြန်ပြီးထုတ်ပြန်တာပါ။အရင်သွားမြဲတိုင်းသွားလို့ ပြောတာနဲ့တူတူပါပဲ။ဈေးကွက်မှာက အပြောင်းအလဲမရှိဘူး။အခုနယ်အဝယ်တွေလာကြတယ်။အောက်ပိုင်းမြင့်တဲ့ကားတွေကိုဝယ်ကြတယ်။အခုတော့အရာင်းသွက်နေတယ်လို့ပြောရမယ်။ဘာဖြစ်လို့လဲဆိုတေ့ာနယ်ကလူတွေကအခု Without စီးလို့မရတော့ဘူးဆိုလို့ အရောင်းအဝယ်ကလိုက်နေတယ်။လက်ရှိကားဈေးကွက်အနေ အထားအဲလိုပုံစံတော့ရှိပါတယ်"လို့ ကားလောကသား တယောက်က VOM ကို ပြောပါတယ်။
စီမံကိန်းနဲ့ ဘဏ္ဍာရေးဝန်ကြီးဌာနကတော့ စီးပွားရေးပြန်လည်ကောင်းမွန်လာစေဖို့နဲ့ ပြည်တွင်းရှိ အသေးစား၊ အငယ်စား၊ အလတ် စား စီးပွားရေးလုပ်ငန်းတွေကို အထောက်အကူပြုစေဖို့ မြန်မာနိုင်ငံရင်းနှီးမြုပ်နှံမှုကော်မရှင်ရဲ့ခွင့်ပြု ချက်နဲ့ ပြည်တွင်းမှာထုတ်လုပ်မယ့် လောင်စာဆီသုံး SKD၊ CKD တွေရဲ့အကောက်ခွန်နှုန်းထားတွေကိုဆက် လက်ဖြေလျှော့ခွင့်ပြုလိုက်တာဖြစ်တယ်လို့ သူတို့ရဲ့ထုတ်ပြန်ချက်မှာ ဖော်ပြထားပါတယ်။
ဒါအပြင် ပြည်တွင်းကားဈေးကွက်အခြေအနေနဲ့ ပတ်သက်လို့ ကားဝယ်ရောင်းလောကသားတယောက်က သူရဲ့အမြင်ကို အခုလို ဆက်ပြီးသုံးသပ် ပြောပြပါတယ်။
"အခုက Without ကားတစီးရဲ့တန်ဖိုးက သိန်းရာချီဖြစ်နေတယ်။သိန်း ၅ဝ အောက်မှာရဖို့မရှိတော့ဘူး။ပရိုဘောက်ဂီယာဘောက်၊ အင်ဂျင်တောင် သိန်း ၅ဝ ရှိတယ်။တို့နိုင်ငံရဲ့ပေါ်လစီနဲ့ မြန်မာအကြိုက်ဆို EV ကိုလုံးဝစိတ်မဝင်စားဘူး။ဈေးကွက်မှာ EV က သိပ်မလှုပ်ဘူး။သီလဝါမှာထုတ်တဲ့ SKD တွေရပ်ထားတာဆိုရင်ဘာတွေရပ်ထားလဲဆိုတော့ ဖီးယက်စ်တို့ ဆွစ်တို့ နောက် SKD ဟွန်ဒိုင်းကထုတ်တဲ့ ကားတမျိုးရှိတယ်။SKD ထဲဆို အဲဒါတွေရှိတယ်။ကားဈေးတက်တယ်ဆိုတာက Without က လုံးလုံးစီးမရတော့ အဝယ်လိုက်တော့ဈေးကမြောက်တာပေါ့။အခုပုံအတိုင်းဆို အပေါ်ကား၊ အလယ်ကား၊အောက်ကားအကုန်ဈေးတက်ပါမယ်"လို့ သူက ပြောပြခဲ့ပါတယ်။
ယခုထုတ်ပြန်မှုအရ SKD စနစ်နဲ့ ထုတ်လုပ်မယ့် ၂၀၀၀ စီစီနဲ့ အထက် ယာဉ်တွေအပါအဝင် ၂၀၀၀ စီစီနဲ့ အောက်ထုတ်လုပ်မယ့် ယာဉ်တွေအတွက် ယခင်က ၇ ဒသမ ၅ ရာခိုင်နှုန်းကောက်ခံရာကနေ ယခု ၅ ရာခိုင်နှုန်းသို့လည်းကောင်း၊ CKD စနစ်နဲ့ ထုတ်လုပ်မယ့် ယာဉ်တွေအတွက် ယခင်က ၅ ရာခိုင်နှုန်း ကောက်ခံရာကနေ ယခု ၃ ရာခိုင် နှုန်းသို့လည်းကောင်း၊ လျှော့ချ သတ်မှတ်လိုက်တာဖြစ်တယ်လို့ သိရပါတယ်။
ဒါအပြင် သုံးဘီးမော်တော်ဆိုင် ကယ်လူစီးတွေကိုလည်း ၃ ရာခိုင် နှုန်း၊လူစီးဘတ်စ်တွေနဲ့ Truck , Body Building ပြုလုပ်မယ့် Truck တွေကို ၃ ရာခိုင်နှုန်း၊မော်တော် ဆိုင်ကယ်ကို ၁.၅ ရာခိုင်နှုန်းသာအခွန် ကောက်ခံသွားမှာဖြစ်တယ်လို့ သိရပါတယ်။
ယခုအမိန့်ဟာ ၂ဝ၂၅ ခုနှစ်၊ဇွန်လ ၁ ရက်နေ့ကနေ ၂၀၂၆ ခုနှစ်၊မေလ ၃၁ ရက်နေ့အထိဖြစ်တယ်လို့လည်း သိရှိရပါတယ်။
ပုံစာ - ပြည်တွင်းထုတ် SKD ကားအချို့။