ပြည်တွင်းစားဆန် ရွှေဘိုပေါ်ဆန်း ဈေးပြန်တက်လာ
ရန်ကုန်၊ ဇွန် ၅
ပြည်တွင်းစားသုံးမှုများတဲ့ ရွှေဘိုပေါ်ဆန်း ဆန်ဈေးနှုန်းတွေကို အနည်းငယ်တိုးမြှင့် သတ်မှတ်ထားတာကို စီးပွား/ကူးသန်းဝန်ကြီးဌာန၊ စားသုံးသူရေးရာဦးစီးဌာနရဲ့ ဇွန်လအတွက် ဆန်ရည်ညွှန်းဈေးနှုန်းများ ထုတ်ပြန်ချက်အရ သိရပါတယ်။
ရွှေဘိုပေါ်ဆန်းအုပ်စုဝင် ၁၀၈ ပေါင် / (၂၄) ပြည် ပထမတန်း (အဆင့်မြင့်) (အဟောင်း) ဈေးဟာ မေလမှာ တစ်အိတ်ကို ၁၅၀,၀၀၀ ကျပ် သတ်မှတ်ခဲ့ပြီး ဇွန်လမှာတော့ တစ်အိတ်ကို ၁၅၅,၀၀၀ ကျပ်ကို တိုးမြှင့်ထားပါတယ်။
ပထမတန်း (အဆင့်မြင့်) (အသစ်) ကိုလည်း ၁၃၅,၀၀၀ ကျပ်မှ ၁၄၀,၀၀၀ ကျပ်၊ ဒုတိယတန်း (အဟောင်း) ကိုလည်း ၁၄၅,၀၀၀ ကျပ်မှ ၁၅၀,၀၀၀ ကျပ်၊ ဒုတိယတန်း (အသစ်) ကိုလည်း ၁၃၀,၀၀၀ ကျပ်မှ ၁၃၅,၀၀၀ ကျပ်ကို မြင့်တက်လာပါတယ်။
ဧရာဝတီပေါ်ဆန်းများက အမျိုးအစားအလိုက် တစ်အိတ်ကို ၁၀၇,၀၀၀ ကျပ်မှ ၁၂၀,၀၀၀ ကျပ်၊ ပေါ်ဆန်းအုပ်စု (ခွံနီ/ပေါ်ကျွဲ) တစ်အိတ်ကို ၉၀,၀၀၀ ကျပ်မှ ၁၀၂,၀၀၀ ကျပ်၊ ပေါ်ဆန်းအုပ်စု (ဘေးကြား/ကြားပျံ) တစ်အိတ်ကို ၁၁၇,၀၀၀ ကျပ်မှ ၁၃၅,၀၀၀ ကျပ်ဈေး သတ်မှတ်ထားပါတယ်။
မန္တလေး၊ မကွေး၊ စစ်ကိုင်းနဲ့ နေပြည်တော်နဲ့ မြန်မာနိုင်ငံအထက်ပိုင်းက ထွက်ရှိတဲ့ ဧရာမင်း၊ ဧရာပဒေသာ၊ မဂျမ်းတော ဆန်ဈေးတွေက ၁၃၃,၀၀၀ ကျပ် အမြင့်ဆုံးရှိပြီး ဧရာဝတီတိုင်းက ထွက်ရှိတဲ့ ဧရာပဒေသာ/ ဧရာမင်း ဆန်တစ်အိတ်က ၉၉,၀၀၀ ကျပ် ဈေးရှိပါတယ်။
ဧရာဝတီ၊ ပဲခူးနဲ့ ရန်ကုန်တိုင်းက ထွက်ရှိတဲ့ ရွှေသွယ်၊ အညာသား၊ ပခန်း၊ မှော်ဘီ-၂ ၊ မှော်ဘီ-၃၊ ဖန်သီးသုခ၊ လုံးသွယ်မွှေး၊ ရက် ၉၀၊ မိုး-မနောသုခ/ ဆင်းသုခ၊ ဗျော့ထွန်း ဆန်ဈေးတွေက ၇၅,၀၀၀ ကျပ်မှ ၉၂,၀၀၀ ကျပ်၊ ဇီယာ၊ ငွေတိုး၊ မင်းဧရာ၊ နှံကောက်၊ ရွှေမန်းစတဲ့ ဆန်ဈေးတွေကို ၆၈,၀၀၀ ကျပ်မှ ၇၈,၀၀၀ ကျပ် သတ်မှတ်ထားပါတယ်။
ပြည်ပကို တင်ပို့တဲ့ ဆန်ကြမ်းအုပ်စုဝင် (ဧည့်မထ/ငစိန်) ဆန်ကြမ်းတွေက အမျိုးအစားအလိုက် တစ်အိတ်ကို ၆၀,၀၀၀ ကျပ်မှ ၇၂,၀၀၀ ကျပ်အကြား ဈေးသတ်မှတ်ထားပါတယ်။
ဈေးကွက်အတွင်း ရောင်းချရာမှာ အထက်ပါ သင့်တင့်မျှတတဲ့ ရည်ညွှန်းဈေးနှုန်းတွေအပေါ် (၈) ရာခိုင်နှုန်းပိုပြီး ရောင်းချခြင်းမပြုကြဖို့ စားသုံးသူရေးရာဦးစီးဌာနက အသိပေးထားပါတယ်။