ရွှေပြည်သာ Joy Time စက်ရုံလုပ်သားတွေ လုပ်ခလစာ တိုးမြှင့် တောင်းဆိုမှု ပြေလည်မှုရရှိ
ဇွန် ၄ - ၂၀၂၅
SN (VOM)
ရန်ကုန်မြို့၊ ရွှေပြည်သာမြို့နယ်၊ ဝါးတရာစက်မှုဇုန်၊ ဗိုလ်တိုက်ချွန်းလမ်းမှာ ဖွင့်လှစ်ထားတဲ့ Joy Time (Myanmar) Garment အထည်ချုပ်စက်ရုံက အလုပ်သမားတွေ လုပ်ခလစာ တိုးမြှင့်ရရှိရေး တောင်းဆိုမှု ပြေလည်မှု ရရှိခဲ့တယ်လို့ အလုပ်သမားအရေး ဆောင်ရွက်နေသူတွေဆီက သိရပါတယ်။
စက်ရုံအထည်ချုပ် အလုပ်သမားတွေက အနည်းဆုံး အခကြေးငွေ တိုးမြှင့်ပေးဖို့ ပြီးခဲ့တဲ့ မေလ ၃၀ ရက်၊ ညနေပိုင်းက စတင်ပြီး တောင်းဆိုခဲ့ကြတာ ဖြစ်ပါတယ်။
“တောင်းဆိုတာကို စက်ရုံဘက်က ညှိနှိုင်းပေးတယ်။ အခု ပြေလည်သွားပါပြီ။ တောင်းဆိုမှု သုံးရက်အကြာပေါ့၊ ဇွန် ၂ ရက်နေ့ကပဲ ညှိနှိုင်းပြီး အဆင်ပြေသွားတာပါ။ သူတို့ တောင်းဆိုတာက အဓိက က အနည်းဆုံး အခကြေးငွေ တသောင်းသုံးထောင် ရရှိဖို့ပေါ့။ ဒါပေမယ့် တောင်းဆိုမှုတွေကိုတော့ ပြန်ပြီး ညှိနှိုင်းပေးရတာတွေတော့ ရှိတာပေါ့။ ကိုယ့်ဘက်က တိုးလိုက်၊ သူ့ဘက်က လျှော့လိုက်နဲ့ ဒီလိုပဲ လုပ်ရတာဆိုတော့ တောင်းဆိုမှု အပြည့်အဝတော့ မရခဲ့ဘူး” လို့ အလုပ်သမားအရေး ဆောင်ရွက်သူက ပြောပါတယ်။
အလုပ်သမားတွေဘက်က စတင် တောင်းဆိုခဲ့တာမှာ အနည်းဆုံးလုပ်ခကြေးငွေ တသောင်းသုံးထောက်ကျပ်၊ အချိန်ပိုကြေး တနာရီကို ၂၅၀၀ ကျပ်၊ ရက်မှန်ကြေး ခြောက်သောင်းကျပ် ဖြစ်တယ်လို့ သိရပါတယ်။
လက်ရှိမှာတော့ အနည်းဆုံးလုပ်ခကြေးငွေ ဒေးကြေး တသောင်းတထောင် ငါးရာကျပ်၊ အချိန်ပိုကြေး တနာရီ ၂၂၀၀ ကျပ်နဲ့ ရက်မှန်ကြေး ငါးသောင်းကျပ် ပေးဖို့ အလုပ်ရှင်နဲ့ အလုပ်သမား သဘောတူညီမှု ရရှိခဲ့တယ်လို့ သူက ပြောပါတယ်။
“အခုတော့ သူတို့ စက်ရုံဘက်က တိုးပေးတဲ့ ပမာဏအတိုင်း အလုပ်သမားတွေက လက်ခံလိုက်ပါတယ်။ ရက်မှန်ကြေးရော၊ အချိန်ပိုကြေးတွေရောပေါ့။ အလုပ်သမားတွေဘက် တောင်းဆိုတာတွေကတော့ ဒါကတော့ စက်ရုံတိုင်းနီးပါး ဒီပမာဏကိုပဲ ပုံမှန် ကြမ်းခင်းဈေးအနေနဲ့ တောင်းကြတာပေါ့။ အဲဒီအပေါ်မှာ စက်ရုံ တရုံနဲ့တရုံက ပေးတဲ့ skill မတူကြတော့ အဲဒါတွေအပေါ်မှာ အလုပ်ရှင်က အလုပ်သမားတွေနဲ့ အကောင်းဆုံး ညှိနှိုင်းသွားတာပါပဲ” လို့ သူက ပြောပါတယ်။
Joy Time အထည်ချုပ်စက်ရုံမှာ XSide , SOUTHBLUE , LC WAIKIKI , mavi စတဲ့ အမှတ်တံဆိပ်တွေကို မြန်မာလုပ်သားတွေက ချုပ်လုပ်ပေးရတာဖြစ်ပြီး လက်ခစား (CMP) စနစ် အထည်ချုပ်စက်ရုံ ဖြစ်တယ်လို့ သိရပါတယ်။
“အခုက တရုံလုံး ရတာ။ အကုန်လုံးပဲ။ ပြီးတော့ အရင်တုန်းက ပိတ်ရက်တွေရော၊ တခြား အစိုးရ ရုံးပိတ်ရက်တွေရော ဒေးကြေးမရဘူး။ လစာထဲက ဖြတ်တယ်။ အခုက အစိုးရ ရုံးပိတ်ရက်၊ အလုပ်ပိတ်ရက်တွေ အတွက်ပါ ဒေးကြေး တသောင်းတထောင့်ငါးရာ ရတာပါ။ တကယ်လို့ ကိုယ်က ခွင့်ယူလို့ရှိရင်လည်း လူမှုဖူလုံရေးခွင့်တို့ဘာတို့ပေါ့၊ အဲဒါမျိုးကိုလည်း ဒီ ဒေးကြေးက အကျိုးခံစားခွင့် ရှိတယ်။ ရက်မှန်ကြေးကလည်း တသောင်း ထပ်တိုးပေးတယ်” လို့ စက်ရုံအလုပ်သမား တယောက်က ပြောပါတယ်။
မြန်မာနိုင်ငံမှာ လက်ရှိ မြင့်တက်နေတဲ့ ကုန်ဈေးနှုန်းတွေကြောင့် လာပ်လစာ လုံလောက်မှု မရှိတဲ့အတွက် အလုပ်သမားတွေအနေနဲ့ အခုလို တောင်းဆိုမှုတွေ ပြုလုပ်နေရခြင်း ဖြစ်တယ်လို့ သိရပါတယ်။
လက်ရှိမှာ စက်မှုဇုန်အသီးသီးက စက်ရုံတိုင်းလိုလိုမှာ လုပ်ခလစာ တိုးမြှင့် တောင်းဆိုမှုတွေ ပြုလုပ်နေကြတာဖြစ်ပြီး အခုလို တောင်းဆိုနေကြမှုတွေနဲ့ ပတ်သက်လို့ တချို့ စက်ရုံတွေဟာ အလုပ်သမား အားလုံး တညီတညွတ်တည်း တောင်းဆိုနေကြတာ ရှိသလို တချို့သော သက်ရုံတွေကတော့ စက်ရုံ အလုပ်သမားဦးရေရဲ့ ထက်ဝက် (ဒါမှမဟုတ်) သုံးချိုး၊ တချိုးလောက်သာ ပါဝင် တောင်းဆိုနေကြတာ ဖြစ်တယ်လို့ သိရပါတယ်။
ဒါနဲ့ ပတ်သက်လို့ အလုပ်သမားအရေး ဆောင်ရွက်သူက “အဲဒီလို တောင်းဆိုမှု မလုပ်ဘဲ ကျန်နေကြတဲ့သူတွေက သူတို့ရဲ့ supervisor ကို အားနာတာတွေရယ်၊ အဲဒီ super က လုပ်ငန်းရှင်ကို အားနာတာတွေရယ်၊ နောက်တချက်ကတော့ တွက်ကပ်တာပေါ့။ အပြင်ကိုထွက်၊ အလုပ် မလုပ်ဘဲ တောင်းဆိုနေကြတဲ့သူတွေကို တချို့ လုပ်ငန်းရှင်တွေက အဲဒီနေ့အတွက် ဒေးကြေးထည့်မပေးဘူး။ အဲဒီတော့ ဒေးကြေးပြုတ်မှာစိုးလို့ မထွက်တာတွေလည်း ရှိတယ်” လို့ ပြောပါတယ်။
ဒါဟာ ရေသာခို၊ အချောင်သမားစိတ်ဓာတ်ကို ပြသတာသာဖြစ်ပြီး အလုပ်သမား လောကမှာတော့ ဒီလို စိတ်ဓာတ်မျိုးတွေ မရှိစေချင်ဘူးလို့ သူက ပြောပါတယ်။
“သူတို့စိတ်ထဲမှာ နင်တို့တောင်း၊ ငါတို့ရမှာပဲ၊ ငါတို့ကတော့ လက်ရှိ ရနေတဲ့ငွေကို အဆုံးရှုံးမခံနိုင်ဘူး ဆိုတဲ့ စိတ်မျိုးပေါ့။ အဲဒီလို စိတ်မျိုး မရှိစေချင်ဘူး။ တောင်းနေတဲ့သူတွေက လက်ရှိ ကုန်ဈေးနှုန်းနဲ့ အားလုံး အဆင်ပြေစေမယ့် လမ်းကြောင်းမျိုးကို ရွေးပြီးတော့ တောင်းနေတဲ့အချိန်မှာ ညီညွတ်မှုကို ပြသဖို့လိုတယ်” လို့ သူက ပြောပါတယ်။
ပြီးခဲ့တဲ့ မေ ၁၄ ရက်နေ့ကလည်း ရန်ကုန်မြို့ လှိုင်သာယာမြို့နယ်၊ အပြင်ပဒံရပ်ကွက်အနီး၊ အနော်ရထာစက်မှုဇုန် အပိုင်း (၂) မှာ ဖွင့်လှစ်ထားတဲ့ ချန်းရိ (Tsang Yih) ဖိနပ်စက်ရုံက အလုပ်သမား ၆၀၀၀ ကျော် လုပ်ခလစာ တိုးမြှင့်ပေးဖို့ ခုနစ်ရက်ကြာ တောင်းဆိုမှု ပြုလုပ်ခဲ့တာမှာ အဆင်ပြေမှု ရရှိခဲ့ပါတယ်။
ဒါအပြင် အဲဒီ မေလအတွင်းမှာပဲ ပဲခူးတိုင်း၊ သာယာဝတီမြို့နယ်မှာ ဖွင့်လှစ်ထားတဲ့ ဂုံမင်းမြောင်ဟွာရှိန် အထည်ချုပ်စက်ရုံ၊ ရန်ကုန်တိုင်း၊ ရွှေပြည်သာမြို့နယ်၊ သာဓုကန်စက်မှုဇုန်က Bontech Manufacturing Garment ကုမ္ပဏီလီမိတက်နဲ့ ရွှေပြည်သာ၊ ဝါးတရာစက်မှုဇုန်ထဲက GTIG အထည်ချုပ်စက်ရုံ ငါးရုံရဲ့ လုပ်ခ အခြေခံနှုန်းထား တပြေးညီ သတ်မှတ်ရေး တောင်းဆိုမှုတွေလည်း ပြေလည်မှု ရရှိခဲ့တယ်လို့ သိရပါတယ်။
Photo - STUM
