#နိုင်ငံတကာသတင်း
◼နယ်မြေများ စွန့်လွှတ်ရန်နှင့်စစ်အင်အားချုံ့ရန်ယူကရိန်းအားရုရှားတောင်းဆို
ယူကရိန်းက ကြီးမားသောနယ်မြေအသစ်များကို စွန့်လွှတ်ပြီး စစ်တပ်အင်အားအ‌ပေါ် ကန့်သတ်ချက်များအား လက် ခံမှသာ စစ်ပွဲကို အဆုံးသတ်ရန် မော်စကိုက သဘောတူမည်ဟု အစ္စတန်ဘူလ်ငြိမ်းချမ်းရေးဆွေးနွေးပွဲ၌ ရုရှားက ယူကရိန်းအားပြောကြားခဲ့ကြောင်း ရုရှားမီဒီယာများက ဖော်ပြခဲ့ကြသည့် စာချွှန်လွှာအရ သိရသည်။
ယင်းသတ်မှတ်ချက်များအား အစ္စတန်ဘူလ်မြို့ ဆွေးနွေးပွဲများတွင် တရားဝင် တင်ပြခဲ့ခြင်းဖြစ်ကြောင်း နှင့် ယူကရိန်းမှ သွေးမြေကျမှုများကို အဆုံးသတ်ရန် အမေရိကန်သမ္မတ ဒေါ်နယ်ထရန့်၏ တောင်းဆိုမှုများ ရှိနေလင့်ကစား ရုရှားက စစ်ပွဲအပေါ်၎င်းတို့၏ ကာလရှည်ရည်မှန်းချက်များအား အလျှော့အတင်း လုပ်ရန် ငြင်းဆန်နေမှုကို မီးမောင်းထိုးပြကြောင်း ရိုက်တာသတင်းက ဖော်ပြသည်။
ရုရှားတို့၏သတ်မှတ်ချက်များမှာ လက်နက်ချ အညံ့ခံခိုင်းသည့် သဘောဖြစ်ကြောင်း ပြောကြားပြီး ယူကရိန်းက အကြိမ်ကြိမ်ပယ်ချခဲ့သည်။
၂၀၂၂ ခုနှစ် မတ်လ နောက်ပိုင်းကတည်း က ဒုတိယအကြိမ်မြောက်သာဖြစ်သော နှစ်ဖက် တိုက်ရိုက်တွေ့ဆုံမှုအတွင်း ကိုယ်စားလှယ်များက တစ်နာရီခန့်သာ မျက်နှာချင်းဆိုင်ခဲ့ကြကာ အသက်အငယ်ဆုံးနှင့်ဒဏ်ရာအပြင်းထန်ဆုံးလူများကို အဓိကထား၍ အကျဉ်းသားလဲလှယ်ကြရန် နှင့် သေဆုံးခဲ့သောတပ်ဖွဲ့ဝင် ၁၂၀၀၀ ၏ အလောင်းများကို ပြန်ပေးကြရန် သဘောတူခဲ့ကြသည်။
ယင်းမှာ ကြီးကျယ်သော အစည်းအဝေးဖြစ်ကြောင်း နှင့် ရုရှားသမ္မတပူတင် ၊ ယူကရိန်းသမ္မတ ဇီလန်စကီး တို့အား အမေရိကန်သမ္မတ ဒေါ်နယ်ထရန့် နှင့် တူရကီနိုင်ငံ၌ တွေ့ဆုံပေးရန် မျှော်လင့်ထားကြောင်း တူရကီသမ္မတ တေရစ်အာဒိုဂန် က ပြောကြားသည်။
သို့ရာတွင် ယူကရိန်း၊ ၎င်း၏ ဥရောပမဟာမိတ်များနှင့် အမေရိကန်တို့အားလုံးက ရုရှားအား လက်ခံရန် တိုက်တွန်းနေသော အဆိုပြုထားသည့်အပစ်အခတ်ရပ်စဲရေး နှင့် ပတ်သက်၍မူ လမ်းပွင့်သွားခြင်း မရှိခဲ့ပေ။
စစ်ပွဲ ခေတ္တရပ်တန့်ရေးမဟုတ်ဘဲ ရေရှည်ဖြေရှင်းချက်ကိုသာ အလိုရှိကြောင်း ရုရှားက ပြောကြားထားပြီး ပူတင်က ငြိမ်းချမ်းရေးလုပ်ဖို့ကို စိတ်မဝင်စားကြောင်း ကိဗ်က ဆိုသည်။ နှစ်ဖက်စလုံးက သဘောတူညီချက်ရရေးဆီသို့ တိုးတက်မှုမပြခဲ့ပါက ကြားဝင်စေ့စပ်ရန် ကြိုးပမ်းမှုများမှ အမေရိကန်နောက်ဆုတ်သွားနိုင်ကြောင်း ဒေါ်နယ်ထရန့်က ပြောကြားခဲ့သည်။
ရုရှားတို့တင်ပြခဲ့သော အစီအစဉ်ကို ပြန်လည်သုံးသပ်သွားမည်ဖြစ်ကြောင်း ယူကရိန်းကိုယ်စားလှယ်အဖွဲ့ကို ဦးဆောင်ခဲ့သည့် ကာကွယ်‌ရေးဝန်ကြီး ရပ်စတမ်အူမီရော့ဗ် က ပြောကြားသည်။
ရုရှားတို့၏ အစီအစဉ်နှင့်ပတ်သက်၍ ၎င်းက ချက်ချင်းမှတ်ချက်မပေးခဲ့ဘဲ ပူတင်နှင့် ဇီလန်စကီး တို့ တွေ့ဆုံကြမှသာလျှင် အချေအတင်ဖြစ်နေသောပြဿနာများကို ဖြေရှင်းနိုင်မည်ထင်ကြောင်း အူမီရော့ဗ် က ၎င်း၏အမြင်ကို ပြောကြားသည်။
သတင်း-ရဲမင်း
ကိုးကား-Reuters