#နိုင်ငံတကာသတင်း
◼စစ်အုပ်ချုပ်ရေးအရှုပ်တော်ပုံ အပြီး သမ္မတရွေးကောက်ပွဲတွင် တောင်ကိုရီးယားနိုင်ငံသားများ မဲပေး
သမ္မတဟောင်း ယွန်းဆွတ်ယိုး၏ စစ်အုပ်ချုပ်ရေးပြဌာန်းရန်ကြိုးစားမှုအတွက် တာဝန်ရှိသူများအား ဒဏ်ခတ်ရန် စိတ်အားထက်သန်နေသော လစ်ဘရယ်ကိုယ်စားလှယ် နှင့် ပြိုင်ဘက်၏ ဆင်ခြင်တုံတရားမဲ့မှုကို ရပ်တန့်ရန်ကြိုးစားနေသော ကွန်ဆာဗေးတစ် တို့ အကြား ယှဉ်ပြိုင်မှုတွင် တောင်ကိုရီးယားနိုင်ငံသားများက သမ္မတသစ်တစ်ဦး ရွေးချယ်ရန် မဲပေးနေကြသည်။
သမ္မတဟောင်း ယွန်းဆွတ်ယိုးက မထင်မှတ်ဘဲ စစ်အုပ်ချုပ်ရေးကြေညာကာ နိုင်ငံအား ဆယ်စုနှစ်များစွာအတွင်း အဆိုးရွားဆုံး နိုင်ငံရေး နှင့် စီးပွားရေးအကျပ်အတည်းအတွင်း ကျဆင်းသွားစေခဲ့ပြီးနောက် ခြောက်လတိတိ ကြာမြင့်ချိန်တွင် ရွေးကောက်ပွဲ ထွက်ပေါ်လာခြင်းဖြစ်သည်။
မဲပေးမှုစတင်ပြီးနောက် ခုနှစ်နာရီအကြာ မွန်းလွဲ ၁ နာရီတွင် နိုင်ငံတစ်ဝှမ်း မဲရုံပေါင်း ၁၄၂၉၅ တွင် မဲပေးပိုင်ခွင့်ရှိသူ ၄၄ ဒသမ ၃၉ သန်းအနက် လူပေါင်း ၂၇ ဒသမ ၅၆ သန်း မဲပေးခဲ့ကြပြီးဖြစ်ကြောင်း အမျိုးသားရွေးကောက်ပွဲကော်မရှင်(NEC) က ပြောကြားသည်။
ရှောင်တစ်ခင်ရွေးကောက်ပွဲ အပေါ် စိတ်ဝင်စားမှုမြင့်တက်မှုနှင့်အတူ မှတ်ပုံတင်ထားသော မဲဆန္ဒရှင်များ၏ ၃၄ ဒသမ ၇၄ ရာခိုင်နှုန်း က ပြီးခဲ့သည့်ကြာသပတေးနှင့် သေကြာနေ့က ပြုလုပ်ခဲ့သည့် ကြိုတင်မဲစနစ်တွင် မဲပေးခဲ့ကြပြီးဖြစ်ကြောင်း သိရပြီး ၂၀၁၄ ခုနှစ်က ကြိုတင်မဲစနစ် စတင်ခဲ့ပြီးနောက်ပိုင်း ဒုတိယအများဆုံး ပမာဏဖြစ်သည်။
လစ်ဘရယ်ဒီမိုကရက်တစ်ပါတီကိုယ်စားလှယ် လီဂျေးမြောင် က ယွန်းဆွတ်ယိုးဦးဆောင်သော ပုန်ကန်မှုအင်အားစုများကို ကျော်လွှားသွားမည်ဟူသော ကတိဖြင့်မဲဆွယ်စည်းရုံးခဲ့သည်။
ကွန်ဆာဗေးတစ်ပြည်သူ့အင်အားပါတီ ကိုယ်စားလှယ် ကင်မွန်ဆူး က လီဂျေမြောင် လက်ရှိရင်ဆိုင်နေရသောအမှုများနှင့် တွန်းတွန်းတိုက်တိုက်ခေါင်းဆောင်မှု ပုံစံကို ပစ်မှတ်ထားပြီး အာဏာရှင်များ ကင်းလွတ်သည့် အနာဂတ်အတွက် ကတိပြုမဲဆွယ်ခဲ့သည်။
သမ္မတရွေးကောက်ပွဲ အဓိကယှဉ်ပြိုင်သူ နှစ်ဦး က ကြိုတင်မဲပေးရက်များတွင် မဲပေးခဲ့ကြသော်လည်း အခြားနိုင်ငံရေးသမားများက ရွေးကောက်ပွဲနေ့တွင် မဲပေးခဲ့ပြီး သမ္မတဟောင်း ယွန်းဆွတ်ယိုးလ်က ဆိုးလ်မြို့တောင်ပိုင်းမဲရုံတစ်ခုတွင် မဲပေးခဲ့သည်။
ည ၈ နာရီတွင် မဲပေးခြင်းပြီးဆုံးပြီးနောက် မကြာမီ မဲရေတွက်မှု စတင်မည်ဖြစ်ကာ သန်းခေါင်းယံတွင် အနိုင်ရသူထွက်ပေါ်လာမည်ဟု မျှော်လင့်ရကာ နောက်တစ်နေ့ နံနက် ၆ နာရီခန့်တွင် မဲရေတွက်မှု ပြီးဆုံးမည်ဟု ရွေးကောက်ပွဲကော်မရှင်က ပြောသည်။
ယင်းနောက် နံနက် ၇ နာရီ နှင့် ၉ နာရီကြားတွင် ရွေးကောက်ပွဲရလဒ်အားတရားဝင် အတည်ပြုရန် ကော်မရှင်က အစည်းအဝေးခေါ်ယူမည်ဖြစ်သည်။
သမ္မတသစ်သည် ရွေးကောက်ပွဲ အနိုင်ရပြီး နာရီပိုင်းအတွင်းမှာပင် လွှတ်တော်၌ သမ္မတအဖြစ် က ကျမ်းသစ္စာကျိန်ဆိုကာ ကြားကာလမရှိဘဲ တစ်ခါတည်း တာဝန်ယူမည်ဖြစ်ကြောင်း သိရသည်။
သတင်း-ရဲမင်း
ကိုးကား-Yonhap
