#နိုင်ငံတကာသတင်း
◼ နယ်သာလန်စက်မှုလုပ်ငန်းများအပေါ် တရုတ်သူလျှိုလုပ်မှု ပြင်းထန်လာကြောင်း ကာကွယ်ရေးဝန်ကြီးပြော
နယ်သာလန်အပေါ် လျှို့ဝှက်ထောက်လှမ်းရန် တရုတ်၏ ကြိုးပမ်းမှုများ ပိုမိုပြင်းထန်လာကြောင်း နှင့် အဓိကအားဖြင့်တစ်ပိုင်းလျှပ်ကူးလုပ်ငန်းကို ပစ်မှတ်ထားနေကြောင်း နယ်သာလန်ကာကွယ်‌ရေးဝန်ကြီး ရူဘင်ဘရီကယ်မန်းစ် က ယမန်နေ့တွင် ပြောကြားသည်။
“ကျွန်တော်တို့က နည်းပညာအရရှေ့ရောက်နေတဲ့ဲ့ဒါမှမဟုတ်လည်း အဆင့်မြင့်နေတဲ့ တစ်ပိုင်းလျှပ်ကူးပစ္စည်းလုပ်ငန်းကဉာဏပစ္စည်းကိုရရှိဖို့ဆိုတာတရုတ်တို့အတွက်စိတ်ဝင်စားစရာကောင်းတာပေါ့။” ဟု စင်ကာပူတွင် ကျင်းပနေသော ရှန်ဂရီလာ ဖိုရမ် လုံခြုံရေးအစည်းအဝေးပြင်ပ တွေ့ဆုံမေးမြန်းမှု တစ်ခုတွင် နယ်သာလန် ကာကွယ်ရေးဝန်ကြီးက ပြောသည်။
တရုတ်နိုင်ငံ၏ လက်နက်ကိုင်တပ်ဖွဲ့များအား အင်အားတောင့်တင်းရန်လာစေရေး ကြိုးပမ်းရာတွင် တရုတ် သူလျှိုများကနယ်သာလန်တစ်ပိုင်းလျှပ်ကူးပစ္စည်းလုပ်ငန်း၊အာကာသနှင့်ရေကြောင်းဆိုင်ရာစက်မှုလုပ်ငန်းများအားပစ် မှတ်ထားနေကြကြောင်း ပြီးခဲ့သည့် ဧပြီလက ထုတ်ပြန်ခဲ့သော နှစ်စဉ် အစီရင်ခံစာတွင် နယ်သာလန်စစ်ဘက်ထောက်လှမ်းရေးအေဂျင်စီ က ပြောကြားသည်။
သူလျှိုလုပ်ခြင်းရပ်တန့်သွားပြီလားဟု မေးမြန်းခံရချိန်တွင် “ ဒါ ဆက်ပြီးဖြစ်နေပါတယ်။ ကျွန်တော်တို့ရဲ့ နောက်ဆုံးထောက်လှမ်းရေးအစီရင်ခံစာမှာ အကြီးမားဆုံး ဆိုက်ဘာခြိမ်းခြောက်မှုက တရုတ်ဆီက လာတယ်လို့ ထောက်လှမ်းရေး အဖွဲ့ က ပြောထားပြီး တကယ်တမ်းလည်း ကျွန်တော်တို့နဲ့ပတ်သက်တဲ့ ဆိုက်ဘာ လှုပ်ရှားမှုတွေက တရုတ်ဆီက လာတာကို မြင်တွေ့နေရပါတယ်။ပြီးခဲ့တဲ့ နှစ်ကလည်း ဒီအတိုင်းပဲ၊ အခုလည်း ဒီတိုင်းပဲ၊ ဆိုတော့ ပိုပြီးပြင်းထန်လာတာကိုပဲ တွေ့ရပါတယ်” ဟု နယ်သာလန်ကာကွယ်‌‌ရေးဝန်ကြီး ဘရီကယ်မန်းစ် က ပြောသည်။
ယင်းနှင့်ပတ်သက်၍ မှတ်ချက်ပေးရန် တောင်းဆိုမှုကို တရုတ်နိုင်ငံခြားရေးဝန်ကြီးဌာနက ချက်ခြင်းမတုံ့ပြန်ခဲ့ကြောင်း ရိုက်တာသတင်းက ဖော်ပြသည်။
ဆိုက်ဘာသူလျှိုလုပ်သည်ဆိုသော စွပ်စွဲချက်များကို တရုတ်က ပုံမှန်ငြင်းဆိုလေ့ရှိကာ ၎င်းတို့အနေဖြင့် ဆိုက်ဘာတိုက်ခိုက်မှုပုံစံမျိုးစုံကို ဆန့်ကျင်ကြောင်း ပြောကြားလေ့ရှိသည်။
တရုတ်အစိုးရထောက်ခံသော ဆိုက်ဘာသူလျှိုများက ၂၀၂၃ ခုနှစ်တွင် နယ်သာလန် စစ်ရေးကွန်ပျူတာကွန်ရက်ထဲသို့ ဝင်ရောက်ခဲ့ကြကြောင်း ပြောကြားပြီး တရုတ်ကို ဆိုက်ဘာသူလျှိုလုပ်မှုဖြင့် နယ်သာလန် ထောက်လှမ်း‌‌ရေး အေဂျင်စီများက လူသိရှင်ကြား ပထမဆုံးအကြိမ် ထုတ်ပြောခဲ့ကြသည်။
တရုတ်က ၎င်းတို့၏ စီးပွားရေးအနေအထားကို ပထဝီဝင်နိုင်ငံရေးအတွက် အသုံးချခြင်းသာမကာ မိမိတို့အား ဖိအားပေးရေးအတွက်ပါ အသုံးချနေသဖြင့် နယ်သာလန်အတွက် လုံခြုံရေးကိစ္စက ပို၍အရေးပါလာကြောင်းလည်း ဘရီကယ်မန်းစ် က ဆက်လက်ပြောသည်။
ယင်းအတွက် နယ်သာလန်သာမက ဥရောပသမဂ္ဂတစ်ခုလုံးအနေနဲ့ပါ အရေးကြီးသော ကုန်ကြမ်းပစ္စည်းများအတွက် တရုတ်အပေါ်မှီခိုနေကြရမှုများကို လျှော့ချသွားရမည်ဖြစ်ကြောင်း ၎င်းက ဆက်လက်ပြောသည်။
သတင်း-ရဲမင်း
ကိုးကား-Reuters