#နိုင်ငံတကာသတင်း
◼ အမေရိကန်က အီရန်ထံ နျူကလီးယားသဘောတူညီချက်အဆိုပြုချက်ပေးပို့
တီဟီရန်နှင့်ဝါရှင်တန်ကြား နျူကလီးယားသဘောတူညီချက်ရယူရေးအတွက် အဆိုပြုချက် တစ်ရပ်ကို အမေရိကန်က အီရန်ထံပေးပို့လိုက်ကြောင်း အိမ်ဖြူတော်ကယမန်နေ့တွင် အတည်ပြုပြောကြားသည်။
အိုမန်နိုင်ငံခြားရေး ဝန်ကြီး ဘာဒါအယ်လ်ဆေဒီ က အီရန်မြို့တော်သို့ ခေတ္တလာရောက်၍ အမေရိကန်သဘောတူညီချက် အစိတ်အပိုင်းများအား မိမိထံ ပေးအပ်ခဲ့ကြောင်း အီရန် နိုင်ငံခြားရေးဝန်ကြီး အာဘက်စ်အရက်ချီကလည်း ပြောကြားသည်။
အီရန် က အဆင့်မြှင့်သန့်စင်ထားသော ယူရေနီယမ်များကို တိုးမြှင့်ထုတ်လုပ်နေကြောင်း ကုလသမဂ္ဂ၏ နျူကလီးယားစောင့်ကြည့်ရေးအဖွဲ့၏ အစီရင်ခံစာထွက်လာပြီးနောက် အထက်ပါ ပြောဆိုမှုများ ထွက်ပေါ်လာခြင်းဖြစ်သည်။
ယူရေနီယံသည် နျူကလီးယားလက်နက်များ ထုတ်လုပ်ရာတွင် အဓိကအစိတ်အပိုင်းတစ်ခုဖြစ်သည်။
သဘောတူညီချက်အား လက်ခံလိုက်ခြင်းက အီရန်အတွက် အကောင်းဆုံးအကျိုးစီးပွား ဖြစ်နိုင်ကြောင်း အိမ်ဖြူတော်ပြန်ကြားရေးမှူး ကာရိုလင်းလီဗစ် က ပြောကြားပြီး အီရန်က နျူကလီးယားဗုံးတစ်လုံး ဘယ်တော့မှ မပိုင်ဆိုင်စေရ ဟူ၍ သမ္မတ ထရန့်က ရှင်းလင်းစွာ ပြောထားပြီးဖြစ်ကြောင်း ၎င်းက ဆက်ပြောသည်။
အသေးစိတ်ရေးဆွဲထားသော လက်သင့်ခံနိုင်ဖွယ်ရာ အဆိုပြုချက်အား သမ္မတ ဒေါ်နယ်ထရန့်၏ အထူးကိုယ်စားလှယ် စတိဗ်ဝစ်ကော့ဗ် က အီရန်တို့ထံ ပေးပို့လိုက်သည်ဟု မစ္စက်လီဗစ် က ဆိုသည်။
အီရန်ပြည်သူလူထု၏ အခွင့်အရေးများ ၊ အမျိုးသားအကျိုးစီးပွား၊ အခြေခံမူများနှင့်အညီ အမေရိကန်အဆိုပြုချက်ကို သင်တင့်လျောက်ပတ်စွာ တုံ့ပြန်သွားမည်ဖြစ်ကြောင်း အီရန်နိုင်ငံခြားရေးဝန်ကြီး အရက်ချီက x ဆိုရှယ်မီဒီယာတွင် ရေးသားခဲ့သည်။
အဆိုပြုချက်နှင့်ပတ်သက်သော အသေးစိတ် အချက်အလက်များ ရှင်းလင်းစွာ ထွက်ပေါ်မလာသေးကြောင်း ဘီဘီစီသတင်းက ဖော်ပြသည်။
လက်နက်ထုတ်လုပ်နိုင်သော သန့်စင်မှုအဆင့်ဖြစ်သည့် ၉၀ ရာခိုင်နှုန်း နီးကပ်လာပြီဖြစ်သော ၆၀ ရာခိုင်နှုန်းအထိ သန့်စင်ထားသည့်ယူရေနီယံ ၄၀၀ ကီလိုဂရမ်ကို အီရန်က ပိုင်ဆိုင်ထားပြီဖြစ်ကြောင်း နိုင်ငံတကာအဏုမြူစွမ်းအင်အေဂျင်စီ (IAEA) က အစီရင်ခံစာ ထုတ်ပြန်ခဲ့ပြီးနောက် အမေရိကန်၏ အဆိုပြုချက် ထွက်ပေါ်လာခဲ့ခြင်း ဖြစ်သည်။
ယင်းကို ထပ်မံ သန့်စင်လိုက်ပါက နျူကလီးယားလက်နက် ဆယ်ခုစာ အတွက် လုံလောက်ကြောင်း နှင့် အီရန်သည်လည်း ယူရေနီယံကို ယင်းအဆင့်အထိ သန့်စင်သည့် နျူလက်နက်မပိုင်သေးသည့် တစ်ခုတည်းသော နိုင်ငံဖြစ်လာခဲ့ကြောင်း ဘီဘီစီ သတင်းက ဆက်လက်ဖော်ပြသည်။
အီရန်၏ နျူကလီးယားစွမ်းဆောင်ရည်အား ကန့်သတ်ထားရန် အမေရိကန်က ကြာမြင့်စွာကပင် ကြိုစားနေခဲ့ပြီး ယင်း နှစ်နိုင်ငံကြား ဧပြီလကစတင်ခဲ့သော ဆွေးနွေးမှုများအား အိုမန် နိုင်ငံက ကြားဝင်ကူညီပေးနေသည်။
သံတမန်ရေးအရ သဘောတူညီချက် မရနိုင်ပါက အီရန်၏ နျူကလီးယားလုပ်ငန်းနေရာများကို ဗုံးကြဲသွားမည်ဟု ထရန့်က ယခင် က ခြိမ်းခြောက်ထားခဲ့သည်။
သတင်း-ရဲမင်း
ကိုးကား-BBC
