#နိုင်ငံတကာသတင်း
◼ ယူကရိန်းဒရုန်းစစ်ဆင်ရေးဖြင့်ရုရှား၏မဟာဗျုဟာမြောက်လေယာဉ်အစင်း ၄၀ ကျော်ကိုချေမှုန်းခဲ့ဟုဆို
ယူကရိန်းစစ်ထောက်လှမ်းအဖွဲ့ (SBU) ၏ အဓိကလျှို့ဝှက်စစ်ဆင်ရေးအဖြစ် ရုရှားပိုင်နက်အတွင်း ယမန်နေ့ည လုံးပေါက် ဒရုန်း တိုက်ခိုက်မှုတွင်ရုရှားစစ်လေယာဉ် အစင်း ၄၀ ကျော် ထိမှန်ပျက်စီးခဲ့ကြောင်းယူကရိန်းသတင်းဌာနများ၏ဖော်ပြချက်အရသိရသည်။
“Web” ဟုအမည်ပေးထားသည့် အထူးစစ်ဆင်ရေးသည် ရုရှားအဓိကလေတပ်အခြေစိုက်စခန်းများဖြစ်သည့် ဘယ်လာယာ၊ ဒီယာဂီလီဗို၊ အိုလန်ယာနှင့်အီဗန်နိုဗိုတို့ကို ပစ်မှတ်ထားတိုက်ခိုက်ခဲ့ကြောင်း SBU သတင်းရင်းမြစ်များက Kyiv Post သတင်းဌာနအား ပြောကြားသည်။
အဆိုပါတိုက်ခိုက်မှုများကြောင့် ယူကရိန်းမြို့များအား နေ့ စဉ် ဗုံးကြဲတိုက်ခိုက်ရာတွင် အသုံးပြုသည့် ရုရှား၏ တာဝေးပျံ Tu-95 နှင့် Tu-22M3 ဗုံးကြဲလေယာဉ်များအပြင်ဝေဟင်စစ်ဆင်ရေးကွပ်ကဲမှုလေယာဉ် A-50 ကဲ့သို့ မဟာဗျူဟာမြောက် လေယာဉ် ဒါဇင်ပေါင်းများစွာကို ပျက်စီးစေခဲ့ကြောင်းသိရသည်။
“ဒါက အလှည့်အပြောင်းတစ်ခုပါ၊ ကျွန်တော်တို့ရဲ့ဒရုန်းတွေကလက်ရှိမှာ ရန်သူ ရဲ့နောက် ကျောပိုင်းကျကျကိုရောက်ရှိနေပြီဖြစ်ပြီး၊ ကျွန်တော်တို့အရပ်သားတွေကို ဗုံးကြဲ နေတဲ့ လေယာဉ်တွေ လစ်သွားပါပြီ။ သူတို့ရဲ့လုပ်ပိုင်ခွင့်အဆုံး သတ်သွားပြီ။" ဟု SBU သတင်းရင်းမြစ်တစ်ဦးကပြောသည်။
Kyiv Post မှရရှိသော ဗီဒီယိုဖိုင်တွင်ရုရှားလေယာဉ်ကွင်းများစွာ၌ပေါက်ကွဲမှုများနှင့် မီးလောင်မှုများ ဖြစ်ပွားနေပုံရသည်။
သတင်းရင်းမြစ်တစ်ဦးကပေးပို့သောဗီဒီယိုဖိုင်တစ်ခုတွင် ဘယ်လာယာလေတပ်စခန်းမှ ကြီးမား သောမီးလောင်ကျွမ်းမှုအားမြင်တွေ့ရပြီးတိုက်ခိုက်မှုအောင်မြင်ခြင်းကိုရည်ညွှန်းသည့်ယူကရိန်းအွန်လိုင်းဗန်းစကား “ဘာဗိုးနား”(bavovna )ဟု SBU အကြီးအကဲ ဒုတိယဗိုလ်ချုပ်ကြီး ဗာဆီးလ်မာလီယက် အော်လိုက်သည်ဆိုသော အသံတစ်သံကို ကြားရသည်။
Kyiv Post ၏ SBU သတင်းရင်းမြစ်များက ပေးပို့သည့် နောက်ထပ်ဗီဒီယိုဖိုင်တွင်ဒရုန်းများကပြေးလမ်းပေါ်တွင် ရပ်ထားသည့် လေယာဉ်ကို တိုက်ခိုက်သည့်အခိုက်အတန့်ကိုမြင်တွေ့ရသည်။
သို့ရာတွင် အဆိုပါဗီဒီယိုဖိုင်မှာစစ်မှန်ခြင်းရှိ၊မရှိ သီးခြားအ တည်ပြုနိုင်ခြင်း မရှိသေးကြောင်း Kyiv Post ကဆိုသည်။
အဆိုပါ တိုက်ခိုက်မှုကြောင့် ရုရှား၏ ဗျူဟာမြောက် လေ ကြောင်းကဏ္ဍအတွင်း အမေရိကန်ဒေါ်လာ ၂ ဒသမ၂ ဘီလီယံကျော် ဆုံးရှုံးခဲ့ကြောင်း ကနဦးခန့်မှန်းချက်များအရ သိရသည်။
ထိုစစ်ဆင်ရေးကို တစ်နှစ်ခွဲကျော်ကြာ ကြိုတင်ပြင်ဆင်ထားပြီး ယူကရိန်းသမ္မတ ဗိုလိုဒီမာဇီလန်စကီးကိုယ်တိုင် ကြီးကြပ်ခဲ့ကြောင်းသတင်းရင်းမြစ်များက ဆိုသည်။
အဆိုပါစစ်ဆင်ရေးအား SBU အကြီးအကဲ ဒုတိယဗိုလ်ချုပ်ကြီး ဗာဆီးလ်မာလီယက်နှင့် ၎င်း၏တပ်ဖွဲ့မှ အဓိကဖော်ဆောင်ခြင်းဖြစ်သည်။
ယင်းသည်ယူကရိန်းစစ်ထောက်လှမ်းရေးအဖွဲ့၏ လက်ရှိအချိန်အထိရည်မှန်းချက်အအောင်မြင်ဆုံးဒရုန်း လှုပ်ရှားမှုများထဲမှ တစ်ခုဖြစ်ပြီး ယူကရိန်း၏ တာဝေးပစ်တိုက်ခိုက်မှုစွမ်းရည် သိသိသာသာ မြင့်တက်လာခြင်းလည်းဖြစ်သည်။
သတင်းရင်းမြစ်များ၏အဆိုအရ စစ်ဆင်ရေးအတွင်း ရှုပ် ထွေးနက်နဲသော ထောက်ပံ့ပို့ဆောင်ရေးများပါဝင်ပြီး FPV အသေခံဒရုန်းများကို ယူကရိန်းက ရုရှားပိုင်နက်ထဲသို့အရင်ဆုံးလျို့ဝှက်သွင်းခဲ့ကြောင်းဆိုသည်။
သတင်း- လင်းခေတ်
ကိုးကား- Kyiv Post