ထန်းတပင်၌ သုံးနှစ်အရွယ်ကလေးတစ်ဦးအား ရေနှစ်သတ်၍ ရွှေနားကွင်းလုယူမှုဖြစ်
ရန်ကုန်တိုင်း၊ ထန်းတပင်မြို့နယ်၌ အသက်(၃)နှစ်အရွယ်ကလေးတစ်ဦးအား ကိုယ်ဝန်ဆောင်အမျိုးသမီးဆိုသူမှရေနှစ်သတ်၍ ရွှေနားကွင်းလုယူမှုဖြစ်ပွားခဲ့ကြောင်း ကလေးရုပ်အလောင်းအားကူညီရှာဖွေပေးခဲ့သည့် ယာဉ်မောင်းမိသားစုလူငယ်ပရဟိတ လူမှုကူညီကယ်ဆယ်ရေးအသင်းထံမှ သိရသည်။
သေဆုံးသူကလေးမှာ အသက်(၃) နှစ်အရွယ်ရှိ မိန်းကလေးတစ်ဦးဖြစ်ပြီး ထန်းတပင်မြို့နယ်၊ ရခိုင်ရိုးကြီးကျေးရွာအုပ်စု၊ ရခိုင်ရိုးလေးကျေးရွာ၊ အောင်သပြေ (၄) လမ်းတွင် မိဘများနှင့်အတူနေထိုင်ကာ မွေးချင်းသုံးဦးအနက် အငယ်ဆုံးဖြစ်ကြောင်းသိရသည်။
၎င်းမှာ မေလ ၂၇ ရက်၊ ညနေပိုင်းတွင်နေအိမ်၌ ဆော့ကစားနေစဉ် အမည်မသိကိုယ်ဝန်ဆောင် အမျိုးသမီးတစ်ဦးခေါ်ဆောင်၍ ပျောက်ဆုံးခဲ့ခြင်းဖြစ်ကြောင်း၊ ယမန်နေ့(မေ ၂၈ ရက်) နံနက် ၇ နာရီ ၃၀ မိနစ်ခန့်တွင် လှိုင်သာယာမြို့နယ်ရှိ၊ ငွေပင်လယ်စက်မှုဇုန်အတွင်း၌ ရေနှစ်သေဆုံးနေသည့် အနေအထားဖြင့် ရှာဖွေတွေ့ရှိခဲ့ခြင်းဖြစ်ကြောင်း အဆိုပါအသင်းမှ တာဝန်ရှိသူတစ်ဦးကပြောသည်။
“ဖြစ်စဉ်က အဲဒီအမျိုးသမီးကကိုယ်ဝန်ဆောင်သည်ဗျ။ သူတို့အိမ်ရဲ့တံစက်မြိတ်မှာမိုးခဏလာခိုတာ။ ကိုယ်ဝန်ဆောင်သည်မိုးခိုတာဆိုတော့ သူတို့ကလည်း မပြောတော့ဘူးပေါ့။ ကလေးကလည်း အဲဒီမှာဆော့နေတာ။ မိုးလည်းတိတ်ရော ကိုယ်ဝန်ဆောင်သည်ရော၊ ကလေးကိုပါမတွေ့တော့တာ။ ချက်ချင်းလိုက်ရှာတယ်။ ရပ်ကျေးကိုလည်းသတင်းပေးတိုင်တန်းတယ်။ လိုက်ရှာတာရှာမတွေ့ခဲ့ဘူး။ မနေ့ကမနက်ပိုင်း ၇ နာရီခွဲဝန်းကျင်လောက်မှာ လှိုင်သာယာ၊ ငွေပင်လယ်စက်မှုဇုန်ထဲမှာ ကလေးတစ်ယောက် ရေနှစ်ထားတဲ့ပုံစံတွေ့တယ်ဆိုပြီး သတင်းပေးလို့ ကျွန်တော်တို့ရောက်သွားတယ်။ ရောက်တဲ့အချိန်မှာ ကလေးအနေအထားက မနေ့ကတိုင်ထားတဲ့ကလေးဖြစ်ကြောင်း မိဘတွေကိုပုံပြပြီး အတည်ပြုလိုက်တော့ သူတို့သမီးမှန်ကန်တယ်ပေါ့။ ကလေးမှာက နားကွင်းတစ်ရံပါတယ်။ နားကွင်းကို ချွတ်ယူတဲ့ပုံစံမဟုတ်ဘူး။ ဆောင့်ဆွဲပြီးဖြတ်သွားတာ။ နားနှစ်ဖက်မှာ သွေးတွေတောင်မတိတ်သေးဘူး။ အဓိက နားကပ်လိုချင်လို့ လုပ်သွားတာ။ အမှုကတော့ လှိုင်သာယာစခန်းမှာပဲ သေမှုသေခင်းဖွင့်ထားတယ်” ဟု ၎င်းကပြောသည်။
လက်ရှိတွင် အဆိုပါကိုယ်ဝန်ဆောင်အမျိုးသမီးအား ဖမ်းဆီးနိုင်ခြင်းမရှိသေကြောင်း သိရသည်။
သတင်း - အင်ကြင်း
ဓာတ်ပုံ - ယာဉ်မောင်းမိသားစု လူငယ်ပရဟိတလူမှုကူညီကယ်ဆယ်ရေးအသင်း
