ရန်ကုန်တိုင်းအတွင်း ကိုဗစ်လူနာသစ် ၆ ဦး ထပ်တွေ့
ရန်ကုန်တိုင်းဒေသကြီးအတွင်း ကိုဗစ်-၁၉ ဓာတ်ခွဲအတည်ပြုလူနာသစ် (၆) ဦး ထပ်မံ တွေ့ရှိရကြောင်း ကျန်းမာရေးဝန်ကြီးဌာန (MOH) ရဲ့ မေလ ၂၇ ရက်၊ နံနက် ၈ နာရီ ထုတ်ပြန်ချက်မှာ ဖော်ပြထားပါတယ်။
မေလ ၁၈ ရက်မှ ၂၅ ရက်နေ့အထိ ရက်သတ္တပတ်အတွင်း ဓာတ်ခွဲနမူနာစုစုပေါင်း (၂၇၅၄) ခုကို စစ်ဆေးပြီးစီးခဲ့ရာ အဆိုပါ ပိုးတွေ့အတည်ပြုလူနာသစ် (၆) ဦးကို တွေ့ရှိခဲ့တာလည်း ဖြစ်ပါတယ်။
MOH ရဲ့ ထုတ်ပြန်ချက်အရ ဒဂုံမြို့နယ်မှာ (၂) ဦး၊ အင်းစိန်မြို့နယ်မှာ (၁) ဦး၊ သာကေတမြို့နယ်မှာ (၁) ဦး၊ ကော့မှူးမြို့နယ်မှာ (၁) ဦးနဲ့ ဒဂုံမြို့သစ် (အရှေ့ပိုင်း) မှာ (၁) ဦး တွေ့ရှိခဲ့တယ်လို့ သိရပါတယ်။
အစီရင်ခံကာလအတွင်း ရောဂါပိုးတွေ့ရှိမှု ရာခိုင်နှုန်းမှာ (ဝ.၂၂) ရာခိုင်နှုန်းဖြစ်ပြီး ပြင်းထန်လူနာ၊ အထူးကြပ်မတ်ကုသမှုပေးရတဲ့ လူနာနဲ့ ကိုဗစ်-၁၉ ရောဂါနဲ့ သေဆုံးလူနာမရှိကြောင်း ထုတ်ပြန်ထားပါတယ်။
ယခုရက်သတ္တပတ်မှာ ကိုဗစ်-၁၉ ရောဂါ ကူးစက်ဖြစ်ပွားမှုနှုန်း အနည်းငယ် မြင့်တက်လာကြောင်း နစက ကျန်းမာရေးဝန်ကြီး ဒေါက်တာသက်ခိုင်ဝင်းက မေလ ၂၃ ရက်နေ့မှာ ပြုလုပ်ခဲ့တဲ့ ရာသီတုပ်ကွေးရောဂါနဲ့ ကိုဗစ်-၁၉ ရောဂါ ကာကွယ်ထိန်းချုပ်ရေး လုပ်ငန်းညှိနှိုင်းအစည်းအဝေးမှာ ပြောကြားခဲ့ပါတယ်။
ပြင်းထန်လူနာနဲ့ အထူးကြပ်မတ် ကုသမှုပေးရတဲ့ လူနာတွေမရှိခြင်း၊ သေဆုံးမှုမရှိခြင်းတို့ကြောင့် စိုးရိမ်ဖွယ်ရာမရှိဘူးလို့ ဆိုပါတယ်။
ယခုအထိ တွေ့ရှိရတဲ့ ဗီဇပြောင်းပိုးတွေဟာ ကမ္ဘာ့နိုင်ငံတွေမှာလည်း ကူးစက်လျက်ရှိပြီး ပြင်းထန်မှုမရှိတဲ့ မျိုးကွဲတွေဖြစ်တာကြောင့် လက်ရှိထိုးနှံပေးနေတဲ့ ရောဂါကာကွယ်ဆေးတွေနဲ့ ထိရောက်စွာ ကာကွယ်နိုင်တယ်လို့ သိရပါတယ်။
ကျန်းမာရေးဝန်ကြီးဌာနအနေနဲ့ လေဆိပ်၊ ဆိပ်ကမ်းနဲ့ နယ်စပ်ဂိတ်တွေမှာ ရောဂါစောင့်ကြပ်ကြည့်ရှုခြင်း၊ သံသယလက္ခဏာရှိသူတွေ ဓာတ်ခွဲစစ်ဆေးခြင်း၊ မျိုးရိုးဗီဇပြောင်းလဲမှု စစ်ဆေးခြင်းနဲ့ ကာကွယ်ဆေးထိုးနှံပေးခြင်းတွေ ဆောင်ရွက်လျက်ရှိတယ်လို့ ထုတ်ပြန်ထားပါတယ်။
