ဒေါ်နယ်ထရန့်ရဲ့ ရွှေကွန်ချာ ဒုံးကျည်အစီအစဉ် အာကာသမှာ နျူကလီးယားစစ်ပွဲ ဖြစ်လာနိုင်ကြောင်း မြောက်ကိုရီးယား သတိပေး
အမေရိကန်သမ္မတ ဒေါ်နယ်ထရန့်ရဲ့ ရွှေ့ကွန်ချာ ဒုံးကျည်အစီအစဉ်ဟာ အာကာသအတွင်း နျူကလီးယားစစ်ပွဲ ဖြစ်ပွားနိုင်တဲ့ အန္တရာယ်ရှိတဲ့ ခြိမ်းခြောက်မှုတခုဖြစ်ကြောင်း မြောက်ကိုရီးယားက မေ ၂၇ ရက်မှာ သတိပေးပြောကြားလိုက်ပါတယ်။
ဒါဟာ နျူကလီးယားပိုင်ဆို်ငတဲ့နိုင်ငံတွေရဲ့ မဟာဗျူဟာမြောက်လုံခြုံရေးကို ထိခိုက်လာနိုင်တဲ့ အလွန်အန္တရာယ်များတဲ့ လုပ်ရပ်လို့ မြောက်ကိုရီးယား နိုင်ငံခြားရေးဝန်ကြီးဌာနက ရှုတ်ချကြောင်း နိုင်ငံပိုင် သတင်းဌာနက ဖော်ပြထားပါတယ်။
ဒီလိုနိုင်ငံတွေရဲ့ စိုးရိမ်မှုနဲ့ အာကာသမှာ အလားအလာရှိတဲ့နျူကလီးယားစစ်မြေပြင်ဖြစ်လာရေး နှိုးဆွမယ့် ဒီအစီအစဉ်ဟာ ကမ္ဘာလုံးဆိုင်ရာ နျူကလီးယားနဲ့ အာကာသလက်နက် အားပြိုင်ပွဲဖြစ်ပွားလာစေတဲ့ ရေသောက်မြစ်ဖြစ်လာမယ်လို့ ပြောပါတယ်။
ရွှေကွန်ချာ ဒုံးကျည်ကာကွယ်ရေးစနစ်အတွက် အသေးစိတ်အချက်အလက်တွေနဲ့ ကနဦးရန်ပုံငွေကို ဒေါ်နယ်ထရန့်က ပြီးခဲ့တဲ့ သီတင်းပတ်မှာ ကြေညာခဲ့ပြီး အမေရိကန်နိုင်ငံရဲ့ အောင်မြင်မှုနဲ့ ရှင်သန်ရပ်တည်ရေးအတွက် အလွန်အရေးကြီးတယ်လို့ ပြောပါတယ်။
ဒီစနစ်အတွက် ကနဦးရန်ပုံငွေ ဒေါ်လာ ၂၅ ဘီလီယံရှိပြီး စုစုပေါင်းကုန်ကျစရိတ် ဒေါ်လာ ၁၇၅ ဘီလီယံထိရှိလာနိုင်တယ်လို့ တာဝန်ရှိသူတွေက ပြောပါတယ်။ အကဲခတ်တွေကတော့ ဒီထက် သုံးဆ ကုန်နိုင်တယ်လို့ သုံးသပ်ပါတယ်။
စနစ်ဟာ မြေပြင်၊ ရေပြင်နဲ့ အာကာသတို့ကို ချိတ်ဆက်နိုင်တဲ့ မျိုးဆက်သစ်ကွန်ရက်စနစ်တွေ ပါဝင်ပြီး နည်းပညာနဲ့ နိုင်ငံရေးဆိုင်ရာ စိန်ခေါ်မှုတွေနဲ့လည်း ရင်ဆိုင်ရနိုင်တယ်လို့ စောင့်ကြည့်လေ့လာသူတွေကပြောပါတယ်။
