ရှမ်းတောင်မှာ.ဂေါ်ဖီထုပ်စျေး ၂၀၀ ကျပ်သာရှိလို့တောင်သူတွေ သိန်းရာနဲ့ချီ အရှုံးပေါ်နေ
မေ - ၂၈ ၊ ၂၀၂၅
KC (VOM)
ရှမ်းတောင်မှာ ဂေါ်ဖီထုတ်ဝယ်လိုအား မရှိတဲ့အပြင် ဂေါ်ဖီထုတ်တထုတ်ကို ၁၀၀ ၊ ၂၀၀ ကျပ်အထိ စျေးကျဆင်းနေတဲ့အတွက် တောင်သူတွေမှာ သိန်းရာနဲ့ချီအရှုံးပေါ်နေတယ်လို့ ခြံပိုင်ရှင်တွေဆီကသိရပါတယ်။
ဂေါ်ဖီထုတ် တထုပ်ကို ၁၀၀ ၊ ၂၀၀ ကျပ်သာရရှိတဲ့အတွက် ခြံပိုင်ရှင်တွေအနေနဲ့ ဂေါ်ဖီထုပ်ကို ခူးပြီးရောင်းချတာမျိုးမလုပ်တော့ဘဲ လိုအပ်သူတွေကို အခမဲ့ခူးခွင့်ပေးနေသလို နယ်ဝေးမှယူလိုသူတွေကိုလည်း တင်ပေးနေကြောင်း ၊ အခင်းမှာကျန်ရှိတဲ့ဂေါ်ဖီထုပ်တွေကိုတော့ အခင်းလိုက်ဖျက်ပစ်နေရတယ်လို့သိရပါတယ်။
" အဝေးကလိုချင်သူတွေကို ခူးခ တန်ဆာခသူတို့ကုန်ကျခံခိုင်းပြီးအလကားပို့ပေးနေတယ်။ဒီမှာက ၁၀၀ ၊၂၀၀ တောင် ခုရက်၊ ဝယ်သူမရှိဘူး။ မိုးရွာလို့မဝယ်ကြဘူး။ ၂၀၀ ဆိုတာက ကျွန်မတို့က ခူးပြီး ကားနဲ့ပွဲရုံအရောက်ပို့မှရတဲ့စျေးပါ။ ခြံပြတ်စျေးမဟုတ်ဘူး။၂၀၀က မကိုက်ဘူးလေ။ အလုပ်သမားခတောင်ထပ်ရှုံးအုံးမှာဆိုတော့ မခူးတော့ဘူး။ လိုချင်သူကိုအလကားပေးနေတာ။ အခု အခင်းတခင်းကျန်သေးတယ်။ ယူသူမရှိရင် အဲဒီအခင်းက စက်နဲ့ ထိုးဖျက်ပြီး နောက်ထပ်သီးနှံစိုက်ရမှာလေ။" လို့ ရှမ်းတောင်က ဂေါ်ဖီထုတ်ခြံပိုင်ရှင်တယောက်က ပြောပါတယ်။
ဂေါ်ဖီတထုတ်ကို ငွေကျပ် ၁၀၀၀ အထက် ရောင်းရမှ စိုက်ပျိုးမှုကုန်ကျစရိတ် ပြန်ရမယ့်အခြေအနေမှာ တထုပ်ကို အများဆုံးမှ ၂၀၀ ကျပ်သာရရှိတာကြောင့် အရင်းတောင် ပြန်မရတဲ့အတွက် သိန်းရာနဲ့ချီပြီး အရှုံးကြီးမား တာဖြစ်တယ်လို့ သိရပါတယ်။
"အန်တီတို့ဆို သိန်းရာနဲ့ချီရှုံးတယ်။ စိုက်ခင်းမှာနွားချေးထည့်ရတာတင် သိန်း ၃၀ လောက်ရှိတယ်။ အပင် ၅၀၀၀၀ စိုက်ထားတာကို အခုစျေးကျချိန်မှာပဲ ခူးရတာဆိုတော့ သိန်းရာချီရှုံးတာပေါ့။ အရင်းတောင် မရဘူးလေ။ မြေဩဇာ၊အလုပ်သမားခ၊ မျိုး၊ အကုန်လုံး စျေးတွေကတက်နေတာဆိုတော့ကုန်ကျစရိတ်ကမနည်းဘူးလေ။" လို့အောင်ပန်းက ဂေါ်ဖီထုတ် စိုက်ခင်းပိုင်ရှင်က ပြောပါတယ်။
ခြံပိုင်ရှင်တွေအနေနဲ့ အရင်က ဂေါ်ဖီထုပ် တထုပ်ကို ၁၀၀၀ ကျော်ရောင်းချရပြီး အခုမေလ ရောက်မှ ဂေါ်ဖီထုတ်စျေးတွေ ထိုးကျဆင်းလာတာ လို့သိရပါတယ်။
ရှမ်းတောင် အောင်ပန်း ကုန်စည်စျေးကွက်မှာ ပုံမှန်ဆိုရင် ဂေါ်ဖီတထုပ်ကို ၆၀၀ ကျပ်မှ ၁၀၀၀ ကျပ်အထိ စျေးရှိပါတယ်။
ရှမ်းပြည်နယ်ပြင်ပ အခြားတိုင်းနဲ့ပြည်နယ်တွေမှာတော့ နေရာအနီးအဝေး သယ်ယူပို့ဆောင်ရေးစရိတ်အပေါ်လိုက်ပြီး ဂေါ်ဖီတထုပ်ကို ၄၀၀၀ ကျပ်လောက်အထိ ပေါက်စျေး ရှိခဲ့တယ်လို့သိရပါတယ်။
အခုချိန်မှာတော့ ဂေါ်ဖီထုတ်ကို မန္တလေးအပါအဝင် အခြား ဒေသတွေက ဝယ်လိုအားမရှိသလောက် လျော့ကျလာလို့ စျေးကျဆင်းနေသလို၊ မိုးရွာသွန်းမှုများတာကြောင့် အထားမခံလို့ ရှမ်းေတာင် ဒေသတွင်းမှာကိုပဲ အရောင်းအဝယ် မရှိသလောက်ဖြစ်​နေတာလို့ သိရပါတယ်။
ဓာတ်ပုံ - ဟိန်းထက်ဇော်