ဒီခေတ်ကြီးထဲမှာ ရတနာသိုက်ရှာတဲ့ဇာတ်လမ်းတစ်ပုဒ်ကို ပြောပြတော့မယ်ဆိုရင် ခင်ဗျားအနေနဲ့ ရုပ်ရှင်မှာ Indiana Jones၊​ ရုပ်ပြမှာ The Adventures of Tin Tin၊ ဂိမ်းမှာ Uncharted, Tomb Raiders တို့နဲ့ တန်းညှိခံရမှာ ရှောင်လွှဲလို့မရတဲ့ စိန်ခေါ်မှုတစ်ရပ်ပါပဲ။ ဒါကို ဖန်တီးသူဖက်က ကြိုက်သော်ရှိ၊ မကြိုက်သော်ရှိ ကျွန်တော်တို့တွေဟာ ရတနာသိုက်ရှာဇာတ်လမ်းတွေမှာ “စံထားရလောက်တဲ့” ဇာတ်လမ်းတင်ဆက်မှုပုံစံတွေကို ကြားခံနယ်အစုံကနေ စားသုံးခဲ့ဖူးပြီးဖြစ်ပါတယ်။ ကိုယ်တိုင်လိုက်ပါစဥ်းစားရတဲ့ ပဟေဠိတွေ၊ တမူထူးခြားတဲ့ ယုံကြည်ကိုးကွယ်မှုတွေနဲ့ သဘာဝလွန်ဖြစ်ရပ်တွေ၊ ကမ္ဘာပေါ်က လူသူအရောက်အပေါက်နည်းတဲ့ အံ့အားသင့်စရာ လျှို့ဝှက်နေရာတွေ၊ အက်ရှင်တွေ၊ စွန့်စားခန်းတွေနဲ့ မျက်နှာသေဟာသ (dry humor/deadpan humor) တွေဟာ ရတနာသိုက်ရှာဇာတ်လမ်းတစ်ပုဒ်အတွက် မဖြစ်မနေ ပါဝင်သင့်တဲ့ အစိတ်အပိုင်းတွေလို့တောင် မသိစိတ်က အလိုလိုသတ်မှတ်မိတဲ့အထိ အပေါ်မှာဖော်ပြခဲ့တဲ့ အနုပညာလက်ရာတွေဟာ လွှမ်းမိုးမှုကြီးမားခဲ့ပြီး ဒီလက်ရာတွေရဲ့ သြဇာကို အံတုနိုင်တဲ့ လက်ရာသစ်တွေဟာ လက်ချိုးရေလို့ရလောက်အောင် ရှားပါးနေဆဲပါပဲ။ ဒါဟာ ရတနာသိုက်ရှာဇာတ်လမ်းတွေကို ရုပ်ရှင်ဒါရိုက်တာတွေ လက်ရှောင်ကြတဲ့အကြောင်းအရင်းတစ်ခုဆိုလည်း မမှားပါဘူး။ ဘာလို့လဲဆိုတော့ တန်းညှိခံရဖို့ စောင့်နေမယ့်ရုပ်ရှင်တွေနဲ့ ရင်ဘောင်တန်းနိုင်ဖို့ထက် ကိုယ့်သေတွင်းကိုယ်တူးမိဖို့ ရာခိုင်နှုန်းပိုများလို့ပါ။
Snatch, The Man from U.N.C.L.E, Sherlock Holmes, The Gentlemen ရုပ်ရှင်တို့နဲ့အတူ ဟောလိဝုဒ်မှာ အက်ရှင်/စွန့်စားခန်းရုပ်ရှင်တွေနဲ့ ပတ်သက်လာရင် ဖျော်ဖြေမှုရသပေးနိုင်ဖို့ အာမခံနိုင်တဲ့ ဒါရိုက်တာတစ်ယောက်ဖြစ်တဲ့ Guy Ritchie ဟာ Fountain of Youth ရုပ်ရှင်နဲ့အတူ ဒါရိုက်တာအများစု လက်ရှောင်ကြတဲ့ ရတနာသိုက်ရှာဇာတ်လမ်းတစ်ပုဒ်ကို ပုံဖော်ဖို့ ကြိုးစားခဲ့ပါတယ်။ ဒါရိုက်တာက Guy Ritchie ဖြစ်တဲ့အပြင် John Krasinski, Natalie Portman တို့လို ဟောလိဝုဒ်ရဲ့ နာမည်ကျော်ထိပ်တန်းသရုပ်ဆောင် ၂ ယောက်ကို အဓိကဇာတ်ဆောင်တွေအဖြစ် အားဖြည့်ထားပြီး AppleTV+ က ထုတ်လုပ်ရေးစရိတ် ဒေါ်လာသန်း ၂၀၀ အထိ အသုံးပြုထားတဲ့ ဒီရုပ်ရှင်ဟာ စာရွက်ပေါ်မှာတော့ အရည်အသွေးကောင်းမွန်ဖို့ အဖက်ဖက်က စိတ်ချရတဲ့ရုပ်ရှင်ပါပဲ။ ဒါပေမယ့် လက်တွေ့မှာတော့ Fountain of Youth ဟာ ၃ ကားမြောက် Indiana Jones ရုပ်ရှင်ဖြစ်တဲ့ The Last Crusade ကို အပျော်တမ်းပြန်ရိုက်ပြထားသလိုသာ ခံစားရပြီး The Last Crusade ရယ်လို့ ပရိသတ်တွေအမှတ်ရနေစေခဲ့တဲ့ အစိတ်အပိုင်းတွေ တစ်ခုမှ မပါလာတာကို တွေ့ရတယ်။
ဇာတ်လမ်းက Luke Purdue နဲ့ Charlotte Purdue မောင်နှမ ၂ ယောက်က အသည်းကင်ဆာနဲ့ သေလုမျောပါးဖြစ်တော့မယ့် ဘီလျံနာသူဌေးကြီးတစ်ယောက်အတွက် Fountain of Youth လို့ခေါ်တဲ့ ဒဏ္ဍာရီလာ ထာဝရနုပျိုစေတဲ့စမ်းရေကို ရှာကြတာပါပဲ။ ရတနာသိုက်ရှာဇာတ်လမ်းတွေရဲ့ ထုံးစံအတိုင်း ပဟေဠိတွေပါတယ်၊ သမိုင်းဝင် အထင်ကရပုဂ္ဂိုလ်တွေနဲ့ ဆက်စပ်နေတဲ့ လျှို့ဝှက်အကြောင်းအရာတွေပါတယ်၊ ဦးတည်ချက်မတူတဲ့ အဖွဲ့တွေအချင်းချင်း ပဋိပက္ခဖြစ်ကြတာတွေပါတယ်၊ အက်ရှင်ခန်းတွေပါတယ်၊ ဟာသတွေပါတယ်။ ခက်တာက Fountain of Youth ဟာ အပေါ်ကအစိတ်အပိုင်းတွေ အပေါ်ယံပါတဲ့ ရတနာသိုက်ရှာဇာတ်လမ်းတစ်ပုဒ် ဖြစ်တယ်ဆိုရုံထက် မပိုခဲ့ဘူး။ မူရင်းဇာတ်လမ်းတစ်ပုဒ်လို့ မခံစားရဘဲ နာမည်ကျော်ရတနာသိုက်ရှာရုပ်ရှင်တွေမှာ အလုပ်ဖြစ်ခဲ့တဲ့ ဇာတ်ကောင်တွေ၊ ဟာသတွေ၊ အက်ရှင်တွေ၊ ဇာတ်လမ်းအကြောင်းအရာတွေကို ဆင်တူယိုးမှား ပြုစုထားတာနဲ့ ပိုတူခဲ့တယ်။
ဒါနဲ့ပတ်သက်ရင် အထင်ရှားဆုံးအားနည်းချက်က အဓိကဇာတ်ဆောင် ၂ ယောက်ကို တွဲဖက်ပေးထားပုံပဲ။ Luke Purdue နဲ့ Charlotte Purdue တို့မောင်နှမဟာ စာရွက်ပေါ်မှာတော့ The Last Crusade ရုပ်ရှင်ရဲ့ Indy နဲ့ Henry တို့သားအဖ၊ Uncharted 4 ဂိမ်းက Nathan နဲ့ Sam Drake တို့ညီအစ်ကိုတို့ရဲ့ ဆက်ဆံရေးနဲ့ အတော်လေးဆင်တူတယ်။ ဒါပေမယ့် တကယ်တမ်း ရုပ်ရှင်မှာတော့ ဒီဆက်ဆံရေးတစ်ခု အသက်ဝင်လာအောင် ပုံမဖော်နိုင်ခဲ့ဘူး။ John Krasinski ရဲ့ မျက်နှာသေဟာသတွေနဲ့ ထုံပေပေစကားပြောဟန်တွေဟာ ရတနာသိုက်ရှာတဲ့အဓိကဇာတ်ကောင်တစ်ယောက်အဖြစ် ကျွန်တော်တို့ရင်းနှီးထားတဲ့ပုံစံအဆင့်ကို ရောက်မလာခဲ့သလို Natalie Portman ဟာလည်း မောင်ဖြစ်သူနဲ့ “မနီးမဝေး” ဆက်ဆံရေးတစ်ခုကို အတွဲဖက်ဖက်ညီညီပုံဖော်နိုင်ဖို့ရာ အားနည်းခဲ့တယ်။ ဒီတော့ Fountain of Youth ရဲ့ ဇာတ်ဝင်ခန်းအတော်များများမှာ ဒီအဓိကဇာတ်ဆောင် ၂ ယောက်ကို မောင်နှမလို့ မခံစားရဘဲ ဒါရိုက်တာက ရန်တိုက်ပေးထားလို့သာ ရန်ဖြစ်ချင်ယောင်ဆောင်နေရတဲ့ လူစိမ်း ၂ ​ယောက်လို့ မြင်ခဲ့ရတယ်။ ဒါ့အပြင် Eiza Gonzalez နဲ့ John Krasinski ကြားက ဆက်ဆံရေးဟာလည်း ရယ်ချင့်စဖွယ်ဖြစ်နေတယ်။ စမ်းရေကိုကာကွယ်ဖို့ တစ်ဘဝလုံး ကတိပြုလာခဲ့တဲ့ လူတစ်ယောက်အနေနဲ့ တစ်ဖက်က စမ်းရေရှာနေတဲ့လူဟာ “ ဘယ်လောက်ထူးခြားကြောင်း၊ သူများတွေနဲ့မတူကြောင်း” ကွယ်ရာမှာ အမွှန်းတင်ရင်း John Kransinski ရဲ့ဇာတ်ကောင်ကို အမြင့်တင်ပေးနေရတာ သိပ်တော့မဟန်လှဘူး။
Guy Ritchie ဟာ ဒီရုပ်ရှင်မှာ ရတနာသိုက်ရှာရုပ်ရှင်တွေရဲ့ အသက်သွေးကြောအစိတ်အပိုင်းတွေကို ပေါင်းထည့်ရုံတင်သာမက သူရိုက်ကူးခဲ့တဲ့ရုပ်ရှင်တွေထဲက လူကြိုက်များတဲ့အစိတ်အပိုင်းတွေကိုလည်း ထည့်ချင်ခဲ့ပုံရတယ်။ ဒီရုပ်ရှင်မှာ The Man from U.N.C.L.E ကလို အက်ရှင်အပိုင်းအစတွေပါတယ်၊ Sherlock Holmes မှာလို အနှေးပြကွက်တွေပါတယ်၊ The Covenant မှာလို တစ်ဖက်နဲ့တစ်ဖက် အပြန်အလှန်ပစ်ခတ်ကြတာတွေပါတယ်။ ဒါပေမယ့်လည်း ဒီအစိတ်အပိုင်းတွေဟာ ဇာတ်ကို လိုအပ်တဲ့အဆင့်တစ်ခုဆီ ပို့ပေးဖို့ မစွမ်းဆောင်နိုင်ခဲ့ဘူး။ Fountain of Youth ဟာ လူတစ်စု စမ်းရေရှာကြရုံထက် မပိုခဲ့ဘူး။ Indiana Jones ဟာ ရတနာသိုက်ရှာတဲ့ဇာတ်လမ်းနောက်ကွယ်မှာ ဖက်ဆစ်ဆန့်ကျင်ရေးဝါဒကို ထည့်သွင်းပြခဲ့သလို National Treasures ဟာလည်း Indiana Jones အဆင့်မဟုတ်သည့်တိုင် သူထည့်ပြသွားတဲ့ အမေရိကန်မျိုးချစ်ဝါဒဟာ သူ့ရုပ်ရှင်တွေကို လူတွေသဘောကျဖို့ အတော်လေးခရီးရောက်စေခဲ့တယ်။ The Adventures of Tin Tin ဟာလည်း ကာတွန်းရုပ်ပြမှာရော၊ ရုပ်ရှင်မှာပါ ဟာသနဲ့ ဒရာမာကို ဇာတ်ကောင်တွေကတဆင့် အချိုးကျကျပေါင်းစပ်ပြနိုင်တာကို တွေ့ရတယ်။