#နိုင်ငံတကာသတင်း
◼ အမေရိကန်၏ ရွှေကွန်ချာဒုံးကျည်ကာကွယ်ရေးစနစ် အလွန်အန္တရာယ်များကြောင်း မြောက်ကိုရီးယားပြော
အမေရိကန်သမ္မတ ဒေါ်နယ်ထရန့်၏ ရွှေကွန်ချာဒုံးကျည်ကာကွယ်ရေး အစီ အစဉ်သည် အာကာသတွင် နျူကလီးယားစစ်ပွဲ ဖြစ်လာစေနိုင်သည့် အလွန်အန္တရာယ်များသော ခြိမ်းခြောက်မှုဖြစ်သည်ဟု မြောက်ကိုရီးယားက ရှုတ်ချပြောဆိုလိုက်ကြောင်း နိုင်ငံပိုင် KCNA သတင်းဌာနက ဖော်ပြသည်။
ယင်းဒုံးကျည် ကာကွယ်ရေးစနစ်သစ် နှင့် ပတ်သက်၍ အသေးစိတ်အချက်အလက် အသစ်များနှင့် ကနဦးရန်ပုံငွေ အား ထရန့်က ပြီးခဲ့သည့် သီတင်းပတ်တွင် ကြေညာခဲ့ပြီး ယင်းအစီအစဉ်မှာ အောင်မြင်ဖို့အရေးကြီးသလို အမေရိကန်နိုင်ငံရှင်သန်ရေးအတွက်ပင် အရေးပါသည်ဟု ပြောကြားခဲ့သည်။
၎င်းအစီအစဉ်သည် နည်းပညာပိုင်းနှင့် နိုင်ငံရေးအရ ကြီးမားသောစိန်ခေါ်မှုများ ရင်ဆိုင်နေရကြောင်း လေ့လာဆန်းစစ်သူများက ပြောကြားပြီး ကုန်ကျစရိတ်လည်း အလွန်များပြားနိုင်ကြောင်း သိရသည်။
ယင်းမှာ နျုကလီးယားလက်နက်ပိုင်နိုင်ငံများ၏ မဟာဗျူဟာမြောက်လုံခြုံရေးကို ခြိမ်းခြောက်နေသော အလွန်အန္တရာယ်များသည့် အစီအစဉ်အဖြစ် မြောက်ကိုရီးယားနိုင်ငံခြားရေးဝန်ကြီးဌာနက ရှုတ်ချပြောဆိုလိုက်ကြောင်း KCNA သတင်းထုတ်ပြန်ချက် က ဆိုသည်။
ကမ္ဘာ့ပြင်ပ အာကာသအား စစ်ရေးနယ်ပယ်ဖြစ်လာစေရန် အမေရိကန်က ပိုင်းဖြတ် လုပ်ဆောင်နေကြောင်း မြောက်ကိုရီးယားနိုင်ငံခြားရေးဌာနကပြောသည်။
နျူကလီးယားလက်နက်ပိုင်နိုင်ငံများ၏ လုံခြုံရေးစိုးရိမ်မှုများကို နှိုးဆွပေးပြီး ပြင်ပအာကာသအား နျူကလီယားစစ်မြေပြင် အဖြစ် ပြောင်းလဲနိုင်ချေကြောင့် ဒုံးကျည်ကာကွယ်ရေးစနစ်သစ်တည်ဆောက်မည့် အမေရိကန်၏ အစီအစဉ်သည် ကမ္ဘာလုံးဆိုင်ရာ နျူကလီးယားနှင့် လက်နက်ပြိုင်ပွဲ၏ အခြေခံအကြောင်းရင်း ဖြစ်ကြောင်း ပြုံယမ်းထုတ်ပြန်ချက် က ဆက်လက်ပြောကြားသည်။
ဝါရှင်တန်၏ ရွှေကွန်ချာဒုံးကျည်ကာကွယ်ရေး စနစ်နှင့်ပတ်သက်၍ တရုတ်ကလည်း အလားတူပြင်းထန်သော စိုးရိမ်မှုများကို ထုတ်ဖော်ပြောကြားခဲ့ကာ အမေရိကန်က ကမ္ဘာလုံးဆိုင်ရာ တည်ငြိမ်မှုကို အားနည်းအောင်လုပ်နေကြောင်း စွပ်စွဲပြောကြားသည်။
ပဲ့ထိန်းဒုံးကျည် နှင့် အသံထက်မြန်သောဒုံးကျည်နည်းပညာများတွင် ပေကျင်းက ဝါရှင်တန်နှင့် ကွာဟမှု ကျဉ်းမြောင်းအောင်လုပ်ဆောင်နေကြောင်း ၊ မော်စကိုက ၎င်းတို့၏ တိုက်ချင်းပစ် ဒုံးကျည်စနစ်များကို ပိုမို ခေတ်မီအောင်လုပ်ဆောင်နေကာ တိကျမှုမြင့်မားသော ဒုံးကျည်စနစ်များကိုလည်း တီထွင်နေကြောင်း အမေရိကန်စစ်ဌာနချုပ် ပင်တဂွန်၏ ၂၀၂၂ ခုနှစ် သုံးသပ်မှုက ဖော်ပြခဲ့သည်။
ဒေါ်နယ်ထရန့်၏ အစီအစဉ်နှင့်ပတ်သက်၍ ရုရှားက ကနဦးတွင် ရှုတ်ချခဲ့သော်လည်း နောက်ပိုင်းတွင် လေသံလျှော့သွားခဲ့သည်။
သတင်း-ရဲမင်း
ကိုးကား-AFP
