#ယနေ့ထုတ်သတင်းစာ_အားကစားသတင်း
◼ ဆော်ဒီပရိုလိဂ်၏ကမ်းလှမ်းမှုကို လက်ခံရရှိပြီးနောက် မန်ယူမှ ထွက်ခွာမည့်အခြေအနေကို ဘရူနိုဖာနန်ဒက်စ် ထုတ်ဖော်ပြောဆို
ပေါ်တူဂီကွင်းလယ်ကစားသမား ဘရူနိုဖာနန်ဒက်စ်သည် ဆော်ဒီကလပ်အယ်ဟီလာ၏ တန်ဖိုးကြီးမားသောကမ်းလှမ်းမှုကို လက်ခံရရှိခဲ့ပြီးနောက် အိုးထရက်ဖို့ဒ်မှထွက်ခွာနိုင်ခြေနှင့် ပတ်သက်ပြီး အရိပ်အမြွက်ထုတ်ဖော်ပြောဆိုလိုက်၍ မန်ယူပရိသတ်များအတွက် စိတ်ပျက်ဖွယ်ရာဖြစ်လာခဲ့ရသည်။
ဆော်ဒီကလပ်အယ်ဟီလာသည် ဘရူနိုဖာနန်ဒက်စ်ကို ခေါ်ယူရန် ပေါင်သန်း ၂ဝဝ ဖြင့်ကမ်းလှမ်းခဲ့ခြင်းဖြစ်ပြီး မန်ယူအနေဖြင့် ယူရိုပါ လိဂ်ဗိုလ်လုပွဲတွင် ရှုံးပွဲကြုံခဲ့ပြီးနောက် နွေရာသီ၌အသင်းကို ကြီးကြီးမားမား ပြုပြင်ပြောင်းလဲရန် ဆန္ဒရှိနေခြင်းလည်း ဖြစ်သည်။
ထို့ကြောင့်လည်း ဘရူနိုဖာနန်ဒက်စ်က မန်ယူအနေဖြင့် နွေရာသီတွင် အသုံးစရိတ်ရရှိရေးအတွက် ၎င်းကိုရောင်းချမည်ဆိုပါက အသင်း၏ဆုံးဖြတ်ချက်ကို လိုက်နာသွားမည်ဖြစ်ကြောင်း ထုတ်ဖော်ပြောဆိုလိုက်ခြင်းဖြစ်သည်။
ဘရူနိုဖာနန်ဒက်စ်က “သူတို့အနေနဲ့ ငွေလိုချင်လို့ပဲဖြစ်ဖြစ်၊ ဘာကြောင့်ပဲဖြစ်ဖြစ် ခွဲထွက်ဖို့အချိန်တန်ပြီလို့ ယူဆရင်အဲဒါက အဲဒီလိုပဲဖြစ်လာမှာပါ။ ဘောလုံးကတစ်ခါတလေ ဒီလိုပါပဲ။ ကျွန်တော်အမြဲတမ်းရိုးသားခဲ့တယ်။ အဲဒီကိုသွားဖို့အချိန်တန်ပြီလို့ ကလပ်ကပြောလာခဲ့တဲ့ အထိကျွန်တော်ဒီမှာရှိနေမှာပါ။ ကျွန်တော့်ရဲ့ ကလပ်ကိုကြီးကျယ်တဲ့ နေ့ရက်တွေဆီပို့ဆောင်နိုင်ဖို့ဒီထက်မက ပိုပြီးလုပ်ဆောင်ဖို့တော့ စိတ်အားထက်သန်နေပါတယ်”ဟု ထုတ်ဖော်ပြောဆိုလိုက်ခြင်းဖြစ်သည်။
သတင်းများ၏အဆိုအရ အယ်ဟီလာသည် ဘရူနိုဖာနန်ဒက်စ်ကိုတစ်ပတ်လုပ်ခပေါင် ၇ဝဝဝဝဝ တန်ကြေးရှိသော သုံးနှစ်စာချုပ်ဖြင့် ကမ်းလှမ်းရန်စီစဉ်နေခြင်းဖြစ်ကာ ပြောင်းရွှေ့ကြေးကို ပေါင်သန်း ၁ဝဝ သုံးစွဲသွားရန်သတ်မှတ်ထားကြောင်းလည်း သိရသည်။
