#ယနေ့ထုတ်သတင်းစာ_နိုင်ငံတကာသတင်း
◼ အာဏာရှင်စနစ် ပြန်မပေါ်လာစေရန် စည်းလုံးညီညွတ်မှုလိုကြောင်း ဘင်္ဂလားဒေ့ရှ်အစိုးရ သတိပေး
အာဏာရှင်စနစ် တစ်ကျော့ပြန်ပေါ်ထွက်လာနိုင်မှုကို တားဆီးရေးအတွက် စည်းလုံးညီညွတ်မှုလိုအပ်ကြောင်း ဘင်္ဂလားဒေ့ရှ်ကြားဖြတ်အစိုးရအဖွဲ့က မေ ၂၄ ရက်တွင် သတင်းထုတ်ပြန်ထားသည်။
နိုင်ငံတည်ငြိမ်မှုကိုထိန်းသိမ်းရေး၊ လွတ်လပ်မျှတသည့် ရွေးကောက်ပွဲများ ကျင်းပနိုင်ရေးနှင့် အာဏာရှင်စနစ် ပြန်လည်ပေါ်ထွက်လာမှုကို အမြဲတမ်းတားဆီးနိုင်ရေးတို့အတွက် ပြည်တွင်းစည်းလုံးညီညွတ်မှုမရှိမဖြစ်လိုအပ်ကြောင်း ကြားဖြတ်အစိုးရ သတင်းထုတ်ပြန်ချက်၌ ဖော်ပြထားသည်။
၂ဝ၂၄ ခုနှစ်ဩဂုတ်လအတွင် ဖြစ်ပွားခဲ့သော လူထုအုံကြွမှုကြောင့် ဝန်ကြီးချုပ်ဟောင်းရှိတ်ခ်ဟာဆီနား အိန္ဒိယနိုင်ငံသို့ ထွက်ပြေးခဲ့ရပြီးနောက် ငြိမ်းချမ်းရေးနိုဘယ်ဆုရှင် မူဟမ်မက်ယူနွတ်ဦးဆောင်သော ကြားဖြတ်အစိုးရအဖွဲ့က ဘင်္ဂလားဒေ့ရှ်နိုင်ငံကို ဆက်လက်ဦးဆောင်ခဲ့ရသည်။
သို့ရာတွင် ကြားဖြတ်အစိုးရအဖွဲ့အနေဖြင့် နိုင်ငံရေးအင်အားစုများ၏ ကျိုးကြောင်းဆင်ခြင်မှုမရှိသော တောင်းဆိုချက်များ၊ ရည်ရွယ်ချက်ရှိရှိ ရန်စလှုံ့ဆော်မှုများနှင့် စီရင်ခွင့်ဘောင်ကျော်နေသော ကြေညာချက်များဖြင့်ရင်ဆိုင်နေရကြောင်း မေ ၂၅ ရက်ကြေညာချက်တွင် ဖော်ပြထားသည်။
နိုင်ငံရေးပါတီများက အထွေထွေရွေးကောက်ပွဲအား ယခုနှစ် ဒီဇင်ဘာလအတွင်း ကျင်းပရန်လိုလားနေချိန်တွင် ကြားဖြတ်အစိုးရအဖွဲ့ကမူ ရွေးကောက်ပွဲစနစ် ပြုပြင်ပြောင်းလဲရေးလုပ်ငန်းများပြီးဆုံးမှသာ အထွေထွေရွေးကောက်ပွဲကျင်းပရန်ဆန္ဒရှိနေကြောင်း သိရသည်။
ယင်းပြင်ဘင်္ဂလားဒေ့ရှ်စစ်ဦးစီးချုပ် ဝါကာအက်ဇ်ဇာမင်ကလည်း ကြားဖြတ်အစိုးရအနေဖြင့် အထွေထွေရွေးကောက်ပွဲကို ယခုနှစ် ဒီဇင်ဘာလအတွင်း ကျင်းပသင့်ကြောင်း ပြောကြားထားရာ ဘင်္ဂလားဒေ့ရှ်ကြားဖြတ်အစိုးရအဖွဲ့မှာ ဖိအားများနှင့် ရင်ဆိုင်နေရသည်။
ရိုက်တာ
