#ပြည်တွင်းသတင်း
◼နိုင်ငံကူးလက်မှတ်အတုကိုင်ဆောင်သူ နှင့် ဆောင်ရွက်ပေးသူအား ဥပဒေအရ အရေးယူမည်ဟု မြန်မာသံရုံးထုတ်ပြန်
နိုင်ငံကူးလက်မှတ်အတု ကိုင်ဆောင်သူ နှင့် ဆောင်ရွက်ပေးသူအား ဥပဒေအရ အရေးယူမည်ဖြစ်ကြောင်း ထိုင်းနိုင်ငံ၊ဘန်ကောက်မြို့ရှိ မြန်မာသံရုံးမှ ယမန်နေ့ (မေ ၂၃ ရက်)တွင် အသိပေးချက်ထုတ်ပြန်ခဲ့သည်။
ထိုင်းနိုင်ငံတွင် နေထိုင်သည့် မြန်မာနိုင်ငံသားများအနေဖြင့် မိမိတို့၏ မြန်မာနိုင်ငံကူးလက်မှတ်များအား ကိုယ်တိုင်သိရှိ၍ဖြစ်စေ၊ မသမာသူများက ဖျားယောင်း၍ဖြစ်စေ ပြင်ဆင်ထားခြင်း၊ အတုပြုလုပ်ထားခြင်းကို သက်ဆိုင်ရာ အာဏာပိုင်များတွေ့ရှိပါက တရားဥပဒေအရ အရေးယူခံရမည်ဖြစ်ကြောင်း ထုတ်ပြန်ချက်တွင်ဖော်ပြထားသည်။
ထိုင်းနိုင်ငံမှ သက်ဆိုင်ရာ အာဏာပိုင်များ နှင့် မြန်မာသံရုံးမှသက်ဆိုင်ရာဌာနများ ပူးပေါင်း၍ နိုင်ငံကူးလက်မှတ် အတုပြုလုပ်ထားခြင်း၊ပြင်ဆင်ထားခြင်း ရှိမရှိကို နည်းပညာမြင့်စက်များဖြင့် စိစစ်ဖော်ထုတ် ဆောင်ရွက်နေကြောင်း ထုတ်ပြန်ချက်အရ သိရသည်။
ထို့ပြင် နိုင်ငံကူးလက်မှတ်ပျောက်ဆုံးပါက ပြည်ထဲရေးဝန်ကြီးဌာန၏ စိစစ်ခွင့်ပြုချက်ဖြင့်သာထုတ်ပေးနိုင်ကြောင်း၊နိုင်ငံကူးလက်မှတ်ပါ အချက်အလက်များကို ပြောင်းလဲ ပြင်ဆင်ခြင်း၊ ချွတ်ယွင်းအောင် ပြုလုပ်ခြင်း၊ စာမျက်နှာများအား စုတ်ဖြဲခြင်း၊ မသက်ဆိုင်သူများမှ တံဆိပ်ခေါင်းများကပ်ခြင်း၊ အခြားအမှတ်အသား ဖြည့်စွက်ခြင်းများ မပြုလုပ်ရန်လည်း သံရုံးမှ သတိပေးထားပြီး အဆိုပါကိစ္စရပ်များအားပြုလုပ်ပါက နိုင်ငံကူးလက်မှတ်ကိုင်ဆောင်သူ နှင့် ဆောင်ရွက်ပေးသူတို့အား ဥပဒေအရ အရေးယူနိုင်ပြီး နိုင်ငံကူးလက်မှတ်အား ချက်ချင်းပယ်ဖျက်မည်ဖြစ်ကြောင်း ထုတ်ပြန်ထားသည်။
သတင်း-အင်ကြင်း
