#ယနေ့ထုတ်သတင်းစာ_နိုင်ငံတကာသတင်း
◼ ပြုပြင်ပြောင်းလဲရေးလုပ်ငန်းများ တိုးတက်မှုမရှိပါက ဘင်္ဂလားဒေ့ရှ်ခေါင်းဆောင် ရာထူးမှနုတ်ထွက်နိုင်
ပြည်သူများစောင့်ဆိုင်းနေကြသည့် ပြုပြင်ပြောင်းလဲရေးလုပ်ငန်း များကို နိုင်ငံရေးပါတီများက သဘောတူညီခြင်းမရှိခဲ့ပါက ရာထူးမှ နုတ်ထွက်မည်ဟူ၍ ဘင်္ဂလားဒေ့ရှ်ကြားဖြတ်အစိုးရခေါင်းဆောင် မိုဟာမက်ယူနွတ်က ထုတ်ဖော်ပြောကြားထားကြောင်း မေ ၂၃ ရက် သတင်းများတွင်ရေးသားတင်ပြထားသည်။
အသက်(၈၄)နှစ်အရွယ် ငြိမ်းချမ်းရေးနိုဘယ်လ်ဆုရှင် မိုဟာမက် ယူနွတ်သည် ၂ဝ၂၄ ခုနှစ် ဩဂုတ်လအတွင်း ဖြစ်ပွားခဲ့သော လူထုအုံကြွမှုများကြောင့် ဝန်ကြီးချုပ်ဟောင်း ရှိတ်ခ်ဟာဆီနာ အိန္ဒိယနိုင်ငံသို့ ထွက်ပြေးခဲ့ရပြီးနောက် ဘင်္ဂလားဒေ့ရှ်နိုင်ငံကို ကြားဖြတ်အစိုးရခေါင်းဆောင်အဖြစ် ဆက်လက်ဦးဆောင်ခဲ့ သည်။
သို့ရာတွင် ရွေးကောက်ပွဲမကျင်းပမီ ပြုလုပ်ပေးရမည့် ပြုပြင် ပြောင်းလဲရေး လုပ်ငန်းများနှင့်ပတ်သက်ပြီး နိုင်ငံရေးပါတီများ၏ သဘောတူညီချက် ရယူရေးအတွက် မိုဟာမက်ယူနွတ်အနေဖြင့် အခက်အခဲကြုံနေရကြောင်း ထိပ်တန်းကျောင်းသားခေါင်းဆောင်တစ်ဦးက ထုတ်ဖော်ပြောကြားထားသည်။
တရားမျှတသည့် ရွေးကောက်ပွဲများကျင်းပနိုင်ရေးအတွက် ရွေးကောက်ပွဲစနစ် ပြုပြင်ပြောင်းလဲရေး လုပ်ငန်းများကိုနိုင်ငံရေးပါတီများအနေဖြင့် သဘောတူညီခြင်းမရှိခဲ့ပါက ကြားဖြတ်အစိုးရခေါင်းဆောင်အဖြစ်မှ နုတ်ထွက်ရန် မိုဟာမက်ယူနွတ်က ကြံရွယ်ထားကြောင်း သိရသည်။
အဓိက အတိုက်အခံပါတီဖြစ်သည့် ဘင်္ဂလားဒေ့ရှ် အမျိုးသားရေး ပါတီနှင့် ဘင်္ဂလားဒေ့ရှ်တပ်မတော်တို့က ယခုနှစ်ဒီဇင်ဘာလအတွင်း အထွေထွေရွေးကောက်ပွဲများကျင်းပရေးအတွက် ကြားဖြတ်အစိုးရကို တောင်းဆိုထားသည်။
ရိုက်တာ
