#နိုင်ငံတကာသတင်း
◼ထရမ့်၏ရွှေကွန်ချာကာကွယ်ရေးစနစ်သစ်တွင်ပူးပေါင်းရန်အမေရိကန်နှင့်ဆွေးနွေးနေကြာင်းကနေဒါပြော
အမေရိကန်သမ္မတဒေါ်နယ်ထရမ့်ကကြေညာထားသော မျိုးဆက်သစ် ဝေဟင် ခြိမ်းခြောက်မှုများကို တန်ပြန်ရန် ရည်ရွယ်သည့် ‘ရွှေကွန်ချာ’ ဒုံးကျည်ကာကွယ်ရေးစနစ်သစ်တွင် ပူးပေါင်းပါဝင်ရန် ကနေဒါအစိုးရက အမေရိကန်နှင့်အဆင့်မြင့် ဆွေးနွေးမှုများလုပ်ဆောင်နေ‌ကြောင်းဝန်ကြီးချုပ်မာ့ခ်ကာနေးကပြောကြားသည်။
ဒုံးကျည်ကာကွယ်ရေးစနစ်သစ်အတွက် အစီအစဉ်ကို အမေရိကန်သမ္မတ ဒေါ်နယ်ထရန့်ကအင်္ဂါနေ့တွင် ထုတ်ဖော်ပြောကြားခဲ့ပြီး ကနဦးတန်ဖိုးမှာ ဒေါ်လာ ၂၅ ဘီလီယံ (ပေါင် ၁၈ဒသမ၇ ဘီလီယံ) ဖြစ်ကြောင်း ကြေညာခဲ့သည်။
လက်ရှိနှင့် ‘ရွှေကွန်ချာ’စနစ်ကဲ့သို့အစီအစဉ်သစ်များ အပါအဝင် လုံခြုံရေးဆိုင်ရာကိစ္စရပ်များကိုကနေဒါနှင့် အမေရိကန်တို့အကြား တက်ကြွစွာ ဆွေးနွေးမှုများ ရှိနေကြောင်း ၀န်ကြီးချုပ် မာ့ခ်ကာနေး ၏ရုံးက ပြောကြားသည်။
သို့ရာတွင်ကျယ်ပြန့်သောစနစ်တစ်ခုကို အမေရိကန်က မည်သို့ပေးအပ်မည်နှင့်ပတ်သက်၍ ကျွမ်းကျင်သူများ၏ သံသယများရှိနေပြီး ကနေဒါက မည်သို့ပါဝင်မည် သို့မဟုတ် မည်မျှပေးချေမည်ဆိုသည်မှာ ရှင်းရှင်းလင်းလင်းမရှိသေးပေ။
"ကနေဒါနိုင်ငံသားတွေဟာ အမေရိကန်ပြည်ထောင်စုနဲ့ ပြီးပြည့်စုံတဲ့ လုံခြုံရေးနဲ့ စီးပွားရေး ဆက်ဆံရေးသစ်ကို ဆွေးနွေးညှိနှိုင်းဖို့ ၀န်ကြီးချုပ်ကို ခိုင်မာတဲ့ လုပ်ပိုင်ခွင့် ပေးခဲ့တယ်။ အဲဒီအတွက်ကြောင့် ဝန်ကြီးချုပ်နဲ့ သူ့ရဲ့ဝန်ကြီးတွေဟာ သူတို့ရဲ့ အမေရိကန်လုပ်ဖော်ကိုင်ဖက်တွေနဲ့ ကျယ်ပြန့်ပြီး အပြုသဘောဆောင်တဲ့ ဆွေးနွေးမှုတွေ လုပ်နေပါတယ်။” ဟု ဝန်ကြီးချုပ်ကာနေး၏ ပြောရေးဆိုခွင့်ရှိသူ မစ္စအောဒရေးရှမ်းပေါ့ဇ်က ပြောကြားသည်။
အဆိုပါဆွေးနွေးမှုများတွင်မြောက်အမေရိကလေကြောင်းကာကွယ်ရေးကွပ်ကဲမှု(Norad)ကိုအားကောင်းလာစေရန်နှင့် ရွှေကွန်ချာစနစ်ကဲ့သို့ဆက်စပ်လုပ်ဆောင်မှုများ ပါဝင်ကြောင်း၎င်းကဆိုသည်။
“ဒါပေမယ့် အစီအစဉ်မှာ ကနေဒါက ဘာတွေပေးရမလဲ၊ ဒါမှမဟုတ် တိုင်းပြည်အတွက် ဘယ်လို အလုပ် လုပ်မယ် ဆိုတာ ပြောဖို့ စောလွန်းသေးတယ်။”ဟု မစ္စရှမ်းပေါ့ဇ် ကဆက်လက်ပြောကြားသည်။
ရွှေကွန်ချာ အစီအစဉ်တွင် တစ်စိတ်တစ်ပိုင်းအဖြစ်ပါဝင်ရန် ကနေဒါက စိတ် ဝင်စား ကြောင်း အင်္ဂါနေ့အစောပိုင်းတွင်ထရန့် ကပြောကြားခဲ့သည်။
“ကျွန်တော်တို့သူတို့နဲ့ စကားပြောမယ်၊သူတို့က အကာအကွယ်လည်း လိုချင်နေတယ်၊ ထုံးစံအတိုင်းပဲ ကျွန်တော်တို့ ကနေဒါကို ကူညီပါတယ်။" အမေရိကန် သမ္မတကဆိုသည်။
အမေရိကန်အဆိုပြုထားသောရွှေကွန်ချာစနစ် သည် အသံထက်မြန်သော ဒုံးကျည်များ အပါအဝင် ပိုမိုခေတ်မီသော ဝေဟင်လက်နက်များကို ပစ်မှတ်ထားရန် ရည်ရွယ်ပြီး အာကာသအခြေပြု အာရုံခံကိရိယာများနှင့် ကြားဖြတ်ကိရိယာများ ပါဝင်မည်ဖြစ်ကြောင်း ထရန့်က ပြောကြားခဲ့သည်။
ရွှေကွန်ချာ ကာကွယ်ရေး အစီအစဉ်သစ်သည် ၎င်း၏ ရာထူးသက်တမ်းကုန်ဆုံးချိန်တွင် စတင်လည်ပတ်မည်ဖြစ်ပြီး ဒေါ်လာ ၁၇၅ ဘီလီယံ အထိကုန်ကျမည်ဟုထရန့်က ပြောကြားခဲ့ပြီး ကနေဒါက သင့် တင့်မျှတစွာထည့်ဝင်နိုင်ရေးအတွက် ၎င်း၏ အစိုးရအဖွဲ့ကကြိုပမ်း နေကြောင်း ထပ်လောင်း ပြောကြားခဲ့သည်။
သို့ရာတွင် အဆိုပါစနစ်၏ အာကာသအခြေပြု အစိတ်အပိုင်းများအတွက် အနှစ် ၂၀ အတွင်း နောက်ဆုံးရှိလာနိုင်သည့်စျေးနှုန်းမှာ ဒေါ်လာ ၅၄၂ ဘီလီယံ အထိဖြစ်နိုင်ကြောင်း ပါတီဝင်များမပါသော ကွန်ဂရက်လွှတ်တော်ဘတ်ဂျက်ရုံးက ခန့်မှန်းထားသည်။
အာကာသနှင့် ရေကြောင်းထောက်လှမ်းမှုသတိပေးချက်နှင့် ကာကွယ်ရေးအတွက် တာဝန်ယူပြီး ခရုဇ်ဒုံးကျည်များကို ထောက်လှမ်းပစ်ချနိုင်သည့် စနစ်ဖြစ်သည့် Norad အား ကနေဒါနှင့် အမေရိကန်တို့က ပူးပေါင်းလုပ်ဆောင်ထားပြီးသားဖြစ်သည်။
Noradသည်၁၉၅၈ခုနှစ်ကတည်းကတည်ရှိပြီး၎င်းစနစ်ကိုခေတ်မီစေရန်နှစ်မကြာသေးမီနှစ်များအတွင်းနိုင်ငံစလုံးကဆွေးနွေးမှုများပြုလုပ်ခဲ့သည်။
သတင်း-လင်းခေတ်
ကိုးကား- BBC