လပေါ်တက်ပြီး တန်ဖိုးကြီးရှားပါး ဓါတ်ငွေ့ထုတ်မယ့် ကုမ္ပဏီ
အမေရိကန်ကုမ္ပဏီတစ်ခုက လပေါ်တက်ပြီး စက်ရုပ်နဲ့ ဓါတ်ငွေ့တူးဖို့ ကြိုးစားနေပါတယ်။
ဆီယက်တဲလ်အခြေစိုက် Interlune ဆိုတဲ့ ကုမ္ပဏီက Helium-3 လို့ခေါ်တဲ့ ရှားပါးအိုင်ဆိုတုပ်ကို လပေါ်ကနေ ထုတ်ယူဖို့ လုပ်နေတာပါ။ ကမ္ဘာပေါ်မှာ တစ်ကီလိုကို ဒေါ်လာ သန်း ၂၀ ဈေးလောက် ပေါက်နေတဲ့ ဒီရှားပါးဓါတ်ငွေ့က လပေါ်မှာ ဖောချင်းသောချင်း ပေါပါတယ်။
Helium-3 က ရေဒီယိုသတ္တိကြွမဟုတ်တဲ့ non-radioactive အိုင်ဆိုတုပ်ဖြစ်ပြီး နျူကလီးယားဓါတ်ပေါင်းဖိုအတွက် သန့်စင်စွမ်းအင်လောင်စာအနေနဲ့အပြင် ဆေးဘက်ဆိုင်ရာ သုတေသနတွေနဲ့ ကွမ်တမ်ကွန်ပျူတာသုံး qubits လေးတွေရဲ့လုပ်ဆောင်ချက် တည်ငြိမ်စေဖို့အတွက်ပါ အရေးကြီးတဲ့ ဓါတ်ငွေ့တစ်မျိုးပါ။
ကမ္ဘာပေါ်မှာ အလွန့်ကို ရှားပြီး လပေါ်မှာ အလျှံပယ်ပေါတယ်ဆိုပေမယ့် ထုတ်လုပ်ဖို့အတွက် စရိတ်စက ၊ နည်းပညာအခက်အခဲနဲ့ ဈေးကွက်အနာဂါတ်မသေချာမှု ကြီးလွန်းပါတယ်။ ဒါကြောင့်ပဲ ဆယ်စုနှစ်ချီ ငွေအားနည်းပညာအားနဲ့ ရင်းနှီးနိုင်မယ့်ကုမ္ပဏီကြီးတွေပဲ လပေါ် တက်ပြီး Helium-3 ထုတ်ဖို့ စီမံကိန်းတွေ လုပ်ထားကြတာပါ။
Interlune ကုမ္ပဏီကတော့ လမျက်နှာပြင် အနက် ၁၀ ပေအထိ တူးနိုင်တဲ့ အဆင့်မြင့်စက်ယန္တရားကြီးတစ်ခု တည်ဆောက်နိုင်ပြီလို့ ဆိုပါတယ်။ ဒီမြေတူးစက်က တစ်နာရီကို လမြေသားတန် ၁၁၀ အထိ တူးထုတ်ပြီး Helium-3 ကို တခြားဒြပ်စင်တွေကနေ ခွဲထုတ်နိုင်တဲ့ နည်းပညာနဲ့ ခွဲထုတ်ယူမှာပါ။
လပေါ်မှာတင် Helium-3 သန့်စင်ပြီးမှ ကမ္ဘာမြေကို ပို့ဆောင်မယ်လို့ ဆိုပါတယ်။ စက်ယန္တရားအတွက် Vermeer ဆိုတဲ့ စက်ယန္တရားထုတ်လုပ်ရေးလုပ်ငန်းနဲ့လည်း လက်တွဲထားတယ်လို့ ဆိုပါတယ်။ Interlune CEO ရော့ဘ် မီယာဆန်ကတော့ ထုတ်လုပ်မှုစပြီဆို တစ်နှစ်ကို Helium-3 ကီလိုဂရမ်ဆယ်ဂဏန်း ကမ္ဘာကို ပို့နိုင်မယ်လို့ တွက်ထားပါတယ်။
ကုမ္ပဏီအနေနဲ့ ၂၀၂၉ ကစပြီး ဖောက်သည်တွေဆီ Helium-3 စတင် ပို့ဆောင်နိုင်မယ်လို့လည်း မျှော်မှန်းထားပါတယ်။