ဒေါ်လာ ၃၅ သန်းကျော် ပမာဏရှိ နိုင်ငံခြားရင်းနှီးမြှုပ်နှံမှု ၃ ခု ဝင်ရောက်လာ
ရန်ကုန်၊ မေ ၁၇
အမေရိကန်ဒေါ်လာ ၃၅.၇၇၈ သန်း ပမာဏရှိတဲ့ နိုင်ငံခြားရင်းနှီးမြှုပ်နှံမှု FDI လုပ်ငန်းသစ် ၃ ခု ဝင်ရောက်လာကြောင်း မြန်မာနိုင်ငံရင်းနှီးမြှုပ်နှံမှုကော်မရှင် MIC ကနေ သိရပါတယ်။
မေလ ၁၆ ရက်က ပြုလုပ်ခဲ့တဲ့ MIC အစည်းအဝေးမှာ လက်ရှိရင်းနှီးမြှုပ်နှံမှုလုပ်ငန်းတွေရဲ့ မတည်ငွေရင်း တိုးမြှင့်ခြင်းအပါအဝင် စက်မှုကဏ္ဍနဲ့ ဝန်ဆောင်မှုကဏ္ဍတို့မှ နိုင်ငံခြားရင်းနှီးမြှုပ်နှံမှု လုပ်ငန်းသစ် ၃ ခုနဲ့ စက်မှုကဏ္ဍမှ နိုင်ငံသားရင်းနှီးမြှုပ်နှံမှု လုပ်ငန်းသစ် ၆ ခုတို့ကို ခွင့်ပြုပေးခဲ့ပါတယ်။
ဒေါ်လာ ၃၅.၇၇၈ သန်းနဲ့ ကျပ် ၃၀၂၀၆.၉၂၀ သန်း ပမာဏရှိတဲ့ ပြည်တွင်း၊ ပြည်ပ ရင်းနှီးမြှုပ်နှံမှုလုပ်ငန်းတွေထဲမှာ ဆိုလာနဲ့ ဆက်စပ်ပစ္စည်းတွေ ထုတ်လုပ်ခြင်း၊ လျှပ်စစ်သွယ်တန်းခြင်းနဲ့ ဆက်စပ်တဲ့ လုပ်ငန်းတွေ၊ အရန်သင့်အစားအစာတွေ ပြင်ဆင်ထုတ်လုပ်ခြင်း၊ CMP စနစ်နဲ့ အထည်ချုပ်လုပ်ခြင်း၊ သံနဲ့ သံမဏိ အခြေခံပစ္စည်းတွေ ထုတ်လုပ်ခြင်းနဲ့ အခြားလုပ်ငန်းတွေ ပါဝင်လာပါတယ်။
၂၀၂၅ ခုနှစ်၊ ဧပြီလကုန်အထိ မြန်မာနိုင်ငံမှာ ရင်းနှီးမြှုပ်နှံထားတဲ့ နိုင်ငံ၊ ဒေသပေါင်း ၅၃ ခုအနက် စင်ကာပူနိုင်ငံ၊ တရုတ်နိုင်ငံနှင့် ထိုင်းနိုင်ငံတို့က ရင်းနှီးမြှုပ်နှံမှုအများဆုံးပြုလုပ်တဲ့ နိုင်ငံ၊ ဒေသတွေအဖြစ် ရပ်တည်နေပါတယ်။
စီးပွားရေးကဏ္ဍ ၁၂ ခုအနက် စွမ်းအင်ကဏ္ဍမှာ ၂၈.၃၄ ရာခိုင်နှုန်း၊ ရေနံနှင့် သဘာဝဓာတ်ငွေ့ကဏ္ဍမှာ ၂၄.၆၉ ရာခိုင်နှုန်း၊ ကုန်ထုတ်လုပ်မှုကဏ္ဍမှာ ၁၄.၄၉ ရာခိုင်နှုန်းနဲ့ အများဆုံး ဝင်ရောက်ရင်းနှီးမြှုပ်နှံထားကြောင်း DICA ရဲ့ အချက်အလက်တွေအရ သိရပါတယ်။