အင်ဒိုနီးရှား မီးတောင်ပေါက်ကွဲမှု အမြင့်ဆုံးသတိပေးချက် ထုတ်ပြန်
ဂျကာတာ၊ မေ-၁၉-၂၀၂၅
ရတီ(VOM)
အင်ဒိုနီးရှားနိုင်ငံမှာ သီတင်းပတ်ကုန်ပိုင်းက ရှစ်ကြိမ်တိုင်ပေါက်ကွဲခဲ့တဲ့ လီဝိုတီဘီ လာကီ-လာကီ မီးတောင်နဲ့ပတ်သက်တဲ့ သတိပေးချက်အဆင့်ကို အမြင့်ဆုံး တိုးမြှင့်လိုက်တယ်လို့ တာဝန်ရှိသူတွေက ပြောပါတယ်။
နိုင်ငံအရှေ့ပိုင်း ဖလောရက်စ်ကျွန်းမှာတည်ရှိတဲ့ အဲဒီမီးတောင်ဟာ တနင်္ဂနွေနေ့ကလည်း အမြင့် ၃ မီတာကနေ ၅ ဒဿမ ၅ ကီလိုမီတာအမြင့်ထိ မီးတောင်ပြာတွေ မှုတ်ထုတ်ခဲ့ပါတယ်။ ငလျင်ဌာနရဲ့ လေ့လာအကဲဖြတ်ချက်တွေအရ မီးတောင်ရဲ့လှုပ်ရှားမှုတွေ မြင့်တက်နေတဲ့အတွက် မနေ့ည ၈ နာရီကစပြီး သတိပေးချက်ကို တိုးမြှင့်လိုက်တာလို့ ဆိုပါတယ်။
ဒီနေ့မနက်မှာလည်း မီးတောင်ဟာ ထပ်မံပေါက်ကွဲခဲ့ပြီး အမြင့် ၁ ဒဿမ ၂ ကီလိုမီတာအထိ မီးတောင်ပြာတွေ မှုတ်ထုတ်ခဲ့တယ်လို့ မီးတောင်ဌာနက ထုတ်ပြန်ပါတယ်။ မီးတောင်ကနေ ၆ ကီလိုမီတာပတ်လည်မှာ အန္တရာယ်ရှိပြီး မိုးသည်ထန်စွာ ရွာသွန်းမှုတွေကြောင့် မီးတောင်၀ကနေ ချော်ရည်ပူတွေ ဆီးကျလာမယ့် အန္တရာယ်ကိုလည်း သတိပေးထားပါတယ်။
လက်ရှိ မီးတောင်ပေါက်ကွဲမှုကြောင့် ဒေသခံတွေကို ဘေးလွတ်ရာ ရွေ့ပြောင်းတာနဲ့ လေယာဉ်ခရီးစဉ် ဖျက်သိမ်းရတာတွေ မရှိသေးဘူးလို့ ဒေန္တရတာဝန်ရှိသူတွေက ပြောပါတယ်။ မတ်လအတွင်းကလည်း အဲဒီမီးတောင်ပေါက်ကွဲမှုကြောင့် ဩစတြေးလျ ဂျက်စတားလေကြောင်းလိုင်းနဲ့ ကာတာလေကြောင်းလိုင်းအပါအဝင် ဘာလီကိုပျံသန်းမယ့် လေယာဉ်ခရီးစဉ်တွေကို ဖျက်သိမ်းခဲ့ရပါတယ်။
အင်ဒိုနီးရှားနိုင်ငံဟာ ပစိဖိတ်ငလျင်ကြောကြီးပေါ်မှာ တည်ရှိပြီး ငလျင်လှုပ်ခတ်မှုတွေနဲ့ မကြာခဏ ရင်ဆိုင်နေရတဲ့ နိုင်ငံဖြစ်ပါတယ်။ ပြီးခဲ့တဲ့နှစ် နိုဝင်ဘာကလည်း မီးတောင်ပေါက်ကွဲမှုကြောင့် လူကိုးယောက်ထက်မနည်း သေဆုံးပြီး ထောင်နဲ့ချီပြီး ဘေးလွတ်ရာ ရွေ့ပြောင်းခဲ့ရပါတယ်။