#ပြည်တွင်းသတင်း
◼ ယမန်နေ့ညလှုပ်ခတ်သည့်ငလျင်မှာလည်း အသိသာဆုံးနှင့်အချိန်ကြာမြင့်စွာလှုပ်ခတ်ခဲ့ဟုဆို
မန္တလေးမြို့၌ ယမန်နေ့(မေ ၁၇ ရက်) ညကလှုပ်ခတ်ခဲ့သည့်ငလျင်မှာ မတ်လ ၂၈ ရက်ကလှုပ်ခတ်ခဲ့သည့်ငလျင်ပြီးလျှင် အသိသာဆုံးနှင့်အချိန်ကြာမြင့်စွာလှုပ်ခတ်ခဲ့သည့်ငလျင်ဖြစ်ကြောင်း မန္တလေးမြို့ရှိ ဒေသခံများကပြောသည်။
ယမန်နေ့ည ၁၀ နာရီ ၂၄ မိနစ် ၄၈ စက္ကန့်တွင်၊ မန္တလေးတိုင်း၊ ကျောက်ဆည်ခရိုင်၊ မြစ်သားမြို့၏ အနောက်တောင်ဘက် ၆ မိုင်ခန့်အကွာဗဟိုပြု၍ အင်အားရစ်ချ်တာစကေး ၅ ဒသမ ၂ အဆင့်ရှိငလျင် တစ်ခုလှုပ်ခတ်ခဲ့ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနကထုတ်ပြန်သည်။
“ပြီးခဲ့တဲ့မတ်လ ၂၈ ရက်ကလှုပ်ခဲ့တဲ့ငလျင်ပြီးရင် အခုလှုပ်တဲ့ငလျင်ကအပြင်းဆုံးနဲ့ အကြာဆုံးငလျင် လို့ပြောလို့ရတယ်။ ငလျင်လှုပ်တာကို မန္တလေးတစ်မြို့လုံးသိရှိခံစားရတယ်။ ရှေ့နောက်ဒုတ်ကနဲ စောင့်လှုပ်ပြီး ၁၀ စက္ကန့်လောက်ရမ်းတာ” ဟု မန္တလေးမြို့မှဒေသခံတစ်ဦးကပြောသည်။
အဆိုပါငလျင်လှုပ်ခတ်မှုကို မန္တလေးမြို့အပါအဝင် တံတားဦး၊ မြို့သာ၊ မတ္တရာ၊ မိုးကုတ်၊ ပြင်ဦးလွင်၊ ကျောက်ဆည်၊ စဉ့်ကိုင်၊ မြစ်သား၊ နွားထိုးကြီး၊ ဝမ်းတွင်း စသည့်မြို့များတွင်လည်း သိသိသာသာ ခံစားခဲ့ရကြောင်း သိရသည်။
“ကျွန်တော်တို့လည်းသိသိသာသာခံစားရတယ်။ တော်တော်လည်းပြင်းပါတယ်။ လှုပ်တာကြားလည်း ကြားတယ်။ လှုပ်တဲ့အချိန်ကလည်းအကုန်အိပ်ရာထဲလှဲနေချိန်ဆိုတော့ ပိုသိသာတာလေ။ တချို့ဆို ကြောက်လို့အပြင်ကိုထွက်ပြေးကြတယ်။ နောက်တော့လမ်းပေါ်မှာလူတွေပိုများလာတယ်" ဟု ကျောက်ဆည်မြို့မှဒေသခံတစ်ဦးကပြောသည်။
ထို့ပြင် စဉ့်ကိုင်မြို့မှဒေသခံတစ်ဦးကလည်း မတ်လ ၂၈ ရက်နေ့နောက်ပိုင်းမှစတင်ကာ ငလျင်မလှုပ် သည့်နေ့တစ်နေ့မှမရှိကြောင်း၊ အင်းအားအနည်းအများသာကွာခြားသည်ဟုဆိုသည်။
မတ် ၂၈ ရက်ကအင်အား ၇ ဒသမ ၇ အဆင့်ရှိအင်အားပြင်းငလျင်လှုပ်ခတ်ခဲ့ပြီးနောက် နောက်ဆက်တွဲ ငလျင်လှုပ်ခတ်မှု အကြိမ်ရေ(၁၇၀) ကျော်ရှိကြောင်းမိုးဇလက ထုက်ပြန်ထားသည်။
သတင်း - ပိုင်လေး
