#နိုင်ငံတကာသတင်း
◼ရုရှားအဆိုပြုခဲ့သော ယူကရိန်းငြိမ်းချမ်းရေးဆွေးနွေးပွဲသို့ ပူတင်နှင့် ထရန့် မတက်
ယနေ့တွင် တူရကီနိုင်ငံ၌ ကျင်းပမည့် မော်စကိုနှင့် ကိဗ်ကြားက သုံးနှစ်အတွင်းပထမဆုံးအကြိမ်ဖြစ်မည့် တိုက်ရိုက်ဆွေးနွေးပွဲသို့ တက်ရောက်မည်မဟုတ်ကြောင်း အမေရိကန်သမ္မတ နှင့် ရုရှားသမ္မတတို့က ဖော်ပြခဲ့ကြပြီး ကရင်မလင်ကလည်း ယင်းဆွေးနွေးပွဲသို့ အတွေ့အကြုံရင့်ကျက်သော နိုင်ငံရေးပိုင်းကျွမ်းကျင်သူများကို စေလွှတ်ခဲ့သည်။
တူရကီနိုင်ငံ၊ အစ္စတန်ဘူလ်မြို့၌ယနေ့တွင် မည်သည့်ကြိုတင်သတ်မှတ်ချက်မှ မထားဘဲ ယူကရိန်းနှင့် တိုက်ရိုက်ဆွေးနွေးသွားရန် တနင်္ဂနွေနေ့တွင် ပူတင်က အဆိုပြုခဲ့သည်။
ဆွေးနွေးပွဲတက်မည့် ရုရှားကိုယ်စားလှယ်အဖွဲ့တွင် သမ္မတရုံးအကြံပေး ဗလာဒီမာမီဒင်စကီး ၊ ဒုတိယကာကွယ်ရေးဝန်ကြီး အလက်ဇန်းဒါး ဖိုမင် တို့ ပါဝင်မည်ဖြစ်ကြောင်း ကရင်မလင်က ပြောကြားခဲ့ပြီး သမ္မတ ပူတင် ပါဝင်ခြင်းမရှိပေ။
ကရင်မလင်က ကိုယ်စားလှယ်အဖွဲ့ကို ကြေညာပြီးနောက် ဒေါ်နယ်ထရန့်က အစ္စတန်ဘူလ်ဆွေးနွေးပွဲကို တက်ရောက်မည်မဟုတ်ကြောင်း အမေရိကန်အရာရှိတစ်ဦး က ပြောကြားသည်။
၎င်းအနေဖြင့် ဆွေးနွေးမှုတွင် ပါဝင်ရန် ကြိုးစားနေကြောင်း အရှေ့အလယ်ပိုင်းတွင် သုံးနိုင်ငံအလည်အပတ်ခရီးသွားနေသော အမေရိကန်သမ္မတ က ယခင်က ပြောကြားခဲ့သည်။
လူကိုယ်တိုင်တက်ရောက်မည်ဆိုသည်ကို ပူတင် က မည်သည့်အချိန်ကမျှအတည် မပြုခဲ့သော်လည်း ရုရှားနှင့်အမေရိကန်သမ္မတနှစ်ဦး ပါဝင်မလာခြင်းကြောင့် ၂၀၂၂ ခုနှစ် ဖေဖော်ဝါရီလတွင် ရုရှားက စတင်ခဲ့သော စစ်ပွဲအဆုံးသတ်ရေး လမ်းစ ရရှိရန် မျှော်လင့်ချက်များ လျော့ကျသွားခဲ့သည်။
ပူတင်အနေဖြင့် ကြောက်ရွံ့မှုမရှိပါက ယင်းဆွေးနွေးပွဲသို့ တက်ရောက်ရန် ယူကရိန်းသမ္မတ ဇီလန်စကီး က စိန်ခေါ်ခဲ့ပြီး ယင်းမှာ ယူကရိန်းနှင့် ရုရှားကြား မည်သူက ငြိမ်းချမ်းရေးပိုမိုလိုလားကြောင်းကို အ မေ ရိကန်သမ္မတအား ပြသရန် ရည်ရွယ်ခြင်းဖြစ်သည်။
ယူကရိန်းခေါင်းဆောင်က ဗုဒ္ဓဟူးနေ့ညပိုင်းတွင် တူရကီသို့ ထွက်ခွာသွားခဲ့သော်လည်း ပူတင်တက်ရောက်လာမှသာ ဇီလန်စကီးလည်း ဆွေးနွေးပွဲသို့ တက်မှာဖြစ်ကြောင်း ယူကရိန်းအရာရှိတစ်ဦးက ပြောကြားသည်။
တူရကီဆွေးနွေးပွဲတွင် ပူတင်တက်ရောက်လာကြောင်း သေချာပြီးမှသာ တူရကီငြိမ်းချမ်းရေးဆွေးနွေးပွဲ၌ ၎င်းတို့လုပ်ဆောင်မည့် အဆင့်များကို ယူကရိန်းက ဆုံးဖြတ်သွားမည်ဖြစ်ကြောင်း ယမန်နေ့ညက ပြောကြားခဲ့သည့် ညစဉ်မိန့်ခွန်းတွင် ဇီလန်စကီး က ပြောသည်။
ရက် ၃၀ အပစ်အခတ်ရပ်စဲရေးတွင် နှစ်ဖက်စလုံးပါဝင်လာရေးကို အမေရိကန်သမ္မတ ဒေါ်နယ်ထရန့် ကအလိုရှိပြီး ဇီလန်စကီးကလည်း ထောက်ခံကြောင်း သိရသည်။
ရုရှားသမ္မတကမူ ထိုသို့ အပစ်အခတ်ရပ်စဲရေးအတွက် အသေးစိတ်များကို ညှိနှိူင်းရန် ဆွေးနွေးမှုကို ဦးစွာ လုပ်ဆောင်လိုခြင်းဖြစ်သည်။
တူရကီသို့ သွားရောက်မည့်အမေရိကန်ကိုယ်စားလှယ်အဖွဲ့တွင် နိုင်ငံခြားရေးဝန်ကြီး မာကိုရူဘီယို နှင့် အတူ အထူးကိုယ်စားလှယ်များဖြစ်သော စတိဗ်ဝစ်ကော့ဖ် နှင့် ကိသ်ကဲလော့ တို့လည်း ပါဝင်သည်။
အမေရိကန်နိုင်ငံခြားရေး ရူဘီယို နှင့် တွေ့ဆုံကာ ဇီလန်စကီး၏ ငြိမ်းချမ်းရေးမျှော်မှန်းချက်ကို မျှဝေခဲ့ကြောင်း ယူကရိန်းနိုင်ငံခြားရေးဝန်ကြီး အန်ဒရီးလ် ဆိုင်ဘီဟာ က ယနေ့နံနက်ပိုင်းတွင် ပြောကြားသည်။
ရှရှားကိုယ်စားလှယ်အဖွဲ့တွင် ပါဝင်သော မစ္စတာမီဒင်စကီး နှင့် ဖိုမင်တို့မှာ စစ်ပွဲစတင်ပြီးနောက် ပထမဆုံးသီတင်းပတ်များတွင် နှစ်ဖက်ဆွေးနွေးမှုများ၌ ပါဝင်ခဲ့သူများ ဖြစ်ကြောင်း သိရပြီး ၎င်းတို့နှင့်အတူ အခြား စစ်ဘက်အရာရှိကြီးများ ၊ထောက်လှမ်းရေး အရာရှိများလည်း ပါဝင်ကြောင်း သိရသည်။
