#နိုင်ငံတကာသတင်း
◼ အပစ်အခတ်ရပ်စဲရေးသဘောမတူပါက ပိတ်ဆို့မှုအသစ်များနှင့် ရုရှားရင်ဆိုင်ရမည်ဟု ပြင်သစ်သမ္မတပြော
မော်စကိုက အပစ်အခတ်ရပ်စဲရေးကို သဘောမတူခဲ့ပါက ရှေ့လာမည့်ရက်များတွင် ရုရှားအပေါ် တားဆီးပိတ်ဆို့မှုအသစ်များ ချမှတ်သွားရေးကို လိုလားကြောင်း ပြင်သစ်သမ္မတ အီမန်နျူယယ်မက်ခရွန် က ယမန်နေ့က ပြောကြားခဲ့ကာ ဘဏ္ဍာရေးလုပ်ငန်းများ နှင့် ရေနံနှင့်ဓာတ်ငွေ့လုပ်ငန်းတို့မှာ ပစ်မှတ်များဖြစ်နိုင်ကြောင်း ပြောသည်။
အပစ်အခတ်ရပ်စဲရေးအကောင်အထည်ဖော်ရန် မော်စကိုကငြင်းဆန်ခဲ့ပါက ရှေ့လာမည့်ရက်များတွင် ရုရှားအပေါ် တားဆီးပိတ်ပင်မှုအသစ်များ ချမှတ်သွားရန် ရည်မှန်းထားပြီး ယင်းအတွက်လည်း မိမိတို့ ပူးပေါင်းလုပ်ဆောင်နေကြကြောင်း မက်ခရွန် က TF1 ရုပ်သံနှင့် တွေ့ဆုံမေးမြန်းမှု၌ ပြောကြားသည်။
မက်ခရွန်၏မှတ်ချက်များသည် ယမန်နေ့ကပင် ဂျာမနီအဓိပတိ ဖရက်ဒရစ်မားစ် ပြောကြားခဲ့သည့် မှတ်ချက်များကို ပဲ့ထင်ထပ်ခဲ့သည်။
ရုရှားသမ္မတ ပူတင်က အပစ်အခတ်ရပ်ရေးကို သဘောမတူခဲ့ပါက ရုရှားအပေါ် တားဆီးပိတ်ဆို့မှုများအား ပိုမိုတင်းကျပ်သွားရေး ဥရောပမဟာမိတ်များက လုပ်ဆောင်သွားမည်ဟုမားဇ် က ပြောကြားခဲ့ခြင်းဖြစ်သည်။
စွမ်းအင် နှင့် ဘဏ္ဍာရေးကဏ္ဍများကို ပစ်မှတ်ထားသွားနိုင်ကြောင်းကိုလည်း ဂျာမနီခေါင်းဆောင်က ပြောသည်။
ယင်းနယ်ပယ်များတွင် ပိတ်ဆို့တားဆီးမှုအသစ်များကို အဆိုပြုပေးရန် ဥရောပကော်မရှင်ကို တောင်းဆိုထားကြောင်း ပြင်သစ်နိုင်ငံခြားရေးဝန်ကြီး ဂျင်နိုဝယ်ဘာရော့ က တနင်္လာနေ့တွင် ပြောသည်။
ရက် ၃၀ အပစ်ရပ်ရေး တောင်းဆိုမှုများအား ရက်ပိုင်းအတွင်း မနာခံခဲ့ပါက ရုရှားအပေါ် ဒဏ်ခတ်ရေးအစီအစဉ်သစ်များ ချမှတ်သွားမည်ဖြစ်ကြောင်း ဗြိတိန်၊ ပြင်သစ်၊ ဂျာမနီ နှင့် ပိုလန် ခေါင်းဆောင်များက စနေနေ့တွင် ပြောကြားခဲ့သည်။
သို့သော် ယင်းကြုံးဝါးမှုက မစ္စတာပူတင်အား မလှုပ်ခတ်စေခဲ့ဘဲ ယင်းအစား မေ ၁၅ ရက်တွင် တူရကီနိုင်ငံ ၊ အစ္စတန်ဘူလ်မြို့တွင် ယူကရိန်းနှင့်တိုက်ရိုက်ဆွေးနွေးသွားရန် ပူတင်ကကမ်းလှမ်းခဲ့ရာ အမေရိကန်သမ္မတ ဒေါ်နယ်ထရန့်က ထောက်ခံခဲ့သည်။
ယင်းနှင့်အတူ ၎င်းတို့၏ ခြိမ်းခြောက်မှုကို ဒေါ်နယ်ထရန့် က လက်ခံကြောင်းပြသရန် ဥရောပခေါင်းဆောင်များ၏ ကြိုးပမ်းမှုများလည်း အရာမထင်ဖြစ်သွားခဲ့ရသည်။
ယူကရိန်းစစ်ပွဲနှင့်ပတ်သက်၍ ရုရှားအပေါ် အီးယူက တားဆီးပိတ်ပင်မှု ၁၆ ကြိမ် လုပ်ဆောင်ထားခဲ့ပြီးနောက်တွင် ပိတ်ဆို့မှုအစီအစဉ်သစ်များ ချမှတ်ရေးနှင့်ပတ်သက်၍ အီးယူ ၂၇ နိုင်ငံကြား တစ်လေသံတည်းဖြစ်ရန် ပိုမိုခက်ခဲလာခဲ့ကြောင်း သံတမန်များက ပြောကြားကြသည်။
သတင်း-ရဲမင်း
ကိုးကား-Reuters
