MPT နှင့် ဆက်သွယ်ရေးလုပ်ငန်းဆိုင်ရာ သဘောတူညီချက်ကို ပြင်ဆင်
- ပံ့ပိုးကူညီမှုများ လျှော့ချရန် စဉ်းစားသွားမည်ဟု ဆူမီတိုမိုကော်ပိုရေးရှင်း ထုတ်ပြန်
ရန်ကုန်၊ မေ ၁၄
မြန်မာနိုင်ငံမှာ မြန်မာ့ဆက်သွယ်ရေးလုပ်ငန်း (MPT) နဲ့ ဆက်သွယ်ရေးလုပ်ငန်းဆိုင်ရာ သဘောတူညီချက်ကို ပြင်ဆင်ကြောင်း ဂျပန်စီးပွားရေးကော်ပိုရေးရှင်း ဆူမီတိုမိုက ထုတ်ပြန်လာပါတယ်။
MPT နဲ့ ပူးပေါင်းပြီး တယ်လီဖုန်းဆက်သွယ်ရေးလုပ်ငန်းတွေကို ဆောင်ရွက်ရာမှာ KDDI Summit Global Myanmar (KSGM) ရဲ့ ပံ့ပိုးကူညီမှုအတိုင်းအတာကို ကန့်သတ်ထားကြောင်း ဆူမီတိုမိုကော်ပိုရေးရှင်းက ဆိုပါတယ်။
ဆယ်နှစ်အတွင်း အားထုတ်ကြိုးပမ်းမှုတွေ မှန်မှန်တိုးတက်လာတာနဲ့အမျှ ပြင်ဆင်ထားတဲ့ သဘောတူညီချက်က မိမိတို့ရဲ့ ပံ့ပိုးကူညီမှုနဲ့ စေလွှတ်ထားတဲ့ ဝန်ထမ်းအရေအတွက်ကို လျော့နည်းစေတယ်လို့ ဆိုပါတယ်။
MPT ရဲ့ နောက်ထပ်ဖွံ့ဖြိုးတိုးတက်မှုနဲ့အတူ မိမိတို့ရဲ့ ပံ့ပိုးကူညီမှုကို လျော့ချဖို့ စဉ်းစားသွားမယ်လို့လည်း ဂျပန်ကော်ပိုရေးရှင်းက အသိပေးထားပါတယ်။
အခုလို သဘောတူညီချက်ကို ပြင်ဆင်လိုက်ပေမယ့် လူသားချင်းစာနာထောက်ထားမှု အကူအညီအဖြစ် ငလျင်ဒဏ်ခံခဲ့ရတဲ့ ဒေသများအတွက် ပြန်လည်ထူထောင်ရေးလုပ်ငန်းတွေကို ဆက်လက်ပံ့ပိုးပေးသွားမယ်လို့ ဆိုပါတယ်။
နှစ်ဖက်သဘောတူညီမှုပြင်ဆင်ချက်နဲ့ ပံ့ပိုးကူညီမှုနယ်ပယ်ကို ကန့်သတ်ထားပေမယ့် KSGM အနေနဲ့ ဒေါ်လာအခြေခံ ရဖို့ရှိတဲ့ ငှားရမ်းခတွေကို စုဆောင်းရယူဖို့ ဆက်လက်ကြိုးပမ်းသွားမယ်လို့ သိရပါတယ်။
ဆူမီတိုမိုကော်ပိုရေးရှင်းအနေနဲ့ စီးပွားရေးအခြေအနေများကို ထည့်သွင်းစဉ်းစားကာ မြန်မာနိုင်ငံမှာ ပြောင်းလဲလာတဲ့ အခြေအနေတွေကို ဆက်လက်စောင့်ကြည့်ပြီး သင့်လျော်တဲ့ လုပ်ဆောင်ချက်တွေကို ဂရုတစိုက် စဉ်းစားဆောင်ရွက်သွားမယ်လို့ ထုတ်ပြန်ထားပါတယ်။
MPT အနေနဲ့ လိုအပ်တဲ့ ကွန်ရက်ဧရိယာတိုးချဲ့ခြင်းနဲ့ နည်းပညာသစ်တွေ အသုံးပြုတဲ့ ကွန်ရက်ချိတ်ဆက်မှုတွေ ပြုလုပ်နိုင်ဖို့ KDDI ၊ Sumitomo အစရှိတဲ့ ကုမ္ပဏီတွေနဲ့ အကျိုးတူပူးပေါင်းတဲ့စာချုပ်ကို ၂၀၁၄ ဇူလိုင်လမှာ သဘောတူလက်မှတ် ရေးထိုးခဲ့တာပါ။
MPT မှာ KDDI နဲ့ Sumitomo တို့က အမေရိကန်ဒေါ်လာ ၂ ဘီလီယံကျော် ရင်းနှီးမြှုပ်နှံခဲ့ကြပြီး ဒီရင်းနှီးမြှုပ်နှံမှုက မြန်မာနိုင်ငံမှာ အကြီးမားဆုံးသော ဂျပန်ရင်းနှီးမြှုပ်နှံမှုတစ်ခုအဖြစ်လည်း မှတ်တမ်းဝင်ခဲ့ပါတယ်။
၂၀၂၃-၂၀၂၄ ဘဏ္ဍာနှစ်မှာ MPT ၏ နိုင်ငံခြားသားရှယ်ယာရှင် ဂျပန်ကုမ္ပဏီ ၂ ခု ဒေါ်လာသန်း ရာနှင့်ချီ အရှုံးပေါ်ခဲ့ပြီး ဒေါ်လာသန်း ၆၉၀ (ယန်း ၁၀၅ ဘီလီယံ) ကို ရယူနိုင်ဖို့ မသေချာတဲ့ ရငွေတွေအဖြစ် မှတ်တမ်းတင်ခဲ့ပါတယ်။
သတင်း - BETV Business
