ဂျက်အင်ဂျင်နဲ့ မောင်းနှင်တဲ့ မိုးပျံ မော်တော်ဆိုင်ကယ်
==============================
ကားလမ်းပိတ်တဲ့ မြို့တော်တွေမှာ မိုးပျံကားနဲ့ မိုးပျံ မော်တော်ဆိုင်ကယ်တွေဟာ အလွန် အသုံးဝင်လာမှာ ဖြစ်ပါတယ်။
အခုတော့ ဒီဇိုင်းဆန်းသစ်တဲ့ မိုးပျံမော်တော်ဆိုင်ကယ်ကို Jetson ကို ပူးတွဲ တည်ထောင်ထားတဲ့ Tomasz Patan က တီထွင်လိုက်ပါတယ်။ Volonaut Airbike လို့ နာမည်ပေးထားပြီး ဂျက်အင်ဂျင် တပ်ဆင်ထားပါတယ်။ အမြန်ဆုံး အနေနဲ့ တစ်နာရီကို ၂၀၀ ကီလိုမီတာ (တစ်နာရီကို ၁၂၄ မိုင်) မောင်းနှင်ပါတယ်။ ကွန်ပြူတာ စနစ်က မော်တော်ဆိုင်ကယ်ကို ဟန်ချက်ညီအောင်ထိန်းညှိပေးနိုင်ပါတယ်။
စီးသူက မော်တော်ဆိုင်ကယ် စတိုင် ထိုင်ခုံမှာ ထိုင်စီးရမှာ ဖြစ်ပြီး ၃၆၀ ဒီဂရီ မြင်ကွင်းကျယ်ကို တွေ့မြင်နိုင်ပါတယ်။ အလွန်ပေါ့ပါးတဲ့ ကာဘွန်ဖိုက်ဘာနဲ့ 3D Printed အစိတ်အပိုင်းတွေနဲ့ တည်ဆောက်ထားပြီး သာမာန် မော်တော်ဆိုင်ကယ်တွေထက် ၇ ဆလောက်ပေါ့ပါးပါတယ်။
Airbike ကို ပိုမိုကောင်းမွန်အောင် ဆက်လက် တီထွင်မှာ ဖြစ်ပြီး ကုမ္ပဏီက ရောင်းချမယ့် အချိန်ကို မပြောသေးပါဘူး။
Ref : Tech Explorers
