အသက် ၈၅ နှစ် ပြည့်ပြီးတဲ့ သက်ကြီးရွယ်အိုတွေကို လူမှုရေးပင်စင် ထောက်ပံ့မယ်
မေ ၁၂ - ၂၀၂၅
SN (VOM)
၁၉၄၀ ခုနှစ်၊ ဧပြီ ၁ ရက်နေ့ (၁၃၀၁ ခုနှစ်၊ တပေါင်းလဆုတ် ၁၀ ရက်) မတိုင်မီ မွေးဖွားခဲ့တဲ့ အသက် ၈၅ နှစ် ပြည့်ပြီး သက်ကြီးရွယ်အိုတွေကို လူမှုရေးပင်စင် ထောက်ပံ့မယ်လို့ နစက က ထုတ်ပြန် ကြေညာထားပါတယ်။
၂၀၂၄ - ၂၀၂၅ ဘဏ္ဍာနှစ် ဘတ်ဂျက်နဲ့ လူမှုရေးပင်စင် ထောက်ပံ့ပေးမှာဖြစ်ပြီး အခု မေလမှာ စာရင်းတောင်းယူခြင်းဖြစ်ကာ အဲဒီစာရင်းကို သက်ဆိုင်ရာ ရပ်ကွက်/ကျေးရွာအုပ်ချုပ်ရေးမှူး (ဒါမှမဟုတ်) နီးစပ်ရာ လူမှုဝန်ထမ်းရုံးတွေမှာ လာမယ့် မေ ၃၁ ရက်နေ့ နောက်ဆုံးထားပြီး စာရင်းပေးသွင်းရမှာ ဖြစ်တယ်လို့ ဆိုပါတယ်။
အသက် ၈၅ နှစ် ပြည့်ပြီးသူတွေ အနေနဲ့ လူမှုရေးပင်စင် ခံစားခွင့်အတွက် တလ တသောင်းကျပ် ရရှိမှာဖြစ်ပြီး အဲဒီငွေကို သုံးလ တကြိမ် စုပေါင်း ထုတ်ယူရမှာဖြစ်တယ်လို့ သိရပါတယ်။
“ဒီပိုက်ဆံ ပမာဏကလည်း တကယ်တမ်း တွက်ကြည့်၊ ဒီခေတ် ကုန်ဈေးနှုန်းနဲ့ဆို တရက်စာ ဈေးဖိုးတောင် မရှိဘူး။ ပြီးတော့ ၈၅ နှစ်ကျော်မှ ဆိုတော့ ဒီအသက်အရွယ်တွေက ရှိနိုင်ခြေ နည်းတယ်လေ။ တကယ် ထောက်ပံ့ချင်တယ်ဆိုရင် ၆၀ ကျော်ဝန်းကျင်လောက်ဆို တော်သေးတယ်။ မစားနိုင်၊ မသွားနိုင် အရွယ်တွေ ပေးတာထက် စားနိုင်၊ သွားနိုင်တုန်းလေး ပေးတာတော်သေးတယ်။ ဒါပေမယ့် သူတို့က ပေးမယ်သာ ပြောပြောပြီး စာရင်းတွေ တောင်းနေတာ။ အရင်တခေါက်ကလည်း ဒီလိုပဲ စာရင်းတောင်းပြီး ခုထိ မပေးသေးဘူး” လို့ ပြည်သူတယောက်က ပြောပါတယ်။
မြန်မာနိုင်ငံမှာ သက်ကြီးရွယ်အို ဦးရေ ၆ ဒသမ ၃ သန်းကျော်ရှိပြီး အဲဒီထဲက အသက် ၈၅ နှစ်နဲ့အထက် သက်ကြီးရွယ်အို နှစ်သိန်းလေးသောင်း ရှစ်ထောင့်ကိုးရာ တဆယ့်တယောက် ရှိတယ်လို့ ပြည်သူ့အင်အား ဦးစီးဌာနမှ သိရပါတယ်။
ဒါအပြင် နစကအနေနဲ့ ကိုယ်ဝန်ဆောင်မိခင်နဲ့ ၎င်းမှ မွေးဖွားထားတဲ့ အသက် ၂ နှစ်အောက် ကလေးသူငယ်တွေကိုလည်း ငွေကြေးထောက်ပံ့‌ခြင်း အစီအစဉ် (MCCT) ပြုလုပ်ပေးသွားမှာဖြစ်တယ်လို့ ကြေညာထားပြီး ကိုယ်ဝန်ဆောင် မိခင်တွေဟာ ၂၀၂၅ ခုနှစ်၊ ဇွန်လ ၃၀ ရက်နေ့အထိ ကိုယ်ဝန်ဆောင် အဖြစ် ရှိနေသူတွေ ဖြစ်ရမှာဖြစ်တယ်လို့ သိရပါတယ်။
ဒီအစီအစဉ်မှာ တိုင်းဒေသကြီး၊ ပြည်နယ် ငါးခုဖြစ်တဲ့ ကရင်ပြည်နယ်၊ ကယားပြည်နယ်၊ နာဂကိုယ်ပိုင် အုပ်ချုပ်ခွင့်ရဒေသ၊ ရှမ်းပြည်နယ်နဲ့ ဧရာဝတီတိုင်းအတွင်း နေထိုင်သူတွေ ပါဝင်မှာဖြစ်ပြီး တယောက်ကို တလ ကျပ် တသောင်းခွဲနှုန်းနဲ့ သုံးလစာ ထောက်ပံ့ကြေး ရရှိမှာဖြစ်တယ်လို့ သိရပါတယ်။
MCCT အစီအစဉ် ခံစားခွင့်ရရှိနိုင်ဖို့ သက်ဆိုင်ရာ ရပ်ကွက်/ကျေးရွာအုပ်ချုပ်ရေးမှူး (ဒါမှမဟုတ်) နီးစပ်ရာ လူမှုဝန်ထမ်းရုံးတွေမှာ လာမယ့် ဇွန်လ ၂၅ ရက်နေ့ နောက်ဆုံးထားပြီး စာရင်းပေးသွင်းနိုင်တယ်လို့ သိရပါတယ်။
“ပြီးခဲ့တဲ့ တခေါက်တုန်းကလည်း ထောက်ပံ့ကြေးရမယ်ဆိုလို့ ရပ်ကွက် အုပ်ချုပ်ရေးမှူးရုံးကို သွားပြီး စာရင်း ပေးခဲ့ရသေးတယ်။ ကလေးကို သူတို့ဖုန်းနဲ့ ဓာတ်ပုံရိုက်တယ်။ ကလေး နာမည်၊ မွေးနေ့ ၊ အဖေ၊ အမေ နာမည်၊ အိမ်လိပ်စာတွေ မေးတယ်။ ပြီးတော့ ဖုန်းနံပါတ်တောင်းတယ်။ ဒါပေမယ့် အခုထိ ထောက်ပံ့ကြေး လုံးဝ မရသေးဘူး။ အုပ်ချုပ်ရေးမှူးရုံးကို မေးကြည့်တော့လည်း ရရင် အကြောင်းကြားမယ်၊ ဖုန်းဆက်မယ်ပဲ ပြောတာ။ တိတိကျကျ ဘာမှ မေးလို့မရဘူး။ ဒီတခေါက်လည်း လာပြန်ပြီ။ အရင်တခေါက် ထောက်ပံ့ကြေးတောင် စာရင်းတွေအကုန်မှတ်သွားပြီး ခုထိ မပေးသေးတာ။ ဒီတခေါက်ကရော ဘာလုပ်ကြဦးမလဲ မသိဘူး” လို့ ကလေးမိခင်တယောက်က ပြောပါတယ်။
နစကအနေနဲ့ ပြီးခဲ့တဲ့ ဖေဖော်ဝါရီလအတွင်းက အသက် ၇၀ ကျော်အရွယ် သက်ကြီးရွယ်အိုတွေနဲ့ ကိုယ်ဝန်ဆောင်မိခင်တွေ၊ အသက် ၅ နှစ်အောက် ကလေးသူငယ်တွေကို ထောက်ပံ့ကြေး ပေးမယ်လို့ ကြေညာခဲ့ပြီး ရပ်ကွက် အုပ်ချုပ်ရေးမှူးရုံးတွေမှာ စာရင်းပေးသွင်းဖို့ အသိပေးခဲ့တာ ဖြစ်ပါတယ်။
ဒါပေမယ့် စာရင်း ပေးသွင်းပြီးသူတွေ အနေနဲ့ လက်ရှိ အချိန်အထိ ထောက်ပံ့ကြေး တစုံတရာ မရရှိသေးဘူးလို့ ပြောဆိုကြပါတယ်။
Photo - CJ