၄ လအတွင်း စားဆီဈေး ၆၆၀ ကျပ် ကျဆင်းလာ
ရန်ကုန်၊ မေ ၁၂
၄ လတာကာလအတွင်း ပြည်တွင်း စားအုန်းဆီတစ်ပိဿာ လက်ကားရည်ညွှန်းဈေး ၆၆၀ ကျပ်ခန့် ကျဆင်းလာကြောင်း စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီကနေ သိရပါတယ်။
စားအုန်းဆီအဓိကထုတ်လုပ်တဲ့ အင်ဒိုနီးရှားနဲ့ မလေးရှားနိုင်ငံတို့မှ မြန်မာနိုင်ငံကို CIF စနစ်အရ တင်သွင်းနေတဲ့ စားအုန်းဆီ တစ်တန်ဈေးနှုန်းက ၂၀၂၅ ခုနှစ် ဇန်နဝါရီလမှ ဆက်တိုက်ကျဆင်းလာခဲ့ရာ ပြည်တွင်းဈေးလည်း လိုက်ပါကျဆင်းလာတာပါ။
ကော်မတီအနေနဲ့ ပြည်တွင်းလိုအပ်ချက်ကို ဖြည့်ဆည်းပေးနိုင်ဖို့ စားအုန်းဆီကို ပြည်ပမှ ဝယ်ယူတင်သွင်းရာမှာ စားအုန်းဆီတင်ပို့တဲ့ နိုင်ငံတွေရဲ့ ဈေးနှုန်းအတက်အကျပေါ် မူတည်ပြီး ပြည်တွင်းမှာ ဖြစ်သင့်ဖြစ်ထိုက်တဲ့ ဈေးနှုန်းတွေ ဖြစ်ပေါ်စေရေးကို ထိန်းကျောင်းဆောင်ရွက်လျက်ရှိတယ်လို့ ဆိုပါတယ်။
ပြည်ပမှာ စားအုန်းဆီထုတ်လုပ်တင်ပို့တဲ့ နိုင်ငံတွေမှာ ဈေးကွက်နဲ့ ဈေးနှုန်းဖြစ်ပေါ်မှုတွေအရ မေလ ၁၂ ရက်မှ ၁၈ ရက်အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းအဖြစ် တစ်ပိဿာကို ၆၆၂၀ ကျပ် သတ်မှတ်ကြောင်း ကော်မတီက အသိပေး ထုတ်ပြန်ကြေညာထားပါတယ်။
ပြည်တွင်းဈေးကွက်အတွင်း အဆိုပါထုတ်ပြန်ကြေညာထားတဲ့ ဈေးနှုန်းထက် ဈေးနှုန်းမြှင့်တင်ရောင်းချခြင်း၊ ဈေးကစားဖို့ ရည်ရွယ်ချက်နဲ့ သိုလှောင်ခြင်းအပါအဝင် မသမာတဲ့ လုပ်ဆောင်မှုတွေ ပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမယ်လို့ ဆိုပါတယ်။
စားအုန်းဆီလက်ကားရည်ညွှန်းဈေးနှုန်းကို အပတ်စဉ်တနင်္လာနေ့တိုင်း ထုတ်ပြန်ကြေညာလျက်ရှိပြီး စားသုံးသူပြည်သူတွေအနေနဲ့ စားသုံးသူရေးရာဦးစီးဌာနရဲ့ Website : www.doca.gov.mm နဲ့ Facebook Page တွေမှာ ဝင်ရောက်ကြည့်ရှုလေ့လာနိုင်ကြောင်း သိရပါတယ်။