ရဲတွေနဲ့အတူ ကင်းလှည့်နေတဲ့ တရုတ်စက်ရုပ်
စက်ရုပ်နည်းပညာဖွံ့ဖြိုးတဲ့ နိုင်ငံတွေမှာတော့ စက်ရုပ်တွေကို နေရာစုံ သုံးလာတာပါပဲ။
တရုတ်မှာဆို multimodal AI ပါတဲ့ လူတူစက်ရုပ်တွေကို လမ်းကြောရှင်းတဲ့နေရာကနေ ကင်းလှည့်တဲ့နေရာအထိ သုံးနေပါပြီ။ ဒီ Humanoid တွေကို China Robot Cops တွေလို့ ခေါ်ပါတယ်။ တရုတ်စက်ရုပ်ရဲလို့ ခေါ်ရမယ် ထင်ပါတယ်။
မကြာသေးခင်ကပဲ ရှန်းကျန့်က ရဲတပ်ဖွဲ့ဟာ လူတစ်ယောက်လို ပြုမှုဆက်ဆံနိုင်တဲ့ PM01 လူတူစက်ရုပ်နဲ့ မြို့ထဲ ကင်းလှည့်ခဲ့လို့ လူထုစိတ်ဝင်စားမှု မြင့်တက်ခဲ့ပါတယ်။ ၁.၃၈ မီတာ မြင့်ပြီး အလေးချိန် ကီလို ၄၀ ရှိတဲ့ ရဲဝတ်စုံဝတ် PM01 က လူတွေနဲ့ စကားပြောနိုင် , လက်ဆွဲနှုတ်ဆက်နိုင်ပြီး ၃၂၀ ဒီဂရီ ခါးလှည့်နိုင်တဲ့ အဆင့်မြင့် စက်ရုပ်မျိုးပါ။
ဈေးကွက်ထဲမှာဆို ယွမ် ၈၈၀၀၀ တန်တဲ့ စက်ရုပ်ဖြစ်ပြီး သူ့မှာ လေဆာသုံး အနီးအဝေးထောက်လှမ်းတိုင်းတာမှုတွေ လုပ်နိုင်တဲ့ LiDAR system တပ်ထားပါတယ်။ PM01 က ရှန်းကျန့်မြို့က EngineAI ဆိုတဲ့ ကုမ္ပဏီထုတ် စက်ရုပ်ပါ။
AI စက်ရုပ်နည်းပညာ ထွန်းကားတဲ့ တရုတ်မှာ Humanoid အသုံးချမှုက တစ်နေ့ထက်တစ်နေ့ များပြားထူးခြားလာနေပါတယ်။ စီချွမ်ပြည်နယ် Mianyang မြို့တော်မှာဆို ရဲတွေက ယာဉ်ကြောကျပ်တဲ့ မနက် ၈ နာရီကနေ ညနေ ၅ နာရီအထိ လမ်းလုံခြုံရေးအတွက် စက်ရုပ်သုံးပြီး လမ်းရှင်းလာပါတယ်။
နောက်ပိုင်းမှာ စက်ရုပ်တွေဟာ နေ့စဉ်ဘဝထဲက မရှိမဖြစ်ပစ္စည်းတစ်ခုလို ဖြစ်လာနိုင်ပါတယ်။