#ယနေ့ထုတ်သတင်းစာ_နိုင်ငံတကာသတင်း
◼ အရှေ့ဘက်ကမ်းလွန်ရေပြင်အတွင်းသို့ ဒုံးကျည်များ မြောက်ကိုရီးယားပစ်လွှတ်
မြောက်ကိုရီးယားနိုင်ငံသည် အရှေ့ဘက်ကမ်းရိုးတန်း ကမ်းလွန်ရေပြင်အတွင်းသို့ တာတိုပစ်ဒုံးကျည်များဟု ယူဆရသော ဘလစ်စတစ်ဒုံးကျည်များကို မေ ၇ ရက်တွင် စမ်းသပ်ပစ်လွှတ်ခဲ့ကြောင်း တောင်ကိုရီးယားစစ်ဘက်က သတင်းထုတ်ပြန်ထားသည်။
မြောက်ကိုရီးယားနိုင်ငံအနေဖြင့် ပြည်ပသို့တင်ပို့ရောင်းချရန် ရည်ရွယ်ထားသည့်ဒုံးကျည်လက်နက်အမျိုးမျိုးကို စမ်းသပ်ခဲ့ခြင်းဖြစ်နိုင်ကြောင်း တောင်ကိုရီးယားတာဝန်ရှိသူများက သုံးသပ်ထားသည်။
မြောက်ကိုရီးယားနိုင်ငံက ပစ်လွှတ်ခဲ့သော အဆိုပါဒုံးကျည်များသည် အကွာအဝေး ကီလိုမီတာ ၈၀၀(၄၉၇မိုင်) ပျံသန်းခဲ့ပြီး နောက်ပင်လယ်ရေပြင်အတွင်း ကျရောက်ခဲ့ကြောင်း သိရသည်။
လက်ရှိအချိန်တွင် မြောက်ကိုရီးယားနိုင်ငံအနေဖြင့် မေ ၇ ရက် ဒုံးကျည်စမ်းသပ်မှု၌ ဒုံးကျည်အစင်းရေမည်မျှပစ်လွှတ်ခဲ့သည်ကို မသိရသေးကြောင်း တောင်ကိုရီးယားတာဝန်ရှိသူများက ပြောကြားထားသည်။
မြောက်ကိုရီးယားနိုင်ငံ၏ မေ ၇ ရက်ဒုံးကျည်စမ်းသပ်မှုကို ဂျပန်နိုင်ငံကလည်း ထောက်လှမ်းသိရှိခဲ့သည်။
မြောက်ကိုရီးယားနိုင်ငံ၏ ဘလစ်စတစ်ဒုံးကျည် အစီအစဉ်များကို ကုလသမဂ္ဂလုံခြုံရေးကောင်စီက ပိတ်ပင်ထားသော်လည်း ပြီးခဲ့သည့် နှစ်များအတွင်း မြောက်ကိုရီးယားအစိုးရသည် အကွာအဝေး အမျိုးမျိုးရောက်နိုင်သော ဘလစ်စတစ်ဒုံးကျည်များကို တည်ဆောက်စမ်းသပ်မှုများ ပြုလုပ်လာခဲ့သည်။
ရိုက်တာ
