Inner Child ဆိုတာဘာလဲ ။ Inner Child ဆိုတာကို စိတ်အတွင်းထဲက ကလေးငယ်လို့ ဘာသာပြန်ဆိုကြတာမျိုးရှိသည် ။ တကယ်တော့ Inner Child ဆိုတာ Part of Your Mind မိမိစိတ်၏ တစ်စိတ်တစ်ဒေသ အစိတ်အပိုင်းတစ်ခုသာဖြစ်ပါသည် ။ Inner Child ကို တချို့က Subconscious Mind (မသိစိတ်) အဖြစ်ရည်ညွှန်းသည် ။ တကယ်တမ်းတော့ လူတစ်ယောက်၏ အသက် ၅ နှစ်မှ ၁၂ နှစ်အတွင်း ဖြစ်ပျက်ခဲ့သော အခြေအနေ ၊ အဖြစ်အပျက်နှင့် တွေ့ကြုံခံစားခဲ့ရသော အတွေ့အကြုံတွေက မိမိစိတ်ကို အကြီးအကျယ် ဒဏ်ရာဖြစ်စေခဲ့ပြီး ယခုတိုင် စိတ်ထဲမှာရှိနေသော အပိုင်းအစကို Inner Child အဖြစ် လှပစွာ ရည်ညွှန်းပြောဆိုကြတာဖြစ်သည် ။
Inner Child သည် အတ္တ Ego လည်း ဖြစ်နိုင်သည် ။ ယုံကြည်မှု Belief System လည်း ဖြစ်နိုင်သည် ။ အရိုးစွဲနေသော အကြောင်းအရာ Deeply Rooted Cause လည်း ဖြစ်နိုင်သည် ။ ကလေးတစ်ယောက် အကျိုးသင့် အကြောင်းသင့် မတွေးတော မစဉ်းစားနိုင်သေးသော အရွယ်မှာ ဖြစ်ပေါ်ခဲ့သော စိတ်ဒဏ်ရာသည် ရင့်ကျက်သော လူကြီးအရွယ်ရောက်သည်အထိ ပျောက်ပျက်သွားခြင်းမရှိဘဲ ကျန်နေခဲ့တာမျိုးဖြစ်သည် ။
လူတိုင်းမှာ Inner Child Issue တွေ အနည်းနဲ့အများ ရှိနိုင်ပါသည် ။ မိဘက စိတ်ဒဏ်ရာပေးခဲ့သော ကလေးတွေသာ Inner Child ပြဿနာရှိတာမဟုတ်ဘဲ မိဘက အလိုလိုက် အကြိုက်ဆောင် ဖူးဖူးမှုတ်ခံထားရသော ကလေးတွေမှာလည်း Inner Child ပြဿနာတွေ ရှိတတ်ပါသည် ။ ငယ်ငယ်ကတည်းက ငါလိုတာမှန်သမျှ အကုန်ရခဲ့တာပဲ ။ ငါ့မိဘက အကုန်ပေးခဲ့တာပဲ ။ ဒါကြောင့် အခုလည်း ရရမယ်ဆိုသော စိတ်မျိုးကလည်း Inner Child နှင့် ဆက်စပ်နေသော ရင့်ကျက်စွာ အောင်မြင်တိုးတက်နေသော်လည်း လုံး၀ဆက်ကြီးမလာဘဲ ကလေးဆန်နေသော အသက်ငါးနှစ်ခြောက်နှစ်အရွယ်က ကျန်ခဲ့သော စိတ်အပိုင်းအစ Inner Child က ထွက်ထွက်လာပြီး ဒုက္ခပေးနေတာမျိုးတွေရှိသည် ။
Inner Child Healing ဆိုတာက ငယ်စဉ်ဘ၀က စွဲကိုင်ထားခဲ့သော အသိတွေကို ရည်ရွယ်ချက်ရှိရှိ လွှတ်ချလိုက်ခြင်း ၊ ခွာထုတ်လိုက်ခြင်းပင် ဖြစ်သည် ။ တသက်လုံး ဒုက္ခပေးလာသော စိတ်ံခံစားမှုများကို အရင်းအမြစ်က တူးဖော်ထုတ်နုတ်လိုက်ပြီး အတိတ်ကဖြစ်ရပ်များ ၊ လူပုဂ္ဂိုလ်များသည် မိမိနဲ့ လုံး၀သက်ဆိုင်မှုမရှိတော့ကြောင်း ၊ မိမိအပေါ်မှာ လုံး၀လွှမ်းမိုးမှုမရှိတော့ကြောင်းကို သဘော ပေါက် နားလည်လက်ခံလိုက်ခြင်းဖြစ်သည် ။ စိတ်ဒဏ်ရာရခဲ့သော အကြောင်းအရာ ၊ အခြေအနေ ၊ အဖြစ်အပျက်များတွင် ပါဝင်ခဲ့သော လူတွေ အကုန်လုံးကိုလည်း ခွင့်လွှတ်နားလည်လိုက်ခြင်းပင် ဖြစ်သည် ။
စိတ်တွေပြောင်းသွားသည် ။ အတွေးအခေါ်တွေ ပြောင်းသွားသည် ။ အမြင်တွေပြောင်းသွားသည် ။ စိတ်ဒဏ်ရာများကို ကုစားခြင်းခရီးက အင်မတန်ရှည်လျားသလို ခက်ခဲပင်ပန်းသော ခရီးကြမ်းလည်းဖြစ်သည် ။ သို့သော် ရလာဒ်ကတော့ တန်ဖိုးမဖြတ်နိုင်သော မည်သည့်အရာနှင့်မှ မလဲနိုင်သော စိတ်၏ တည်ငြိမ်အေးငြိမ်းမှု ဖြစ်သည် ။
နေ့မြင်ညပျောက် အနတ္တသဘောတွေကို သိမြင်လာမိသည် ။ အရာရာဟာ အသေးအဖွဲ့ကအစ သူ့အတွက် တန်ဖိုးထားစရာဖြစ်လာသည် ။ ဘာမှမတည်မြဲသော လောက ဘယ်အချိန်ပျောက်ကွယ်သွားမည်မသိသော လောကမှာ အကောင်းဆုံးသော အရာတွေကိုသာ ချန်ထားခဲ့ချင်သည် ။ အကြည်ဓာတ်၊ အလင်းဓာတ်တွေကိုသာ မျှဝေပေးချင်သည် ။
#နွေလယ်ညရဲ့မိုးအိပ်မက်
(Psychological Drama)
#မွန်ဟော်စီ