ယာယီရုံး အဆောက်အအုံများအဖြစ် အသုံးပြုမည့် Modular များ ရောက်ရှိလာ
ရန်ကုန်၊ မေ ၇
ငလျင်ဒဏ်သင့်ခဲ့တဲ့ ဝန်ကြီးဌာနရုံးတွေမှာ ယာယီအဆောက်အအုံတွေအဖြစ် အသုံးပြုမယ့် အသင့်ဖြုတ်တပ်နိုင်တဲ့ Modular (prefabricated) office ၁၀၈ လုံး နေပြည်တော်ကို ရောက်ရှိလာကြောင်း အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီကနေ သိရပါတယ်။
မေလ ၆ ရက်နေ့မှာ ရန်ကုန်မြို့ သီလဝါဆိပ်ကမ်းကတစ်ဆင့် မီးရထားတွဲ ၅၄ တွဲနဲ့ သယ်ဆောင်လာတဲ့ Modular Office တွေ ရွာတော်ဘူတာကို ရောက်ရှိလာတယ်လို့ သိရပါတယ်။
အဆိုပါ Modular Office တွေကို ပြည်ထောင်စုတရားလွှတ်တော်ချုပ်ရုံးထံ ၂၅ လုံး၊ နိုင်ငံတော်ဖွဲ့စည်းပုံအခြေခံဥပဒေဆိုင်ရာ ခုံရုံးထံ ၅ လုံး၊ နိုင်ငံခြားရေးဝန်ကြီးဌာနထံ အလုံး ၃၀ နဲ့ သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနထံ ၄၄ လုံး ဖြန့်ဝေထားပါတယ်။
ငလျင်ကြောင့် ထိခိုက်ပျက်စီးမှုများခဲ့တဲ့ နေပြည်တော်မှာ ဝန်ကြီးဌာနတွေရဲ့ ယာယီရုံးခန်းများကို အသင့်ဖြုတ်တပ်နိုင်တဲ့အိမ် (Modular House) တွေနဲ့ လုပ်ဆောင်လျက်ရှိတာပါ။
အဆိုပါ Modular House တွေကို တရုတ်နိုင်ငံမှ ကူညီပေးထားခြင်းဖြစ်ပြီး လဝက၊ အလုပ်သမား၊ သယံဇာတနှင့် ပတ်ဝန်းကျင်၊ စီးပွား/ကူးသန်း၊ လျှပ်စစ်စွမ်းအား စတဲ့ ဝန်ကြီးဌာနတွေမှာ ယာယီရုံးခန်းဖွင့်လှစ်ဖို့ ပြင်ဆင်နေတာလည်း ဖြစ်ပါတယ်။
တရုတ်အစိုးရက နစကထံ မေလ ၂ ရက်နေ့က တိုက်ရိုက်ပေးအပ်တဲ့ အကူအညီတွေထဲမှာ အသင့်တပ်ဆင် အသုံးပြုနိုင်တဲ့ ရုံးခန်း (Modular prefabricated office) ၃၄၀ ၊ ကွန်ပျူတာတွေနဲ့ ရုံးသုံးပရိဘောဂတွေ ပါဝင်ကြောင်း သိရပါတယ်။