လူတိုင်းအမြဲတမ်းစိတ်ဓာတ်တက်ကြွနေတယ်ဆိုတာမရှိပါဘူး ဘာလို့လဲဆိုလူသားတွေဖြစ်နေလို့ပါပဲ လူတိုင်းဟာပြိုလဲရမယ် ကျရှုံးဖူးရမယ် လောကဒဏ်ကနေ ထိုးနှက်ခံရမယ် ဒီလိုအရာတွေကနေပြန်ထရမယ် ဒါမှလူ့ဘဝပါ။အသက်မသေသေးသ၍ပြန်လည်ကြိုးစားခွင့်ရှိတယ်ဆိုတာမမေ့ပါနဲ့။
မိမိကိုယ်ကို လက်ခံပြီး ယုံကြည်မှုတည်ဆောက်ဖို့ဆိုတာ လူတိုင်းအတွက် အရေးကြီးတဲ့ ဘဝအတတ်ပညာတစ်ရပ်ပါ။ ဒီလိုစွမ်းရည်မျိုး ရှိလာဖို့ဆိုရင် ကိုယ့်ကိုယ်ကိုယ် နားလည်သဘောပေါက်ဖို့နဲ့ ချစ်မြတ်နိုးတတ်ဖို့ အရေးကြီးပါတယ်။

အဓီကအနေနဲ့ ကိုယ့်ရဲ့အားသာချက်တွေကို အသိအမှတ်ပြုဖို့ လိုပါတယ်။ လူတိုင်းမှာ ထူးချွန်တဲ့အရည်အချင်းတစ်ခုခုရှိကြပါတယ်။ ကိုယ်ဘာတွေမှာ တော်လဲ၊ ဘာတွေကို ကောင်းကောင်းလုပ်နိုင်လဲဆိုတာ ဆန်းစစ်ကြည့်ပါ။ ဒီလိုအားသာချက်တွေကို သတိထားမိလာတဲ့အခါ ကိုယ့်ကိုယ်ကိုယ် ယုံကြည်မှုတိုးလာပါလိမ့်မယ်။တကယ်လို့မတွေ့သေးဘူးဆိုရင်လဲအားမလျှော့လိုက်ပါနဲ့ မှတ်ထားပါ လူဆိုတာ တစ်ခုခုကိုကြိုးစားနေသ၍ အမြဲတမ်းအခွင့်အရေးရှိပါတယ်။ရပ်တန့်လိုက်မှသာရှုံးတာပါ။

နောက်တစ်ချက်အနေနဲ့ ကိုယ့်ကိုယ်ကိုယ် အပြုသဘောဆောင်တဲ့စကားတွေပြောဖို့ လိုပါတယ်။ "ငါမတတ်နိုင်ဘူး"၊ "ငါမလုပ်နိုင်ဘူး" ဆိုတဲ့ စကားတွေအစား "ငါကြိုးစားမယ်"၊ "ငါလုပ်နိုင်တယ်" ဆိုတဲ့ အားပေးစကားတွေကို ပြောဖို့လိုပါတယ်။ ဒီလိုစကားတွေက ကိုယ့်စိတ်ကို အားတက်စေတဲ့အပြင် ကိုယ်ကိုကိုယ် ယုံကြည်မှုလဲတိုးစေပါတယ်။ကိုယ့်ရဲ့စိတ်ကိုထိန်းချုပ်နိုင်ရင်တော့အကောင်းဆုံးပါပဲ။
အခြားသူတွေနဲ့လဲ မနှိုင်းယှဉ်ဖို့က အရေးကြီးပါတယ်။ လူတိုင်းမှာ သူ့ရဲ့အောင်မြင်မှုနဲ့ သူ့ရဲ့စိန်ခေါ်မှုတွေ ရှိကြပါတယ်။လူတိုင်းကကိုယ့်ဘဝနဲ့ကိုယ်ပါ။ကိုယ်သွားနေတဲ့လမ်းကြောင်း ကိုယ့်ရဲ့တိုးတက်မှုကိုသာ အာရုံစိုက်ပါ။ ကိုယ့်ရဲ့အောင်မြင်မှုသေးသေးလေးတွေကိုတောင် ဂုဏ်ယူတတ်ဖို့လိုပါတယ်။ ကိုယ်ဝါသနာပါတဲ့အရာတွေကို လုပ်ရတဲ့အခါ စိတ်ပျော်ရွှင်ပြီး ကိုယ့်ကိုယ်ကိုယ် ပိုပြီးလက်ခံလာစေနိုင်ပါတယ်။ ဥပမာ ဂီတ၊ အားကစား၊ စာဖတ်ခြင်းစတဲ့ အရာတွေပါ။ပြီးတော့ ကိုယ်လက်လှုပ်ရှားမှုလုပ်ဖို့ လိုပါတယ်။အမြဲတမ်းအိပ်ရာထဲမှာခွေနေတာ၊ လေးလံထိုင်းမိုင်းနေတာတွေက ခန္ဓာကိုယ်အတွက် မကောင်းသလို စိတ်ကျန်းမာရေးလဲမကောင်းစေပါဘူး လေ့ကျင့်ခန်းလုပ်တာ၊ လမ်းလျှောက်တာ၊ ယောဂကျင့်တာတွေက စိတ်ဖိစီးမှုကိုလျော့ပြီး ကိုယ့်ကိုယ်ကိုယ် ယုံကြည်မှုတိုးစေနိုင်ပါတယ်။ကိုယ့်အတွက် အနုတ်လက္ခဏာဆောင်တဲ့သူတွေနဲ့ အတူမနေဖို့ လဲလိုပါတယ်။ ကိုယ့်ကို အားပေးတဲ့၊ အားတက်စေတဲ့သူတွေနဲ့သာ အချိန်ကုန်ဆုံးပါ။Negative vibe ပေးတဲ့လူတွေနဲ့ ကိုယ့်ကိုမကောင်းမြင်တဲ့လူတွေနဲ့ဆို ကြာကြာမနေပဲလှည့်ထွက်လာလိုက်ပါ။

အဆုံးသတ်အနေနဲ့ ပြောရမယ်ဆိုရင် မိမိကိုယ်ကို လက်ခံပြီး ယုံကြည်မှုရှိဖို့ဆိုတာ တစ်ညတည်းနဲ့ ဖြစ်မလာနိုင်ပါဘူး။ ဒါပေမယ့် နေ့တိုင်းနည်းနည်းချင်း ကိုယ့်ကိုယ်ကိုယ် အားပေးပြီး ကြိုးစားမယ်ဆိုရင် တဖြည်းဖြည်း ပိုပြီးယုံကြည်မှုရှိလာပါလိမ့်မယ်။ ကိုယ့်ရဲ့တန်ဖိုးကို သိပြီး ကိုယ့်ကိုယ်ကိုယ် ချစ်တတ်ဖို့သာ အရေးကြီးပါတယ်။