#နိုင်ငံတကာသတင်း
◼ နှစ် (၈၀) ပြည့်အောင်ပွဲအထိမ်းအမှတ်အဖြစ် သုံးရက်ကြာ အပစ်အခတ်ရပ်စဲမှု ပူတင်ကြေညာ
ဒုတိယကမ္ဘာစစ်တွင် ဆိုဗီယက်ယူနီယံနှင့် မဟာမိတ်များ ရရှိခဲ့သည့် နှစ် (၈၀) ပြည့်အောင်ပွဲအထိမ်းအမှတ်အဖြစ် ယူကရိန်းနှင့် စစ်ပွဲအား မေလအတွင်း သုံးရက် ယာယီ အပစ်အခတ်ရပ်စဲကြောင်း ရုရှားသမ္မတ ဗလာဒီမာပူတင်က ယမန်နေ့တွင် ကြေညာခဲ့သည်။
အမေရိကန်သမ္မတထရန့်၏ ဝါရှင်တန်အစိုးရ က ငြိမ်းချမ်းရေးကြိုးပမ်းမှုအတွက် အထစ်အငေါ့ဖြစ်နေခြင်းကို စိတ်မရှည်နိုင်ဖြစ်လာနေစဉ် ရုရှားက ငြိမ်းချမ်းရေးတွင် စိတ်ဝင်စားနေဆဲဖြစ်ကြောင်း အချက်ပြရန် ပူတင်၏ လုပ်ရပ်က ရည်ရွယ်ပုံရကြောင်း နှင့် ပူတင်က ငြိမ်းချမ်းရေးစိတ်ဝင်စားသည် ဆိုသည်မှာ ယူကရိန်းနှင့် ဥရောပမဟာမိတ်များအတွက် အငြင်းပွားစရာဖြစ်ကြောင်း ရိုက်တာသတင်းက ဖော်ပြသည်။
၇၂ နာရီ ကြာ အပစ်အခတ်ရပ်စဲမှုသည် နာဇီဂျာမနီအပေါ် အနိုင်ရခဲ့မှုကို အောင်ပွဲခံရန် ကြီးကျယ်သောအခမ်းအနားများကျင်းပကာ တရုတ်သမ္မတရှီကျင့်ဖျင် အပါအဝင် နိုင်ငံတကာခေါင်းဆောင်များအား ပူတင်က လက်ခံတွေ့ဆုံမည့် မေ ၈ ရက် မှ မေ ၁၀ ရက်အထိ ကြာမြင့်မည်ဖြစ်ကြောင်း ကရင်မလင်က ပြောသည်။
သံတမန်ရေးကို လမ်းခင်းပေးရန် အနည်းဆုံးရက်ပေါင်း ၃၀ ချက်ချင်းအပစ်ရပ်စဲရေး ၎င်းတို့၏ တောင်းဆိုမှုကို ပူတင်က မည်သည်ကြောင့်သဘောမတူနိုင်ကြောင်းကို ကိဗ်က မေးခွန်းထုတ်သည်။
အောင်ပွဲခံအခမ်းအနားတွင် ပူတင်အတွက် တည်ငြိမ်အေးချမ်းမှုရှိရေး သေချာစေရန် လူတိုင်းက မေ ၈ ရက်ကို စောင့်ဆိုင်းပြီး ထိုအချိန်ကျမှ အပစ်အခတ်ရပ်စဲရမည့် ပုံစံဖြစ်နေကြောင်း ယူကရိန်း သမ္မတ ဇီလန်စကီးက ၎င်း၏ ညစဉ်မိန့်ခွန်းတွင် ပြောကြားပြီး မိမိတို့ က လူ့အသက်များကို တန်ဖိုးထားပြီး အခမ်းအနားများကို တန်ဖိုးမထားကြောင်း ပြောကြားသည်။
ရုရှားကမူ စစ်ပွဲအတွက် အပြီးသတ်ဖြေရှင်းချက်ကို အလိုရှိပြီး အပစ်အခတ်ရပ်စဲမှုကို မလိုလားဟု ဆိုသည်။
အမေရိကန်နိုင်ငံခြားရေးဝန်ကြီး မာကိုရူဘီယို နှင့် ရုရှား နိုင်ငံခြားရေးဝန်ကြီး ဆာဂေးလာ့ဗ်ရော့ တို့ကြား တနင်္ဂနွေနေ့က စကားပြောခဲ့ကြပြီးနောက် ပူတင်၏ ကြေညာချက်ထွက်လာခြင်းဖြစ်ပြီး ဒေါ်နယ်ထရန့် က ရုရှားနှင့်ယူကရိန်းကြား အမြဲတမ်း အပစ်အခတ်ရပ်စဲမှုကို လိုလားကြောင်း အိမ်ဖြူတော် က ပြောကြားသည်။
၇၂ နာရီ အတွင်း စစ်ရေးလှုပ်ရှားမှုအားလုံးကို ဆိုင်းငံ့ထားမည်ဖြစ်ကြောင်း နှင့် ယူကရိန်းဘက်ကလည်း ယင်းနမူနာအတိုင်း လိုက်ပါလုပ်ဆောင်သင့်သည်ဟု ရုရှားက ယုံကြည်ကြောင်း ကရင်မလင်က အပစ်ရပ်စဲမှုနှင့် ပတ်သက်၍ပြောကြားပြီး ယူကရိန်းတို့က ချိုးဖောက်ခဲ့ပါက ထိရောက်စွာတုံ့ပြန်သွားမည်ဖြစ်ကြောင်း ဆက်လက်ပြောကြားသည်။
ယင်းမှာ ရုရှားတို့ဘက် က ဒုတိယအကြိမ်မြောက် တစ်ဖက်သတ်အပစ်ရပ် ကြေညာမှုဖြစ်ကာ အီစတာပွဲတော်ကာလကလည်း နာရီပေါင်း ၃၀ ကြာ အပစ်ရပ်မှုကို ပူတင်က ကြေညာခဲ့သည်။
