#နိုင်ငံတကာသတင်း
◼ဇီလန်စကီးနှင့် ဗာတီကန်တွင် တွေ့ဆုံပြီးနောက် ပူတင်၏ ငြိမ်းချမ်းရေးဆန္ဒအပေါ် ထရန့် မေးခွန်းထုတ်
ပုပ်ရဟန်းမင်းကြီး ဖရန်စစ်၏ ဈာပနတက်ရောက်စဉ် ယူကရိန်းသမ္မတ ဗိုလိုဒီမာဇီလန်စကီး နှင့် တွေ့ ဆုံပြီးနောက် သုံးနှစ်ကြာယူကရိန်းစစ်ပွဲကို အဆုံးသတ်ရေး ရုရှားသမ္မတ ဗလာဒီမာပူတင်၏ စိတ်အားထက်သန်မှုအပေါ် အမေရိကန်သမ္မတ ဒေါ်နယ်ထရန့် က မေးခွန်းထုတ်လိုက်သည်။
ယခုသီတင်းပတ်စောစောပိုင်းတွင် ကိဗ်အပေါ် မော်စကို၏ တိုက်ခိုက်မှုများ ဖြစ်ပေါ်ခဲ့ပြီးနောက် ပူတင် က ၎င်းကိုပါ သေဖော်ညှိမည်ကိုစိုးရိမ်မိကြောင်း ထရန့် က ရောမမြို့ ဈာပနအခမ်းအနားမှ ထွက်ခွာအပြီး ဆိုရှယ်မီဒီယာပေါ်၌ ရေးသားခဲ့ကာ ပူတင်အနေဖြင့် အရပ်သားများရှိရာသို့ ဒုံးကျည်များ ပစ်ခတ်စရာ အကြောင်းမရှိဟုလည်း ဆက်လက်ပြောသည်။
ယင်းနေ့အစောပိုင်း က ပုပ်ရဟန်းမင်းကြီး၏ ဈာပနမစတင်မီ စိန့်ပီတာဘုရားကျောင်းတွင် ဒေါ်နယ်ထရန့် နှင့် ဇီလန်းစကီးတို့ စိတ်ပါလက်ပါ ဆွေးနွေးနေကြသည်ကို မြင်တွေ့ခဲ့ရသည်။
ဇီလန်စကီးနှင့် ၁၅ မိနစ်တွေ့ဆုံမှုမှာ အလွန် အလုပ်ဖြစ်ကြောင်း အိမ်ဖြူတော် က ထုတ်ပြန်ပြောကြားပြီး ယူကရိန်းသမ္မတကလည်း ယင်းတွေ့ဆုံမှုများ သမိုင်းဝင်ဖြစ်လာနိုင်သည့် အလားအလာရှိကြောင်း ပြောသည်။
ယင်းမှာ ပြီးခဲ့သည့်ဖေဖော်ဝါရီလက အိမ်ဖြူတော် ဘဲဥပုံရုံးခန်း၌ အပြန်အလှန်အော်ဟစ် ပြောဆိုမှုနောက်ပိုင်း ဒေါ်နယ်ထရန့် နှင့် ဇီလန်စကီးတို့ ပထမဆုံး မျက်နှာချင်းဆိုင်ပြန်လည်တွေ့ဆုံမှုဖြစ်သည်။
ယူကရိန်းမြို့ကြီးများအပေါ် ရုရှား၏တိုက်ခိုက်မှုများကြောင့် ပူတင်အနေဖြင့် စစ်ပွဲကို ရပ် တန့်လိုပုံမရဘဲ ဘဏ်လုပ်ငန်း နှင့် တစ်ဆင့်ခံတားဆီးပိတ်ဆို့မှုများကဲ့သို့ မတူညီသော ပုံစံဖြင့် ကိုင်တွယ်ရမည်လားဆိုသည့်အပေါ် စဉ်းစားစရာဖြစ်လာခဲ့ကြောင်း ဒေါ်နယ်ထရန့် က ၎င်း၏ Truth Social ဆိုရှယ်မီဒီယာပေါ်တွင် ရေးသားခဲ့သည်။
ရုရှားသမ္မတ နှင့် ၎င်းစေလွှတ်လိုက်သော ကိုယ်စားလှယ် စတိဗ်ဝစ်ကော့ဗ် တို့ မော်စကိုမြို့၌ သုံးနာရီကြာတွေ့ဆုံခဲ့သည့်သောကြာနေ့ကမူရုရှားနှင့်ယူကရိန်းကြားသဘောတူညီချက်တစ်ရပ်ရရှိရန် အလွန်နီးစပ်နေပြီဖြစ်ကြောင်း ဒေါ်နယ်ထရန့်က ကြွေးကြော်ခဲ့သည်။
ထိုအတောအတွင်း မည်သည့်သတ်မှတ်ချက်များမထားဘဲ ယူကရိန်းနှင့် တိုက်ရိုက် ဆွေးနွေး မှု များ လုပ်ရန် ရုရှားဘက်က အသင့်ရှိမှုကို သမ္မတ ပူတင် က ဝစ်ကော့ဗ် အား အတည်ပြုလိုက်ကြောင်း ရုရှားသမ္မတရုံး က ထုတ်ပြန်ပြောကြားသည်။
သတင်း-ရဲမင်း
