#နိုင်ငံတကာသတင်း
◼ ကနေဒါလမ်းပွဲတော်တစ်ခုအတွင်း ကားတစ်စီးဝင်တိုက်မှုကြောင့် လူအများအပြားသေဆုံး
ကနေဒါအနောက်ပိုင်းမြို့ကြီး ဗန်ကူးဗား၏ လမ်းမပေါ်တွင် ကျင်းပနေသော ဖိလစ်ပိုင်လူမျိုးတို့၏ပွဲတော်တစ်ခုအတွင်း လူအုပ်ထဲသို့ ကားတစ်စီး ဝင်ရောက်တိုက်ခဲ့ပြီးနောက် လူအများအပြားသေဆုံး၊ ဒဏ်ရာရရှိခဲ့ကြောင်း ရဲတပ်ဖွဲ့ က ပြောကြားသည်။
လူအမြောက်အမြားထိခိုက်သေဆုံးခဲ့ရသော ဖြစ်ရပ်အား စုံစမ်းစစ်ဆေးနေကြောင်း နှင့် အသက် ၃၀ အရွယ် သံသယရှိသူကိုဖမ်းဆီးထားကြောင်း ရဲတပ်ဖွဲ့ က ပြောကြားသော်လည်း သေဆုံး၊ဒဏ်ရာရသူ အရေအတွက်ကိုထုတ်ပြန်ခြင်းမရှိဘဲ နောက်ရက် နံနက်မှသာ ပြည့်စုံစွာ သတင်းပေးနိုင်မည်ဖြစ်ကြောင်း ဆိုသည်။
သံသယရှိသူမှာ ရဲတပ်ဖွဲ့ က သိရှိသူဖြစ်ကြောင်း သန်းခေါင်ယံ သတင်းစာရှင်းလင်းပွဲတွင် ပြောကြားသော်လည်း အကျယ်တဝင့် မပြောပေ။ မသင်္ကာသူကိုလည်း အခင်းဖြစ်နေရာ၌ ရှိနေသူများကဦးစွာ ဖမ်းဆီးခဲ့ခြင်းဖြစ်သည်။
အရှေ့ ၄၁ လမ်းမကြီးနှင့် ဖ‌ရေဇာလမ်းအနီး၌ ဖိလစ်ပိုင်အမျိုးသား သူရဲကောင်းတစ်ဦးအား ဂုဏ်ပြုကျင်းပနေသော Lapu Lapu Day Block Party ပွဲတွင် ည ၈ နာရီထိုးပြီးနောက် အခင်းဖြစ်ပွားခဲ့ခြင်းဖြစ်သည်။
ဗန်ကူးဗားမြို့ လာပူ လာပူပွဲတော်မှ ကြောက်မက်ထိတ်လန့်ဖွယ်ရာ အဖြစ်အပျက်များကို ကြားသိရ၍ ဝမ်းနည်းကြေကွဲရကြောင်း ကနေဒါဝန်ကြီးချုပ် မာ့ခ်ကာနေး က ဆိုရှယ်မီဒီယာ X တွင် ပြောကြားသည်။
ဗန်ကူးဗားမြို့တော်ဝန် ကန်ဆင်းမ် နှင့် ဗြိတိသျှကိုလံဘီယာ ပြည်နယ်ဝန်ကြီးချုပ် ဒေးဗစ်အက်ဘီ တို့ကလည်း အလားတူ မှတ်ချက်များ X ပေါ်တွင် ရေးသားခဲ့ကြသည်။
လူအုပ်ကြီးကို ဝင်မတိုက်မီ အနက်ရောင်ကားတစ်စီး မူမမှန်သောပုံစံဖြင့် မောင်းနှင်လာသည်ကို မြင်တွေ့ရကြောင်း မျက်မြင်သက်သေတစ်ဦး က CTV သတင်းဌာနကို ပြောကြားခဲ့သည်။
“ကျွန်တော် ယာဉ်မောင်းကို မတွေ့လိုက်ပါဘူး ။ ကားအင်ဂျင်သံအကျယ်ကြီးပဲ ကြားလိုက်ပါတယ်။ ကျွန်တော့်ရဲ့ အစားအသောက်ရောင်းတဲ့ ထရပ်ကားလေးပေါ် က အောက်ကိုဆင်းပြီး လမ်းမတစ်လျှောက်ကြည့်လိုက်တော့ နေရာတိုင်းမှာ လူ့ခန္ဓာကိုယ်တွေ ။ သူက လမ်း မလယ်ကောင်တည့်တည့်ကနေ တစ်ဘလောက်လုံး မောင်းချသွားတာ။” ဟု Bao Buns အစားအသောက်ထရပ်ကား ပူးတွဲပိုင်ရှင် ယိုဆက်ဗာဒေးက Postmedia နှင့် တွေ့ဆုံမေးမြန်းမှုတွင် ပြောကြားသည်။
ကနေဒါ ဖက်ဒရယ်ရွေးကောက်ပွဲများကို တနင်္လာနေ့တွင် ကျင်းပသွားရန် ရှိနေပြီးအခင်းဖြစ်ပွားခဲ့သည့် နေရာတွင် လူပေါင်းထောင်ချီရောက်ရှိနေခဲ့ကြောင်း The Vancouver Sun သတင်းစာက ဆိုသည်။