iPhone ကို ကာဗာတပ် မသုံးစေချင်တဲ့ Apple
ဖုန်းဝယ်ပြီး ကာဗာ case တပ် မသုံးတဲ့သူ အတော်ရှားပါလိမ့်မယ်။
အခုနောက်ပိုင်း ရှယ်အကြမ်းခံပါတယ်ဆိုတဲ့ Durability မြင့် ဖုန်းကြော်ငြာတွေ မြင်ကြမှာပါ။ အမြင့် ၆ ပေ ၇ ပေလောက်က ကွန်ကရစ်ကြမ်းပြင်ပေါ် လွတ်ကျလို့ ဘာမှ မဖြစ်ဘူးဆိုတဲ့ ဖုန်းတွေအကြောင်းလည်း ကြားဖူးကြမှာပါ။
ဖုန်းကုမ္ပဏီတွေ ဘယ်လောက်အကြမ်းခံပါတယ် ပြောပြော ဖုန်းဝယ်သူတွေကတော့ ဖုန်းဝယ်ပြီးရင် ကာဗာတစ်ခါတည်း တပ်တော့တာပါပဲ။ ဖုန်းကောင်းကောင်းတစ်လုံးအတွက် ပိုက်ဆံသိန်းဆယ်ချီ သုံးနေရတဲ့ ခေတ်မှာ ကိုယ့်ဖုန်းအကြမ်းခံမှုကို မသေချာတာတွေနဲ့ အလောင်းအစား မလုပ်ချင်တဲ့ သဘောပါ။
ဖုန်းတွေထဲမှာ ဈေးအကြီးဆုံး iPhone ကို ထုတ်တဲ့ Apple ကလည်း သူ့ဖုန်းကို case မတပ်ဘဲ သုံးစေချင်ပုံပါပဲ။ Apple ရဲ့ နောက်ဆုံးထွက် iPhone 16 ရဲ့ Ceramic Shield ကြော်ငြာမှာ ဒီအချက်ကို ပြောထားပါတယ်။
ကြော်ငြာထဲမှာ ပွဲတော်လာလည်တဲ့ မိသားစုတစ်စုက လူတစ်ယောက်ကို အမှတ်တရဓါတ်ပုံရိုက်ခိုင်းချိန် သစ်သားကြမ်းပြင်ပေါ် iPhone 16 မတော်တဆ လွတ်ကျသွားပေမယ့် ဖုန်းမှန်လုံးလုံး မထိတာကို အသားပေး ပြထားတာပါ။ ကြော်ငြာအဆုံးမှာ Ceramic Shield လို့ စာတန်းထိုးပြီး "အေးဆေးပဲ။ အဲ့ဒါ iPhone 16 လေ" လို့ စာတန်းထိုးထားပါတယ်။
iPhone 16 က လွတ်ကျတာလောက် မမှုဘူးဆိုတာကို ဆိုလိုချင်တာပါ။ ဒါပေမယ့် သစ်သားကြမ်းပြင်ပေါ်ကို ၄ ပေကျော် ၅ ပေလောက် အမြင့်က လွှတ်ချပြတဲ့ Apple ကြော်ငြာက ကြွေပြားခင်း ကြမ်းပြင်ပေါ် ဖုန်းကို ထွေခင်းသလို ပစ်ချပစ်တဲ့ တရုတ်ကုမ္ပဏီတွေအဖို့တော့ ဟာသဖြစ်နေပါလိမ့်မယ်။
နောက်ပြီး iPhone လို ပရီမီယမ်ဖုန်းတစ်လုံးကို Apple ကြော်ငြာယုံပြီး case မတပ်ဘဲ သုံးဖို့ဆိုတာကလည်း စွန့်စားလွန်းရာ ကျနေပါလိမ့်မယ်။