မြန်မာ့ သရက်သီး ရုရှား ဝယ်လို
ရန်ကုန်၊ ဧပြီ ၂၄
ရုရုားစီးပွားရေးလုပ်ငန်းရှင်တွေဟာ မြန်မာနိုင်ငံက စိုက်ပျိုးထွက်ရှိတဲ့ လက်ဆက်သရက်သီးတွေနဲ့ သရက်သီးခြောက်တွေ ဝယ်ယူလိုကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ မြန်မာကုန်သွယ်မှုမြှင့်တင်ရေးအဖွဲ့က ထုတ်ပြန်ပါတယ်။
ရုရှား-မြန်မာ စီးပွားရေးကောင်စီနဲ့ အဖွဲ့ဝင်တွေအနေနဲ့ ယခုနှစ်မှ စတင်ကာ ဝယ်ယူလိုပြီး သရက်သီးရောင်းချသူတွေနဲ့ တိုက်ရိုက်ဆက်သွယ် ဆောင်ရွက်ဖို့ အအသင့်ရှိနေတယ်လို့ ဆိုပါတယ်။
မြန်မာနိုင်ငံက ဖရဲသီးနဲ့ သရက်သီးတွေ ရုရှားကို တင်ပို့ရောင်းချဖို့ ယခုနှစ် မတ်လဆန်းပိုင်းမှာ သွားရောက်ခဲ့တဲ့ နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ရဲ့ ရုရှားခရီးစဉ်မှာ ဆွေးနွေးမှုတွေ ရှိခဲ့တာပါ။
ရုရှားနိုင်ငံအနေနဲ့ မြန်မာနိုင်ငံမှာ စိုက်ပျိုးထွက်ရှိတဲ့ စိန်တစ်လုံးသရက်သီးအမျိုးအစားကို ဝယ်ယူဖို့ စိတ်ဝင်စားတယ်လို့လည်း သရက်သီးစိုက်ပျိုးထုတ်လုပ်သူတွေထံက သိရပါတယ်။
ဒါ့ကြောင့် မြန်မာ့သရက်သီးကို ရုရှားဈေးကွက်ထံ တင်ပို့နိုင်ရေးအတွက် အဓိကရောင်းချတဲ့ လုပ်ငန်း/ကုမ္ပဏီတွေအနေနဲ့ ဆက်သွယ်ရမယ့် လိပ်စာအပြည့်အစုံကို ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနထံ ပေးပိုရမှာ ဖြစ်ပါတယ်။
မြန်မာနိုင်ငံမှ လက်ဆက်သရက်သီးတွေနဲ့ သရက်သီးခြောက်တွေ ရုရှားဈေးကွက်ထံ တင်ပို့နိုင်ရေးအတွက် ဆက်သွယ်နိုင်မယ့် ပုဂ္ဂိုလ်၊ အီးမေးလ်၊ ဖုန်းနံပါတ်တို့ကို ဧပြီ ၂၅ ရက်နေ့အရောက် မြန်မာကုန်သွယ်မှုမြှင့်တင်ရေးအဖွဲ့ထံ ပေးပို့ဖို့ အကြောင်းကြားထားပါတယ်။
သတင်း - BETV Business
#crd