ဂျေဒီ နှင့် မိုဒီ အခွန်ကိစ္စ တွေ့ဆုံဆွေးနွေး
အမေရိကန်ဒုတိယ သမ္မတ ဂျေဒီဗန့်စ်သည် တနင်္လာနေ့က နူးဒေလီတွင် အိန္ဒိယဝန်ကြီးချုပ် နာရင်ဒြာမိုဒီနှင့် ကုန်သွယ်ရေးရာများကို ဆွေးနွေးခဲ့ကြသည်။ တောင်အာရှနိုင်ငံသည် သမ္မတ ဒေါ်နယ်ထရမ့်ပ်၏ ထပ်တိုးအခွန်ကောက်ခံမှုများမှ ကင်းလွတ်ခွင့်ရရေးအတွက် ဝါရှင်တန်နှင့် သဘောတူညီချက် တစ်ရပ်ကို အလျင်အမြန်ရယူနိုင်ရေး ကြိုးပမ်းနေခဲ့သည်။
ဆွေးနွေးမှုများသည် နှစ်နိုင်ငံ ကုန်သွယ်မှုဆိုင်ရာ သဘောတူညီချက်အတွက် စေ့စပ်ညှိနှိုင်းမှုများတွင် သိသာထင်ရှားသော တိုးတက်မှုများ ကိုရစေခဲ့သည်ဟု အိမ်ဖြူတော်က သတင်းထုတ်ပြန်ခဲ့ပြီး နှစ်ဖက်စလုံးသည် အကောက်ခွန် ဝန်ထုပ်ဝန်ပိုးကို လျှော့ချရေးအတွက် ဖြစ်နိုင်ဖွယ်ရှိသော သဘောတူညီချက်တစ်ရပ်အတွက် အစီအစဉ်တစ်ခုကို အပြီးသတ် ညှိနှိုင်းနိုင်ခဲ့ကြောင်း သိရသည်။
၎င်းတို့နှစ်ဦးသည် ကာကွယ်ရေး၊ အရေးကြီးသည့် နည်းပညာများနှင့် စွမ်းအင်ကဏ္ဍများတွင် ပူးပေါင်းဆောင်ရွက်ရေးကိုလည်း ဆွေးနွေးခဲ့ကြသည်ဟု ဝန်ကြီးချုပ်ရုံး၏ သတင်းထုတ်ပြန်ချက်တွင် ဖေါ်ပြထားသည်။ ခေါင်းဆောင်နှစ်ဦးသည် ဒေသတွင်းနှင့် ကမ္ဘာလုံးဆိုင်ရာ လုံခြုံရေးကိစ္စရပ်များကို ဆွေးနွေးခဲ့ကြပြီးနောက် တွေ့ဆုံဆွေးနွေးမှု၊ သံတမန်နည်းလမ်းတို့ဖြင့် ရှေ့ဆက်သွားရန် တောင်းဆိုခဲ့ကြသည်။
ယခုအချိန်အထိ အိန္ဒိယ၏ အပြုသဘောဆောင်သော ထိတွေ့ဆက်ဆံမှုကို ကြိုဆိုကြောင်းနှင့် နှစ်နိုင်ငံလုံးရှိ အလုပ်သမား၊ လယ်သမားများနှင့် စွန့်ဦးတီထွင်သူများအတွက် အခွင့်အလမ်းသစ်များ ဖန်တီးပေးနိုင်ရန် မျှော်လင့်ထားကြောင်း အမေရိကန် ကုန်သွယ်ရေးကိုယ်စားလှယ် Jamieson Greer က သတင်းထုတ်ပြန်ချက်တွင် ပြောကြားထားသည်။
ယခုနှစ်ကုန်ပိုင်းတွင် ထရမ့်ပ် ကိုယ်တိုင် အိန္ဒိယနိုင်ငံသို့ အလည်အပတ်လာရောက်ရန် မျှော်လင့်ထားကြောင်းကိုလည်း မိုဒီက ဖေဖော်ဝါရီလက သူ၏ဝါရှင်တန်ခရီးစဉ်အတွင်း အမေရိကန်သမ္မတကို ဖိတ်ကြားခဲ့ခြင်းကို ရည်ညွှန်း၍ ပြောကြားခဲ့သည်။
Ref: သည်စတား