#နိုင်ငံတကာသတင်း
◼ယူကရိန်းနှင့် ငြိမ်းချမ်းရေး တိုက်ရိုက် ဆွေးနွေးရန်လမ်းဖွင့်ထားကြောင်း ရုရှားသမ္မတပူတင်ပြောကြား
စစ်ပွဲအစောပိုင်းနေ့ရက်များနောက်ပိုင်း ပထမဆုံးအကြိမ်အဖြစ် ယူကရိန်းနှင့် နှစ်ဖက်ဆွေးနွေးပြောဆိုရန် ရုရှားသမ္မတဗလာဒီမာပူတင်က ယမန်နေ့တွင် အဆိုပြုလိုက်ပြီး ယူကရိန်းသမ္မတ ဇီလန်စကီးကမူ အရပ်သားပစ်မှတ်များကို တိုက်ခိုက်ခြင်းများအား ရပ်တန့်ရေးကို ဆွေးနွေးရန် စိတ်အားထက်သန်ကြောင်း ပြောကြားသည်။
ပူတင်၏ အဆိုပြုချက်နှင့်ပတ်သက်၍ ဇီလန်စကီး က တိုက်ရိုက်တုံ့ပြန်ခြင်း မရှိသော်လည်း အရပ်သားများအပေါ် တိုက်ခိုက်မှုများအား ရပ်တန့်ရေးကို ဆွေးနွေးမည့် မည်သည့်အပစ်အခတ်ရပ်စဲရေးကို မဆို ပြောဆိုဆွေးနွေးရန် ကိဗ်ဘက်က အသင့်ရှိကြောင်း ၎င်း၏ ညစဉ် ရုပ်သံမိန့်ခွန်း၌ ပြောကြားသည်။
ယူကရိန်းစစ်ပွဲ အဆုံးသတ်ရေး ၎င်းတို့၏ကြိုးပမ်းမှုများတွင် တိုးတက်မှုများ မရရှိခဲ့ပါက ယင်းကိစ္စမှ နောက်ဆုတ်သွားမည်ဖြစ်ကြောင်း အမေရိကန်က ခြိမ်းခြောက်ခဲ့ပြီးနောက် ခေါင်းဆောင်နှစ်ဦးစလုံးအပေါ် ဖိအားများရှိလာခဲ့သည်။
ချိုးဖောက်မှုများ ရှိကြောင်း နောက်ပိုင်းတွင် အပြန်အလှန်စွပ်စွဲခဲ့သော အီစတာပွဲတော် နာရီပေါင်း ၃၀ အပစ်အခတ်ရပ်စဲမှုကို မော်စကိုက ကြေညာခဲ့ပြီးနောက် နောက်ထပ်အပစ်အခတ်ရပ်စဲမှုများအတွက် လမ်းဖွင့်ထားကြောင်း ရုရှားနှင့်ယူကရိန်းတို့က ပြောကြားခဲ့ကြသည်။
ဗုဒ္ဒဟူးနေ့တွင် လန်ဒန်မြို့၌ အမေရိကန် ၊ ဥရောပနိုင်ငံများနှင့်ဆွေးနွေးမှုများတွင် ယူကရိန်းက ပါဝင်သွားမည်ဖြစ်ကြောင်း ဇီလန်စကီး က ပြောကြားခဲ့ပြီး ယင်းမှာ ပြီးခဲ့သည့် သီတင်းပတ်က ပါရီအစည်းအဝေး၏ နောက်ဆက်တွဲဖြစ်ကြောင်း သိရသည်။
ပါရီ အစည်းအဝေးတွင် အမေရိကန်နှင့် ဥရောပနိုင်ငံများက သုံးနှစ်ကြာ ယူကရိန်းစစ်ပွဲ အဆုံးသတ်နိုင်ရေး နည်းလမ်းများကို ဆွေးနွေးခဲ့ကြကြောင်း သိရသည်။
စနေနေ့တွင် ၎င်းတို့ဘက်က တစ်ဖက်သတ်ကြေညာခဲ့သည့် အီစတာပွဲတော် အပစ်ရပ်ကာလ ကုန်ဆုံးသွားခဲ့ပြီးနောက် တိုက်ခိုက်မှုများ ပြန်လည်စတင်နေပြီဖြစ်ကြောင်း ပူတင်က ရုရှားအစိုးရရုပ်သံ သတင်းထောက်တစ်ဦးအား ပြောကြားခဲ့ပြီး တစ်ဆက်တည်းမှာပင် ၎င်းအနေဖြင့် ငြိမ်းချမ်းရေးအဆိုပြုချက်များအတွက် လမ်းဖွင့်ထားကြောင်း နှင့် ယူကရိန်းဘက်ကလည်း အလားတူလုပ်ဆောင်မည်ဟု မျှော်လင့်ကြောင်း ဆက်ပြောသည်။
“ နှစ်နိုင်ငံကြားဆွေးနွေးတာအပါအဝင် အရပ်သားပစ်မှတ်တွေကို မတိုက်ခိုက်ဖို့ကိစ္စကို ဆွေးနွေးဖို့ ဖြစ်နိုင်တယ်လို့ သမ္မတက ပြောကြားချိန်မှာ ယူကရိန်းနိုင်ငံနဲ့ ညှိနှိုင်းမှုတွေ၊ ဆွေးနွေးမှုတွေလုပ်ဖို့ကိုလည်း သမ္မတက စိတ်ထဲမှာ ရှိနေတာဖြစ်ပါတယ်။” ဟု ကရင်မလင်ပြောခွင့်ရသူ ဒီမီထရီပက်စ်ကော့ဗ် က နောက်ပိုင်းတွင် ရုရှားသတင်းဌာန အင်တာဖက်စ် ကို ပြောကြားသည်။
၂၀၂၂ ခုနှစ် ဖေဖော်ဝါရီလတွင် ရုရှားက ယူကရိန်းကို ကျူးကျော်ခဲ့ပြီးနောက် အစောပိုင်းသီတင်းပတ်များ နောက်ပိုင်း နှစ်နိုင်ငံကြားတိုက်ရိုက် ဆွေးနွေးမှုများ မရှိခဲ့ကြောင်း သိရသည်။
သတင်း-ရဲမင်း
ကိုးကား- Reuters
