#ယနေ့ထုတ်သတင်းစာ_နိုင်ငံတကာသတင်း
◼ ထွက်ခွာခြင်းမရှိသည့် ရွှေ့ပြောင်းဝင်ရောက်သူများကို အမေရိကန်ဒဏ်ငွေရိုက်မည်
နှင်ထုတ်ခံထားရသော တရားမဝင်ရွှေ့ပြောင်းဝင်ရောက်သူများ အမေရိကန်ပြည်ထောင်စုမှ ထွက်ခွာခြင်းမရှိခဲ့ပါက တစ်ဦးကို တစ်ရက်လျှင် အမေရိကန်ဒေါ်လာ ၉၉၈ ဒေါ်လာဒဏ်ငွေရိုက်ရန် အမေရိကန်အစိုးရက စီစဉ်ထားကြောင်းဧပြီ ၈ ရက်သတင်းများတွင်ရေးသားတင်ပြထားသည်။
အမေရိကန်ပြည်ထောင်စုမှ ထွက်ခွာခြင်းမရှိသေးသော ရွှေ့ပြောင်းဝင်ရောက်သူများအနေဖြင့် အထက်ပါဒဏ်ငွေကို မပေးဆောင်ပါက ၎င်းတို့ပိုင်ဆိုင်မှုများအားသိမ်းယူရန်လည်း အမေရိကန်အစိုးရက စီစဉ်ထားကြောင်းသိရသည်။
သမ္မတဒေါ်နယ်ထရန့်ဦးဆောင်သော အမေရိကန်အစိုးရသည် ၁၉၉၆ ခုနှစ်တွင်ပြဋ္ဌာန်းခဲ့ပြီး ၂ဝ၁၈ ခုနှစ်တွင် ပထမဆုံးအကြိမ်အာဏာသက်ဝင်ခဲ့ဖူးသော ဥပဒေတစ်ခုကိုအသုံးပြု၍ အမေရိကန်ပြည်ထောင်စုမှ ထွက်ခွာခြင်းမရှိသည့်ရွှေ့ပြောင်းဝင်ရောက်သူများကို နေ့စဉ်ဒဏ်ငွေရိုက်ရန် စီစဉ်ထားခြင်းဖြစ်သည်။
နှင်ထုတ်ခံထားရသော်လည်း ထွက်ခွာခြင်းမရှိသေးသော တရားမဝင် ရွှေ့ပြောင်းဝင်ရောက်သူများအား ဒဏ်ငွေရိုက်ရေးနှင့် ပိုင်ဆိုင်မှုများသိမ်းယူရေးတာဝန်ကို အမေရိကန်အစိုးရက အကောက်အခွန်ဌာနနှင့် နယ်စပ်ကာကွယ်ရေးဌာနများကို တာဝန်ပေးထားကြောင်း သိရသည်။
အမေရိကန်သမ္မတဒေါ်နယ်ထရန့်သည် ယခုနှစ်ဇန်နဝါရီလအတွင်း သမ္မတရာထူးရယူခဲ့ပြီးနောက် တရားမဝင်လူဝင်မှုများကို စတင်နှိမ်နင်းခဲ့သည်။
အမေရိကန်သမ္မတရာထူးကို ပထမဆုံးရယူခဲ့စဉ်ကာလ ၂ဝ၁၈ ခုနှစ်ကလည်း ဒေါ်နယ်ထရန့်သည် ၁၉၉၆ ခုနှစ်ဥပဒေကိုအသုံးပြု၍ တရားမဝင်ရွှေ့ပြောင်းဝင်ရောက်သူများကို ဒဏ်ငွေရိုက်ရန် ကြိုးပမ်းခဲ့ဖူးသည်။
တရားမဝင်ရွှေ့ပြောင်းဝင်ရောက်သူများအား ဒဏ်ငွေရိုက်မည့်အစီအစဉ်ကို အမိမြေလုံခြုံရေးဝန်ကြီးဌာနက အတည်ပြုထားသည်။
ရိုက်တာ