ယူကရိန်းကို စစ်ဘက်ဆိုင်ရာအကူအညီ ပေါင် သန်း ၄၅၀ ထောက်ပံ့မည်ဟု ဗြိတိန်ကြေညာ
******************
(နိုင်ငံတကာ) ဧပြီ ၁၁
ဗြိတိန်အစိုးရက ယူကရိန်းသို့ စစ်ဘက်ဆိုင်ရာ အကူအညီအဖြစ် စတာလင်ပေါင် သန်း ၄၅၀ ထောက်ပံ့မည်ဖြစ်ကြောင်း ကြေညာခဲ့သည်။
ဗြိတိန်ကာကွယ်ရေးဝန်ကြီးက ဂျွန်ဟာလေက ရုရှားကို ဖိအားပေးရန်နှင့် ရုရှားနိုင်ငံ၏ ယူကရိန်းနိုင်ငံအတွင်း ဝင်ရောက်တိုက်ခိုက်မှု အဆုံးသတ်ရန် ဖြစ်ကြောင်း ပြောဆိုခဲ့သည်။
“ယူကရိန်းရဲ့ ကာကွယ်ရေးကို ဆက်ပြီး အားကောင်းအောင် လုပ်ဆောင်ခြင်းနဲ့ ရုရှားကို ဟန့်တားဖို့ ကျွန်တော်တို့ ခြေလှမ်းပြင်ရမှာဖြစ်ပါတယ်” ဟု ၎င်းကဆိုသည်။
အဆိုပါ စစ်ရေးဆိုင်ရာ အကူအညီတွင် ရာနှင့်ချီသည့် ဒရုန်းများ တင့်ကားဖျက်မိုင်းများနှင့် စစ်သုံးယာဉ်များပြန်လည်ပြုပြင်ရေးရန်ပုံငွေများ ပါဝင်ကြောင်းသိရသည်။
ပြီးခဲ့သည့်လက လန်ဒန်တွင်ကျင်းပခဲ့သော ဥရောပခေါင်းဆောင်များ ထိပ်သီးအစည်းအဝေးအပြီးတွင်လည်း ဗြိတိန်ဝန်ကြီးချုပ် ကီယာစတာမာက ရုရှားစီးပွားရေးသမားများထံမှ သိမ်းယူထားသော ငွေကြေးများဖြင့် ယူကရိန်းကို ဘီလီယံနှင့်ချီ ထောက်ပံ့ရန် ပြင်ဆင်ထားကြောင်း ကြေညာခဲ့သည်။
