နိုင်ငံ့ GDP ဒေါ်လာ ၈၁ ဘီလီယံထိ တက်လာရန် လုပ်ဆောင်နေဟု နစကဥက္ကဋ္ဌပြော
ရန်ကုန်၊ မတ် ၂၂
လာမယ့် ၂၀၂၅-၂၀၂၆ ဘဏ္ဍာရေးနှစ်မှာ ပြည်တွင်းအသားတင်ထုတ်လုပ်မှုတန်ဖိုး (GDP) အနေနဲ့ အမေရိကန်ဒေါ်လာ ၈၁ ဘီလီယံအထိ တိုးတက်လာအောင် မျှော်မှန်း လုပ်ဆောင်နေကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောပါတယ်။
မတ်လ ၂၁ ရက်က နေပြည်တော်မှာရှိတဲ့ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန(၁) မှာ ကျင်းပပြုလုပ်ခဲ့တဲ့ “၂၀၂၅ အလွန် ဗဟုဝင်ရိုးကမ္ဘာတွင် မြန်မာနိုင်ငံကြုံတွေ့လာရမည့် စိန်ခေါ်မှုများနှင့် အခွင့်အလမ်းများ” သုံးသပ်ဆွေးနွေးပွဲမှာ အထက်ပါအတိုင်း ထည့်သွင်းပြောကြားခဲ့တာပါ။
“စီးပွားရေးအရ မြှင့်တင်ဖို့ လုပ်တဲ့နေရာမှာ ကျွန်တော်တို့နိုင်ငံအနေနဲ့ အလုပ်လုပ်ဖို့ လိုအပ်ပါတယ်”လို့ နစကဥက္ကဋ္ဌက ဆိုပါတယ်။
လက်ရှိမှာ နိုင်ငံ့ GDP အနေနဲ့ ဒေါ်လာ ၆၀ ဘီလီယံနဲ့ ၇၀ ဘီလီယံကြားရှိပြီး ဒေါ်လာ ၅၀၀ ဘီလီယံကျော် GDP ရှိတဲ့ ထိုင်းနိုင်ငံ၊ ဒေါ်လာ ၄၀၀ ဘီလီယံကျော် GDP ရှိတဲ့ ဘင်္ဂလားဒေ့ရှ်နိုင်ငံတွေနဲ့ နှိုင်းယှဉ်ရင် ကွာဟချက်ကြီးမားနေတယ်လို့ ဆက်ပြောပါတယ်။
မိမိတို့နိုင်ငံဟာ အာဆီယံနဲ့ ဒေသတွင်းနိုင်ငံတွေမှာ GDP နည်းပါးတဲ့ နိုင်ငံတစ်ခုဖြစ်တယ်လို့လည်း ဖေဖော်ဝါရီလတုန်းက ပြုလုပ်ခဲ့တဲ့ အစိုးရအဖွဲ့အစည်းအဝေးတစ်ခုမှာ ပြောကြားထားတာ ရှိပါတယ်။
လယ်ယာစိုက်ပျိုးရေးကဏ္ဍကြီးမှာပင် အခြားနိုင်ငံတွေထက် ထုတ်လုပ်မှုစွမ်းရည်မှာ အားနည်းနေတာကို တွေ့ရတယ်လို့ ဆိုပါတယ်။
ကုလသမဂ္ဂဖွံ့ဖြိုးတိုးတက်ရေးအစီအစဉ် (UNDP) ရဲ့ နောက်ဆုံးအစီရင်ခံစာအရ ၂၀၂၀ ပြည့်နှစ်မှစတင်ပြီး မြန်မာနိုင်ငံရဲ့ ပြည်တွင်းအသားတင်ထုတ်လုပ်မှုတန်ဖိုး (ဂျီဒီပီ) ကလည်း ၉ ရာခိုင်နှုန်းအထိ ကျဆင်းသွားပြီး အရင်ဆယ်စုနှစ်တွေရဲ့ စီးပွားရေးတိုးတက်မှုကို ပြောင်းပြန်လှန်ပစ်ခဲ့တယ်လို့ ဖော်ပြထားပါတယ်။
၂၀၂၄ ခုနှစ်မှာ မြန်မာကျပ်ငွေ ဖောင်းပွမှုနှုန်းဟာ ၂၅.၄ ရာခိုင်နှုန်းကို ရောက်ရှိလာနေပြီး ၂၀၂၁ ခုနှစ်မှာ ဒေါ်လာငွေလဲနှုန်းက ၁၃၃၀ ကျပ်ကနေ ၂၀၂၅ ခုနှစ်မှာ တစ်ဒေါ်လာ ၄၂၅၀ ကျပ်ကို ကျဆင်းသွားပြီး အိမ်ထောင်စုတွေရဲ့ ဝယ်ယူနိုင်စွမ်းကို ပိုမိုကျဆင်းစေခဲ့တယ်လို့ ဆိုပါတယ်။
သတင်း - BETV Business