တောမင်းသမီး - ခင်ခင်ထူး
ဆရာမခင်ခင်ထူးရဲ့ စာအုပ်တွေထဲမှာ လူသိ
အများဆုံးနဲ့အကျော်ကြားဆုံးဆို မအိမ်ကံ
စာအုပ်ပါ ။ ဇာတ်လမ်းဇာတ်အိမ် အကောင်းဆုံး
ဆို တောမင်းသမီးစာအုပ်လို့ ပြောချင်ပါတယ် ။
တောမင်းသမီးစာအုပ်ကိုရေးဖို့ ဇာတ်မင်းသမီး
တွေဆီမှာ အချက်အလက်စုဆောင်းတာနဲ့တင် အချိန် ခြောက်နှစ်ကျော်ကြာခဲ့သတဲ့ ။
ဝါခေါင်မိုး ခေါ် ဥသြသံအေး ဆိုတဲ့ ဇာတ်မင်းသမီး တစ်နည်း တောမင်းသမီး တစ်ယောက်အကြောင်းကို မွေးစကနေ အသက်ကြီးတဲ့အချိန်အထိ
ရေးဖွဲ့ထားတဲ့ ဇာတ်လမ်းရှည်ကြီးပေါ့ ။
ညောင်ခါးပွဲမှာ အကြော်သွားရောင်းရင်း လက်ပံပင် ပါးပျဉ်းထဲကနေ ကလေးလေးတစ်ယောက် ကောက်ယူရရှိခဲ့တဲ့ အကြော်သည် မဗိုင်းတောင့် ။ ဝါခေါင်လ မိုးတွေ ရွာနေချိန်မှာ တွေ့ခဲ့တဲ့ ကလေးလေးမို့ ဝါခေါင်မိုး လို့ အမည်တွင်ခဲ့တဲ့ ကလေးမ ။
မုဆိုးမ အကြော်သည်ကြီးက သားသမီးမရှိရှာတာမို့ သမီးအရင်းလေးပမာ ချစ်ပြီး အမေရင်း ပြန်လာ
ရှာမှာကို စိုးပူနေခဲ့တာ ။
ဒီကောက်ရခဲ့တဲ့ ကလေးမလေးဟာ ဇာတ်မင်းသမီးပိုးပါလာခဲ့တယ် ။ မဗိုင်းတောင့်ရဲ့ အမေ မအေးပုံဆိုတာကလည်း တချိန်က ခုတင်ထိုး တောမင်းသမီးလုပ်ခဲ့ဖူးသတဲ့ ။ မအေးပုံရဲ့ ခုတင်ထိုးမင်းသမီး ဘဝ ။
တောမင်းသမီးတစ်လက်ဖြစ်ဖို့ ခက်ခက်ခဲခဲ ပညာသင်ယူခဲ့ရတဲ့ ဝါခေါင်မိုးရဲ့ ဇာတ်လမ်းပေါ့။
နှီးပြားသည်ကြီးဆီက ဇာတ်မင်းသမီးရုပ်ကို အတင်းဝင်လုတဲ့ ဝါခေါင်မိုး ။
ကယ်ပါတွေဆီက စည်းနဲ့ဝါးကို အတင်းပူဆာပြီး ဝယ်ခိုင်းတဲ့ ဝါခေါင်မိုး ။
ဇာတ်မင်းသမီးပညာသင်ပေးမယ်ဆိုပြီး ခေါ်သွားပြီးမှ ဝက်စာသယ် အိမ်မှုကိစ္စတွေလုပ်ပေးခဲ့ရတာတွေ ။
ဇာတ်ခုံပေါ်ကို စတက်ဖို့ ပညာသင်ယူချိန်မှာ
မနာလိုမှုကြောင့် ခြင်ထောင်ထဲ ခါချဉ်ထုပ်ပစ်ခံရတာတွေ ၊ မျက်နှာချေမှုန့်ဘူးထဲ ကင်းမ လက်မည်းထည့်တာတွေ ။
နာမည်တစ်လုံး ပရိတ်သတ်ထဲကျဖို့အတွက် ကြိုးစားရတဲ့ တောမင်းသမီးတွေရဲ့ ပညာယူရတာလည်း အံ့သြထိတ်လန့်စရာပါ ။
ဥဩသံအေး ရဲ့ ဘဝနဲ့အတူ စိတ်ဝင်စားစရာ
အမြဲသိနေရတာတော့ တောမင်းသမီးသုံးလက်အကြောင်းပေါ့ ။ သိပ်လှသိပ်ချောပြီး ပညာရည်
ပြည့်ဝတဲ့ မင်းသမီးကြီးတွေ ။
သော်တာတင် တဲ့ ။ ကျေးတောသူ မခင်မူ တဲ့ ။
သရဖီစိမ်းညွန့် တဲ့ ။ သုံးယောက်လုံးဟာ ပညာ
ပြည့်ဝတဲ့ မင်းသမီးကြီးတွေ ဖြစ်ပေမဲ့ ယောကျ်ားရ ကံမကောင်းတာချင်း တူကြတဲ့ မင်းသမီးတွေ။
တစ်ယောက်က လင်ကို ဓားနဲ့ပြန်ထိုးခဲ့တာ ။
တစ်ယောက်က ဖောက်ပြန်တဲ့လင်ဖြစ်သူကို ချောက်ထဲတွန်းချလိုက်တာ ။
တောမင်းသမီးတွေရဲ့ ဘဝဇာတ်လမ်းနဲ့အတူ
ဖတ်ရတဲ့ မြင်အပ် မမြင်အပ် ထိတ်လန့်စရာတွေ ။
လှည်းကိုရှေ့ကနေ တားခဲ့တာတွေ ။ ဇာတ်ခုံပေါ်က မကျွတ်လွတ်တဲ့ မင်းသမီး နဲ့ လူပြက် ကနေကြတာတွေ ။
နောက်ပြီး ဘုန်းကြီးပျံ ဧယဉ်ကျူးကြတာတွေ ။
မင်းသမီးတွေ အပြိုင်ငှားပြီး ဧယဉ်ကျူးတာအကောင်းဆုံး ရွေးကြတာကနေ ရွာနှစ်ရွာရဲ့
လူခုတ်ပွဲတွေ။ ဥသြသံအေး နဲ့ ယုဇနမစိမ်းခင် တို့အပြိုင်ဧယဉ်ကျူးတဲ့ ပွဲမှာ ဘယ်သူ အနိုင်ရမှာလဲ။
ကြက်တူရွေးငှက်ကို ဧယဉ်ကျူးရတဲ့အခန်းကလည်း အထိတ်တလန့်ပင် ။
ဥသြသံအေးကို စွန့်ပစ်ထားခဲ့တဲ့ အမေရင်းဟာ ဘယ်သူလဲ ။ အမေရင်းကို ပြန်ရှာတွေ့မှာလား ။
စွဲဆောင်လွန်းလှပြီး မထင်မှတ်ထားတဲ့ ဇာတ်လမ်းကြောင့် အဆုံးထိကို စိတ်ဝင်စားမှု မကျဘဲ ဖတ်ရတဲ့ ဝတ္ထုရှည်ကြီးပေါ့ ။
ဇာတ်လမ်းရှည်ကြီးကို အချိတ်အဆက်မိမိနဲ့
ရေးပြသွားနိုင်တဲ့ ဆရာမရဲ့ ရေးဖွဲ့မှုအစွမ်းကို တကယ်လေးစားမိတာပဲ ။ အဆုံးသတ်မှ သြော်
ဒီလို အချိတ်အဆက်လေးတွေပါလား ဆိုပြီး
အံ့သွရတာ ။
မြန်မာဝတ္ထုရှည် ထူထူကိုမှ ဖတ်ချင်တဲ့ သူတွေအတွက် တကယ်ကို ရသအစုံပေးနိုင်မဲ့ စာအုပ်ကောင်းတစ်အုပ်ပါ ။
