#ယနေ့ထုတ်သတင်းစာ_သတင်း
◾️အွန်လိုင်းလိမ်လည်မှုလုပ်ငန်းများနှင့် ပတ်သက်သူဦးရေ ၁ဝ၀ဝဝ ထိုင်းနိုင်ငံဘက်သို့ ပို့ဆောင်ရန် ပြင်ဆင်
မြန်မာနယ်စပ်တစ်လျှောက်ရှိ အွန်လိုင်း လိမ်လည်မှုလုပ်ငန်းများနှင့် ပတ်သက်နေသူ ဦးရေ ၁ဝဝဝဝ ကို ထိုင်းနိုင်ငံဘက်သို့ နှင်ထုတ်ရေး အတွက် ပြင်ဆင်နေကြောင်း ကရင်ပြည်နယ် BGF တပ်ဖွဲ့က ဖေဖော်ဝါရီ ၁၅ ရက်တွင် ထုတ်ဖော်ပြောကြားထားသည်။
အွန်လိုင်းလိမ်လည်မှုလုပ်ငန်းများ ဖြိုခွင်းရေးလုပ်ငန်းစဉ်အရ ယင်းလုပ်ငန်းများနှင့်ပတ်သက်နေသူ ၁ဝဝဝဝ ကို ထိုင်းနိုင်ငံသို့ နယ်နှင်ရေးအတွက် စာရင်းပြုစုပြင်ဆင်နေကြောင်း BGF ပြောရေး ဆိုခွင့်ရှိသူက အေအက်ဖ်ပီသတင်းဌာနသို့ ထုတ် ဖော်ပြောကြားထားသည်။
မြန်မာနယ်စပ်တစ်လျှောက်ရှိအွန်လိုင်းလိမ်လည်မှုလုပ်ငန်းများနှင့် ပတ်သက်နေသော အထက်ပါ လူ ပေါင်း ၁ဝဝဝဝ ကို တစ်ရက်လျှင် လူ ၅၀၀ နှုန်းဖြင့် ထိုင်းနိုင်ငံဘက်သို့နယ်နှင်မည်ဖြစ်ကြောင်း BGF ပြောရေး ဆိုခွင့်ရှိသူ၏ အဆိုအရ သိရသည်။
ထိုင်းမီဒီယာများ၏ အဆိုအရ ထိုင်းနိုင်ငံ တာ့ခ်ပြည်နယ် နယ်စပ် လုံခြုံရေး တာဝန်ရှိသူများက မြန်မာ ဘက်ခြမ်း အွန်လိုင်းလိမ်လည်မှုလုပ်ငန်းများမှ အလုပ်သမား ၇၀၀၀ ကိုလက်ခံရေးအတွက် BGF တာဝန်ရှိသူများနှင့် ညှိနှိုင်းနေကြောင်း သိရသည်။
အွန်လိုင်းလိမ်လည်မှုလုပ်ငန်းများ ဖြိုခွင်းရေးအစီအစဉ်အရ ထိုင်း အစိုးရက ယခုလ အစောပိုင်းမှ စ၍ မြန်မာဘက်ခြမ်းသို့ လျှပ်စစ်ဓာတ် အား၊ အင်တာနက်နှင့် လောင်စာဆီ ပေးပို့ဖြည့်ဆည်းမှုများ ရပ်တန့်ခဲ့ပြီး နောက် မြန်မာဘက်ခြမ်း အွန်လိုင်း လိမ်လည်ရေးလုပ်ငန်းများကို BGF က စီးနင်းမှုများ ပြုလုပ်နေခြင်းဖြစ် သည်။
တရုတ် ရုပ်ရှင်သရုပ်ဆောင် တစ်ဦးကို မြန်မာနယ်စပ် အွန်လိုင်း လိမ်လည်မှုလုပ်ငန်းတစ်ခုမှ ယခုနှစ် ဇန်နဝါရီလအတွင်း ကယ်ထုတ်ပေးခဲ့ ရပြီးနောက် အိမ်နီးချင်းထိုင်းနှင့် တရုတ်တို့က မြန်မာနိုင်ငံနှင့် ပူးပေါင်း၍ အွန်လိုင်းလိမ်လည်မှုလုပ်ငန်းများကို ဖြိုခွင်းရန် ကြိုးပမ်းလျက်ရှိသည်။