မပြီးသေးဘူးလို့ ထင်ရတဲ့ ဒီဇိုင်းနဲ့ အံ့ဖွယ် တံတား-ဥမင်
The Chesapeake Bay တံတားဥမင်လမ်း (CBBT) ဟာ Virginia ကမ်းခြေကနေ အရှေ့ပိုင်းကမ်းရိုးတန်းကို ဆက်သွယ်ထားတာဖြစ်ပါတယ်။
Chesapeake ပင်လယ်အော်ဝကို ဖြတ်ပြီး ၁၇.၆ မိုင် အလျားရှိတဲ့ အင်ဂျင်နီယာပညာရပ်ဆိုင်ရာ အံ့ဖွယ်တည်ဆောက်မှု တခုလည်းဖြစ်ပါတယ်။
တံတားနဲ့ ရေအောက်ဥမင်လိုဏ်ခေါင်းတွေ ပေါင်းစပ်ထားတဲ့ ပုံစံဖြစ်ပါတယ်။
၁၉၆၄ ခုနှစ်မှာ စတင်ဖွင့်လှစ်ခဲ့တာဖြစ်ပြီး ဒီတံတားရဲ့ထူးခြားချက်က တံတားအပိုင်း ၁၂ မိုင်၊ ရေအောက်လိုဏ်ခေါင်း နှစ်ခု (တစ်ခုချင်းစီ တစ်မိုင်စီရှည်)နဲ့ လူတို့ဖန်တီးထားတဲ့ ကျွန်းလေးခုတို့ ပေါင်းစပ်ထားခြင်း ဖြစ်ပါတယ်။
ဒီတံတားဥမင်လမ်းကို တည်ဆောက်ရတဲ့ အဓိကအကြောင်းရင်းက စစ်သင်္ဘောတွေ အထူးသဖြင့် ရေငုပ်သင်္ဘောတွေ၊ လေယာဉ်တင်သင်္ဘောတွေ သွားလာနိုင်ဖို့အတွက် ဖြစ်ပါတယ်။
တံတားတစ်ခုတည်း ဆောက်မယ့်အစား ဥမင်လိုဏ်ခေါင်းတွေ ထည့်သွင်းထားတာက သင်္ဘောကြီးတွေ အဆင်ပြေပြေ ဖြတ်သန်းသွားလာနိုင်စေဖို့ ဖြစ်ပါတယ်။
CBBT ဟာ အရေးပါတဲ့ သယ်ယူပို့ဆောင်ရေးချိတ်ဆက်မှုတစ်ခုသာမက ခရီးသွားတွေအတွက် ပင်လယ်အော်နဲ့ အတ္တလန္တိတ်သမုဒ္ဒရာရဲ့ လှပတဲ့ပတ်ဝန်းကျင် ရှု့ခင်းတွေကို ပိုင်ဆိုင်ထားပါတယ်။
တံတားဥမင်လမ်းဟာ ကုန်သွယ်ရေး၊ ခရီးသွားလုပ်ငန်း၊ နဲ့ ဒေသခံလူ့အဖွဲ့အစည်းတွေကို ထောက်ပံ့ပေးတဲ့ အရေးပါတဲ့စီးပွားရေးနဲ့ ထောက်ပံ့ပို့ဆောင်ရေးလမ်းကြောင်းတစ်ခုလည်း ဖြစ်ပါတယ်။
နှစ်တွေကြာလာတာနဲ့အမျှ CBBT ဟာ လုံခြုံရေးတိုးတက်စေဖို့နဲ့ တိုးပွားလာတဲ့ယာဉ်သွားလာမှုကို လက်ခံနိုင်ဖို့ တိုးချဲ့မှုတွေနဲ့ အဆင့်မြှင့်တင်မှုတွေ ပြုလုပ်ခဲ့ပါတယ်။
လက်ရှိမှာ တစ်နေ့ကို ယာဉ်အစီးရေထောင်ချီပြီး ဖြတ်သန်းသွားလာနေကြပြီး ၂၀၂၁ ခုနှစ်အထိ စုစုပေါင်း ယာဉ် ၁၄၀ သန်းကျော် ဖြတ်သန်းသွားလာခဲ့ပြီး ဖြစ်ပါတယ်။
ဒီတံတားကြီးဟာ မြောက်အမေရိကတိုက်မှာရှိတဲ့ တံတား-လိုဏ်ခေါင်း ပေါင်းစပ်စနစ်တွေထဲက တစ်ခုအပါအဝင် ဖြစ်ပြီး ကမ္ဘာပေါ်မှာလည်း ထိုကဲ့သို့သော တံတားပုံစံ ၁၄ ခုသာ ရှိတယ်လို့ သိရပါတယ်။
